Эҳтиётсизлик оқибатида...

Биз учун берилган бебаҳо неъмат ҳисобланмиш ҳаётимизга аввало, ўзимиз жавобгармиз. Озгина эътиборсизлик ёки эҳтиётсизлик оқибатида ҳаётимиз катта хавф остида қолиши мумкин.

Амударё туманининг Янгиобод маҳалласида истиқомат қилувчи оиланинг ҳаёти ҳам айнан эътиборсизлик оқибатида хавф остида қолди.

2023 йил 18 февраль куни Янгибод маҳалласида истиқомат қилувчи эр-хотиннинг уйига яқин қариндошлари ҳамда турмушга чиққан қизи 2 нафар фарзанди билан меҳмонга келишади.

Кечки пайт меҳмонларга овқат пишириш тараддуди кўрилади. Лекин, газ босими меъйёридан пастлиги сабабли хонадон эгалари суюлтирилган газ балонидан фойдаланадилар. Аммо, овқат пишгандан сўнг, улар газ балонининг жўмрагини маҳкам ёпишни унутишади. Кечки овқатдан кейин меҳмонлар уй-уйларига тарқалишади.

Оиланинг меҳмонга келган қизи эртаси куни эрталаб турмуш ўртоғига қўнғироқ қилиб, фарзандлари тинмай йиғлаётганини ҳамда тезда келиб уйига олиб кетишини илтимос қилади. Турмуш ўртоғи киракашлик қилиш учун кетаётган укасига янгасини ва жиянларини олиб келишини топширади.

Қайин ука соат 7:40лар атрофида янгасининг уйига боради. У эшикни очган пайтида янгасининг дадаси, аранг юриб келаётганини, онаси ва фарзандлари карахт ҳолатда деворга суянганча ўтирганига гувоҳ бўлади. Бундан қаттиқ қўрқиб кетган қайин ука тезда уйига қайтиб, акасига қайнотасининг маст эканлигини, янгасини олиб келиши учун ўзи бориши лозимлигини айтади.

Қизнинг турмуш ўртоғи соат 8лар чамасида қайнотаси ва қайнонасининг уйига борганда ҳақиқий аҳволни кўради. У зудлик билан тез тиббий ёрдамга қўнғироқ қилади. Тез ёрдам машинаси етиб келгач, жабирланувчиларга биринчи тез тиббий ёрдам кўрсатилиб, шифохонага олиб борилади.

У ерда беморларнинг ўпкаларига етарлича кислород юборилиб, муолажалар қилинади. Ҳозирги кунда ушбу оиланинг барча азолари соғ-саломат.

Фавқулодда вазиятлар бўлими ходимлари хонадондаги газ плиталар, мўрилар барчаси техник талабларга тўла жавоб беришини, туман Санитария-эпидемиологик осойишталик ва жамоат саломатлиги бўлими ходимлари эса пиширилган овқат таркибини лобаратория текширувдан ўтказиб, мутлақо ҳавфсиз эканлигини аниқладилар.

Тегишли текширувлар газ балондан эҳтиётсизлик билан фойдаланиш оқибатида оила аъзолари ис газидан заҳарланганини кўрсатди.

Маълумот учун айтиш керакки, ис гази ҳидсиз газ бўлганлиги учун заҳарланиш вақтида инсон ҳеч нарса сезмаслиги мумкин. Ис газидан заҳарланганда мушакларда оғриқ, бош айланиши, бош оғриғи, қулоқларда шовқин, қайт қилиш, алаҳсираш, ҳушдан кетиш ва фалажланиш кузатилади. Бу ҳолатда биринчи навбатда тез ёрдамга қўнғироқ қилиш зарур. Заҳарланган инсонни ўша ҳудуддан тоза ҳавога олиб чиқиш ва сиқиб турган кийимларини юмшатиш керак. Беморни ётқизиш ва новшадил спирти ҳидлатиш керак. Енгил заҳарланиш ҳолатларида елпиб туриш, чой ёки қаҳва бериш зарур.

Шу ўринда барча юртдошларимизга айтмоқчимизки, ҳаёт деб аталмиш бебаҳо неъматни асраб-авайланг. Эҳтиётсизлик оқибатида ўзингизнинг ва яқинларингизнинг ҳаётини хавф-хатарга қўйманг. Газ ускуналари ва жиҳозларидан тўғри фойдаланиш қоидарига риоя қилинг!

Туман ҳокимлигининг Ахборот хизмати.