Ehtiyotsizlik oqibatida...

Biz uchun berilgan bebaho neʼmat hisoblanmish hayotimizga avvalo, oʻzimiz javobgarmiz. Ozgina eʼtiborsizlik yoki ehtiyotsizlik oqibatida hayotimiz katta xavf ostida qolishi mumkin.

Amudaryo tumanining Yangiobod mahallasida istiqomat qiluvchi oilaning hayoti ham aynan eʼtiborsizlik oqibatida xavf ostida qoldi.

2023-yil 18-fevral kuni Yangibod mahallasida istiqomat qiluvchi er-xotinning uyiga yaqin qarindoshlari hamda turmushga chiqqan qizi 2 nafar farzandi bilan mehmonga kelishadi.

Kechki payt mehmonlarga ovqat pishirish taraddudi koʻriladi. Lekin, gaz bosimi meʼyyoridan pastligi sababli xonadon egalari suyultirilgan gaz balonidan foydalanadilar. Ammo, ovqat pishgandan soʻng, ular gaz balonining joʻmragini mahkam yopishni unutishadi. Kechki ovqatdan keyin mehmonlar uy-uylariga tarqalishadi.

Oilaning mehmonga kelgan qizi ertasi kuni ertalab turmush oʻrtogʻiga qoʻngʻiroq qilib, farzandlari tinmay yigʻlayotganini hamda tezda kelib uyiga olib ketishini iltimos qiladi. Turmush oʻrtogʻi kirakashlik qilish uchun ketayotgan ukasiga yangasini va jiyanlarini olib kelishini topshiradi.

Qayin uka soat 7:40lar atrofida yangasining uyiga boradi. U eshikni ochgan paytida yangasining dadasi, arang yurib kelayotganini, onasi va farzandlari karaxt holatda devorga suyangancha oʻtirganiga guvoh boʻladi. Bundan qattiq qoʻrqib ketgan qayin uka tezda uyiga qaytib, akasiga qaynotasining mast ekanligini, yangasini olib kelishi uchun oʻzi borishi lozimligini aytadi.

Qizning turmush oʻrtogʻi soat 8lar chamasida qaynotasi va qaynonasining uyiga borganda haqiqiy ahvolni koʻradi. U zudlik bilan tez tibbiy yordamga qoʻngʻiroq qiladi. Tez yordam mashinasi yetib kelgach, jabirlanuvchilarga birinchi tez tibbiy yordam koʻrsatilib, shifoxonaga olib boriladi.

U yerda bemorlarning oʻpkalariga yetarlicha kislorod yuborilib, muolajalar qilinadi. Hozirgi kunda ushbu oilaning barcha azolari sogʻ-salomat.

Favqulodda vaziyatlar boʻlimi xodimlari xonadondagi gaz plitalar, moʻrilar barchasi texnik talablarga toʻla javob berishini, tuman Sanitariya-epidemiologik osoyishtalik va jamoat salomatligi boʻlimi xodimlari esa pishirilgan ovqat tarkibini lobaratoriya tekshiruvdan oʻtkazib, mutlaqo havfsiz ekanligini aniqladilar.

Tegishli tekshiruvlar gaz balondan ehtiyotsizlik bilan foydalanish oqibatida oila aʼzolari is gazidan zaharlanganini koʻrsatdi.

Maʼlumot uchun aytish kerakki, is gazi hidsiz gaz boʻlganligi uchun zaharlanish vaqtida inson hech narsa sezmasligi mumkin. Is gazidan zaharlanganda mushaklarda ogʻriq, bosh aylanishi, bosh ogʻrigʻi, quloqlarda shovqin, qayt qilish, alahsirash, hushdan ketish va falajlanish kuzatiladi. Bu holatda birinchi navbatda tez yordamga qoʻngʻiroq qilish zarur. Zaharlangan insonni oʻsha hududdan toza havoga olib chiqish va siqib turgan kiyimlarini yumshatish kerak. Bemorni yotqizish va novshadil spirti hidlatish kerak. Yengil zaharlanish holatlarida yelpib turish, choy yoki qahva berish zarur.

Shu oʻrinda barcha yurtdoshlarimizga aytmoqchimizki, hayot deb atalmish bebaho neʼmatni asrab-avaylang. Ehtiyotsizlik oqibatida oʻzingizning va yaqinlaringizning hayotini xavf-xatarga qoʻymang. Gaz uskunalari va jihozlaridan toʻgʻri foydalanish qoidariga rioya qiling!

Tuman hokimligining Axborot xizmati.