"Жонажон юртим фаровонлигига ҳисса қўшаман” шиори остида барча овул ва маҳаллаларда ободонлаштириш, кўкаламзорлаштириш ишлари бошланди

Обод юртнинг файзи, таровати ўзгача бўлади. Зотан, озодалик, поклик, саранжом ва саришталик юртимизнинг янада кўркам бўлишига замин яратади. Бунда халқимизнинг йиллар давомида шаклланган эзгу қадрияти – ҳашар муҳим ўрин тутади.

Қорақалпоғистон Республикаси “Нуронийлар” жамоатчилик Кенгаши ташаббуси билан “Жонажон юртим фаровонлигига ҳисса қўшаман” шиори остида Амударё туманининг барча овул ва маҳаллаларида ободонлаштириш, кўкаламзорлаштириш ишлари қизғин бошлаб юборилди.

Жумладан, 25 февраль куни туманнинг Олмазор маҳалласида бўлиб ўтган ҳашар ҳам ёш авлод қалбида миллий анъаналаримизни қадрлашга, муқаддас қадриятларимизни мустаҳкамлашга хизмат қилди.

Дарҳақиқат, ҳашар — неча минг йиллар мобайнида одамларнинг бошини қовуштириб, уларни инсонпарварлик, саховатпешалик, саранжом-саришталик каби эзгу амалларга чорлайди. Ушбу қадриятнинг яна бир эътиборли жиҳати шундаки, у инсонлар ўртасида меҳр-оқибат ришталари, ҳамжиҳатлик, айниқса, ёшлар қалбида маҳалла-кўйга, она-Ватанга муҳаббат, дахлдорлик туйғуларини мустаҳкамлайди.

Олмазор маҳалласида бўлиб ўтган ҳашарда ёшлар, ўрта ёшли ака-опалар, ҳамда буви ва бувижонлар фаол иштирок этишди.

Улар эрта тонгдан кўчаларини, ҳовлилари атрофини, гузар ва ҳиёбонларни, ариқлар, кўча ва йўлакларни ҳамда болалар майдончаларини тартибга келтиришди. Шу билан бирга дарахтларни оқлаб, уларга шакл бердилар. Ҳашарда ариқ бўйларига, автомобиль йўллари ёқаларига мевали ва манзарали дарахт кўчатлари экилди. Экилган ҳар бир ниҳолни яхши парвариш қилиш, унинг келажакда мевали дарахт бўлиб бўй чўзиши учун уларнинг ҳар бирига бир нафар ёш бириктирилди.

Ҳашардан сўнг иштирокчиларга иссиқ овқат тортилди. Маҳалладаги ёши улуғ онахонлар, ёш келинчаклар дошқозонда сумалак қайнатишди. Улар сумалак атрофида юртимизга тинчлик, омонлик, тотувлик, қут-барака тилашди.

Бу каби ҳашарлар туманнинг барча ҳудудида бўлиб ўтди.

Фаровон маҳалласида бўлиб ўтган ҳашардан сўнг, маҳалланинг “Яккатут” ва “Кимёгарлар” кучасида баҳорнинг илк таоми – сумалак қайнатилди. Дошқазон атрофида йиғилган барча ёши улуғ онахонлар, қиз, келинчаклар дилидаги бор эзгу ниятларини айтиб сумалак учун керакли бўлган масаллиқларни солишди.

Шу ўринда айтиш лозимки, сумалак қайнатиш момомларимиздан меърос бўлиб қолган азалий қадриятимиз. Унинг тайёрланиш тарихи ҳақида қўплаб ривоятлар тарқалган.

Шулардан бири: деҳқон олиб қўйган охирги донини тезроқ экиш учун яхши ниятлар билан олдинроқ ивитиб қўяди. Лекин бирдан об-ҳаво бузилади. Буғдой идишда ниш уриб ўса бошлайди, об-ҳаво яхшиланавермайди. Деҳқон оила аъзолари оч турган пайтда буғдойни бутунлай нобуд қилмаслик чораларини излай бошлайди. У таваккал қилиб ниш урган ва анча бўй кўтарган донни қиймалайди ва хотинига бундан таом пиширишни буюради. Уй бекаси уни узоқ вақт қайнатади. Қарангки, оқкўнгил деҳқоннинг нияти холис чиқади. Ундан ҳиди ёқимли, ўзи тўйимли, мазаси эса тановул қилган кишининг узоқ вакт эсида қоладиган даражадаги ширин таом ҳосил бўлади. Бу таом борган сари халқ ўртасида кенг тарқалиб, баҳорнинг энг лаззатли таомига айланади.

Бу каби тадбирлар жумладан, ҳашар ҳамда сумалак қайнатиш маросими туманнинг Дўстлик маҳалласида ҳам бўлиб ўтди.

Ҳашар давомида эрта тонгдан туриб кўчаларни супуриб-сидириб, теварак- атрофга сув сепиб, ҳар хил гуллар экиш ҳар бир хонадонга чирой бағишлаши айтиб ўтилди. Бу борада ёшларга угит ва насиҳатлар берилди.

Миллий урф-одатларимизни, қадриятларимизни ўзида мужассам этган миллий таомнинг тайёрланиши ҳар йилдагиданда кўтаринки руҳда бўлиб ўтди.

Сумалак қайнатиш жараёнида унинг фойдали хусусиятлари айтиб ўтилди. Шунингдек, дошқазон атрофида онахонлар, қиз-жувонлар, жажжи болажонлар рақсга тушиб, гўзал қўшиқлар ҳиргойи қилишди.

Дарҳақиқат, сумалак лаззатли таом бўлиш билан бирга дармондори ҳамдир. Унинг таркибида инсон организими учун зарур бўлган барча оқсил ва углеводлар жамланган.

Эрта тонгдан дошқозонда қайнаётган ивитилган буғдойни шу ҳолга келтиргунча анча меҳнат талаб қилинди. Бу галги сумалакни ҳам Дўстлик маҳалласидаги бувижонлар ҳамжиҳатлик ва оғизбирчиликда тайёрлашди.

Сумалак атрофида юртимиз тинч, осмонимиз мусаффо бўлиши, юртимиз кундан-кунга ривожланиши каби эзгу тилаклар айтилиб, болаларнинг шўх-шадон кулгулари янгради.

Туман ҳокимлигининг Ахборот хизмати.