“Nuroniylar” jamoatchilik Kengashi va “Buvijonlar maktabi” aʼzolari beshovullik yoshlar bilan uchrashdilar

Yoshlar maʼnaviyatini yuksaltirish, ular ongida vatanga muhabbat, milliy umuminsoniy qadriyatlarga sadoqat ruhini shakllantirish maqsadida Amudaryo televideniyesi tahririyati ijodiy jamoasi tomonidan Oʻzbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilgan “Yuksak maʼnaviyatli va axloqli yoshlar – kelajak poydevori” grant loyihasi doirasida tumanning chekka hududlaridagi qishloqlarida, mahallalar va oʻquv muassasalarida madaniy-maʼrifiy, maʼnaviy va musiqiy tadbirlar tashkil etilmoqda.

Ana shunday tadbirlardan biri Amudaryo tumanining Beshovul mahallasi hududida joylashgan 79-sonli umumtaʼlim maktabida ham oʻtkazildi.

“Keksalar – xonadonlarimiz fayzi va farishtasi” shiori ostida keksalarni eʼzozlash, ularning pand-nasihatlarini yoshlarga yetkazish orqali jamiyatda oʻzaro hurmat va mehr-muhabbat, yuksak axloqiy va maʼnaviy qadriyatlar muhitini shakllantirish maqsadida tashkillashtirilgan mazkur tadbirda Amudaryo tuman Mahalla va oilani qoʻllab-quvvatlash boʻlimi qoshidagi “Nuroniylar” jamoatchilik Kengashi raisi Bekman ota Allaberganov, “Buvijonlar maktabi” jamoatchilik Kengashi raisi, Qoraqalpogʻistonda xizmat koʻrsatgan madaniyat xodimi, “Barkamol avlod” bolalar maktabi direktori Xonimjon Rajabova, Beshovul mahallasida istiqomat qiluvchi ibratli oila sohibasi, Oʻrozgul ona Rahimova, mahalla faollari, 79-sonli maktab oʻqituvchilari va oʻquvchilari ishtirok etdilar.

Tadbirni loyiha koordinatori Robiya Yoʻldosheva ochdi va loyiha doirasida amalga oshirilayotgan ishlar va oʻtkazilayotgan maʼnaviy-maʼrifiy tadbirlarning ahamiyati, yoshlar maʼnaviyatini yuksaltirishdagi oʻrni haqida batafsil maʼlumot berdi.

Shundan soʻng, “Nuroniylar” jamoatchilik Kengashi raisi Bekman ota Allaberganov bugungi farovon va osoyishta hayotning qadriga yetish, kelajakda ona Vatanga munosib farzand boʻlish uchun oʻqib-oʻrganishdan aslo toʻxtamaslik, jamiyatda yoshlarning oʻzini tutishlari, kiyinish va muomala madaniyati xususida hayotiy misollar tariqasida yoshlar bilan dildan, samimiy suhbat oʻtkazdi.

Tadbir davomida oʻzining sermazmun, hayotiy misollarga boy suhbati bilan ishtirok etgan “Buvijonlar maktabi” jamoatchilik Kengashi raisi Xonimjon Rajabova mamlakatimizda yoshlar uchun yaratilgan shart-sharoitlar, ularning intilish va iqtidorlarini namoyon etishlarini kafolatlovchi imkoniyatlar haqida soʻz yuritib, yoshlarni bilim olishga, yuqori choʻqqilarni zabt etishga daʼvat etdi.

Oʻz navbatida Beshovul mahallasi faol ayollari va yoshlari ham keksa avlod vakillarining hayot yoʻllari, pand-u nasihatlari oʻzlari uchun hamisha qadrli ekanligini taʼkidladilar. Ayniqsa, mahalladagi namunali oila sohibasi Oʻrozgul Rahimova har qanday muvaffaqiyatning zamirida avvalo insonning oʻz hayoti davomida egallagan kasb-hunari, bilimi mujassam ekanligini, oʻzlarining tinimsiz izlanishlari, mehnatlari evaziga bugungi kunda havasga munosib, el hurmatiga sazovor shaxs sifatida kamolga yetgan Beshovul mahallasi yoshlari haqida faxrlanib soʻz yuritdi.

Uchrashuv tadbirining davomida 79-sonli maktab oʻquvchilari “Oʻzligimizni asraymiz” mavzusidagi sahna koʻrinishini namoyish etdilar. Xususan, “Buvijonim kiygan liboslar” qismida milliy liboslar koʻrgazmasini, bugungi yoshlarning jamoat orasida kiyiladigan milliy liboslari qismida esa biri-biridan chiroyli va koʻrkam liboslar va liboslar uchun tanlangan matolarning inson salomatligiga foydalari haqida soʻzlab berdilar. Shu barobarida barcha tengdoshlarini milliy matolardan tikilgan liboslarni faxrlanib kiyib yurishga undadilar.

Tadbirning adabiy-musiqiy qismida esa Beshovullik yoshlar “Lachak oʻrash” marosimini koʻrsatib berishdi va “Lachak oʻrash” marosimiga oid ashulalar aytib, raqslarga tushdilar.

“Keksalar – xonadonlarimiz fayzi va farishtasi” shiori ostida boʻlib oʻtgan beshovullik yoshlar bilan keksa avlod vakillarining dildan suhbat tarzidagi uchrashuv tadbiri keksalarni eʼzozlash, ularning pand-nasihatlarini yoshlarga yetkazish orqali yuksak axloqiy va maʼnaviy qadriyatlar muhitini shakllantirishda muhim ahamiyat kasb etdi. Beshovullik yoshlar maʼnaviy-maʼrifiy mavzulardagi qimmatli oʻgit va maslahatlari uchun Bekman ota Allaberganov, Xonimjon Rajabova, Oʻrozgul Rahimovalarga samimiy minnatdorchilik bildirdilar.

Robiya YOʻLDOShEVA.