“Нуронийлар” жамоатчилик Кенгаши ва “Бувижонлар мактаби” аъзолари бешовуллик ёшлар билан учрашдилар

Ёшлар маънавиятини юксалтириш, улар онгида ватанга муҳаббат, миллий умуминсоний қадриятларга садоқат руҳини шакллантириш мақсадида Амударё телевидениеси таҳририяти ижодий жамоаси томонидан Ўзбекистон Республикаси Олий Мажлиси ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” грант лойиҳаси доирасида туманнинг чекка ҳудудларидаги қишлоқларида, маҳаллалар ва ўқув муассасаларида маданий-маърифий, маънавий ва мусиқий тадбирлар ташкил этилмоқда.

Ана шундай тадбирлардан бири Амударё туманининг Бешовул маҳалласи ҳудудида жойлашган 79-сонли умумтаълим мактабида ҳам ўтказилди.

“Кексалар – хонадонларимиз файзи ва фариштаси” шиори остида кексаларни эъзозлаш, уларнинг панд-насиҳатларини ёшларга етказиш орқали жамиятда ўзаро ҳурмат ва меҳр-муҳаббат, юксак ахлоқий ва маънавий қадриятлар муҳитини шакллантириш мақсадида ташкиллаштирилган мазкур тадбирда Амударё туман Маҳалла ва оилани қўллаб-қувватлаш бўлими қошидаги “Нуронийлар” жамоатчилик Кенгаши раиси Бекман ота Аллаберганов, “Бувижонлар мактаби” жамоатчилик Кенгаши раиси, Қорақалпоғистонда хизмат кўрсатган маданият ходими, “Баркамол авлод” болалар мактаби директори Хонимжон Ражабова, Бешовул маҳалласида истиқомат қилувчи ибратли оила соҳибаси, Ўрозгул она Раҳимова, маҳалла фаоллари, 79-сонли мактаб ўқитувчилари ва ўқувчилари иштирок этдилар.

Тадбирни лойиҳа координатори Робия Йўлдошева очди ва лойиҳа доирасида амалга оширилаётган ишлар ва ўтказилаётган маънавий-маърифий тадбирларнинг аҳамияти, ёшлар маънавиятини юксалтиришдаги ўрни ҳақида батафсил маълумот берди.

Шундан сўнг, “Нуронийлар” жамоатчилик Кенгаши раиси Бекман ота Аллаберганов бугунги фаровон ва осойишта ҳаётнинг қадрига етиш, келажакда она Ватанга муносиб фарзанд бўлиш учун ўқиб-ўрганишдан асло тўхтамаслик, жамиятда ёшларнинг ўзини тутишлари, кийиниш ва муомала маданияти хусусида ҳаётий мисоллар тариқасида ёшлар билан дилдан, самимий суҳбат ўтказди.

Тадбир давомида ўзининг сермазмун, ҳаётий мисолларга бой суҳбати билан иштирок этган “Бувижонлар мактаби” жамоатчилик Кенгаши раиси Хонимжон Ражабова мамлакатимизда ёшлар учун яратилган шарт-шароитлар, уларнинг интилиш ва иқтидорларини намоён этишларини кафолатловчи имкониятлар ҳақида сўз юритиб, ёшларни билим олишга, юқори чўққиларни забт этишга даъват этди.

Ўз навбатида Бешовул маҳалласи фаол аёллари ва ёшлари ҳам кекса авлод вакилларининг ҳаёт йўллари, панд-у насиҳатлари ўзлари учун ҳамиша қадрли эканлигини таъкидладилар. Айниқса, маҳалладаги намунали оила соҳибаси Ўрозгул Раҳимова ҳар қандай муваффақиятнинг замирида аввало инсоннинг ўз ҳаёти давомида эгаллаган касб-ҳунари, билими мужассам эканлигини, ўзларининг тинимсиз изланишлари, меҳнатлари эвазига бугунги кунда ҳавасга муносиб, эл ҳурматига сазовор шахс сифатида камолга етган Бешовул маҳалласи ёшлари ҳақида фахрланиб сўз юритди.

Учрашув тадбирининг давомида 79-сонли мактаб ўқувчилари “Ўзлигимизни асраймиз” мавзусидаги саҳна кўринишини намойиш этдилар. Хусусан, “Бувижоним кийган либослар” қисмида миллий либослар кўргазмасини, бугунги ёшларнинг жамоат орасида кийиладиган миллий либослари қисмида эса бири-биридан чиройли ва кўркам либослар ва либослар учун танланган матоларнинг инсон саломатлигига фойдалари ҳақида сўзлаб бердилар. Шу баробарида барча тенгдошларини миллий матолардан тикилган либосларни фахрланиб кийиб юришга ундадилар.

Тадбирнинг адабий-мусиқий қисмида эса Бешовуллик ёшлар “Лачак ўраш” маросимини кўрсатиб беришди ва “Лачак ўраш” маросимига оид ашулалар айтиб, рақсларга тушдилар.

“Кексалар – хонадонларимиз файзи ва фариштаси” шиори остида бўлиб ўтган бешовуллик ёшлар билан кекса авлод вакилларининг дилдан суҳбат тарзидаги учрашув тадбири кексаларни эъзозлаш, уларнинг панд-насиҳатларини ёшларга етказиш орқали юксак ахлоқий ва маънавий қадриятлар муҳитини шакллантиришда муҳим аҳамият касб этди. Бешовуллик ёшлар маънавий-маърифий мавзулардаги қимматли ўгит ва маслаҳатлари учун Бекман ота Аллаберганов, Хонимжон Ражабова, Ўрозгул Раҳимоваларга самимий миннатдорчилик билдирдилар.

Робия ЙЎЛДОШЕВА.