ТОШҚАЛЪА МАҲАЛЛАСИ ЁШЛАРИНИНГ ИЖТИМОИЙ ФАОЛЛИГИ ОШМОҚДА

Ёшларнинг маънавий-руҳий ва интиллектуал салоҳиятини ошириш, “Жаҳолатга қарши - маърифат” тамойили асосида ижтимоий-маънавий муҳитни соғломлаштириш, ёшларнинг бўш вақтларини мазмунли ўтказиш, уларни мафкура майдонининиг турли хуружларидан ҳимоя қилиш, маънавий дунёсини бойитиш, алоҳида иқтидорга эга ёшларни қўллаб-қувватлаш мақсадида Амударё телевидениеси ижодий жамоаси томонидан таълим муассасаларида турли мавзуларда тадбирлар, ҳуқуқни муҳофаза қилиш органлари ходимлари, шоир ва ёзувчилар, журналистлар билан учрашувлар ўтказилмоқда.

Яқинда Тошқалъа маҳалла фуқаролар йиғини ҳудудидаги 34-сонли умумтаълим мактаби фаоллар залида мактаб ўқитувчилари ва юқори синфлар ўқувчилари иштирокида “Жаҳолатга қарши - маърифат” тамойили асосида “Юксак маънавиятли ва ахлоқли ёшлар – келажак пойдевори” грант лойиҳаси доирасида дилдан суҳбат тарзидаги учрашув тадбири ўтказилди.

Учрашувда “Тараққиёт кўзгуси” газетаси махсус мухбири, Ўзбекистон Ёзувчилар Уюшмаси аъзоси, Қорақалпоғистонда хизмат кўрсатган журналист, “Юксак маънавиятли ва ахлоқли ёшлар – келажак пойдевори” грант лойиҳаси координатори, шоира Робия Йўлдошева, Тошқаъла маҳалла фуқаролар йиғини раиси Сарвар Султонов, ҳудуд бўйича профилактика инспектори Иноят Бобожонов, 34-сонли умумтаълим мактаби ўқитувчилари ва юқори синф ўқувчилари ҳамда ота-оналар, оммавий ахборот воситалари вакиллари иштирок этишди.

Учрашув тадбирини мазкур мактаб директорининг маънавий-маърифий ишлар бўйича ўринбосари Шерзод Султонов очди ва мактаб ўқувчиларининг бўш вақтларини мазмунли ўтказиш, улар ўртасида китобхонлик муҳитини яхшилаш, айниқса, вояга етмаганларнинг дарсдан бўш вақтларида назоратсиз қолишларининг олдини олиш, узрли сабабларсиз дарс қолдиришларига йўл қўймаслик борасида амалга оширилаётган ишлар хусусида тўхталди.

Шундан сўнг, Робия Йўлдошева Амударё телевидениеси ижодий жамоаси томонидан олиб борилаётган маънавий-тарбиявий ишларга тўхталиб, вояга етмаганлар ўртасида назоратсизлик ва ҳуқуқбузарликларнинг олдини олиш, ёшларнинг тунги вақтларда кўнгилочар масканларда ота-оналари ёки уларнинг ўрнини босувчи шахсларсиз юришларига йўл қўймаслик, таълим-тарбия муассасаларида белгиланган қонун-қоидаларга амал қилиш ҳар бир ўқувчининг зиммасидаги масъулиятли вазифа эканлигини таъкидлади. Бу борада Амударё телевидениеси ижодий жамоаси билан таълим муассасалари ҳамда ҳудудлар бўйича профилактика инспекторлари ўртасидаги ҳамкорлик асосида ўтказилаётган турли мавзулардаги самимий мулоқот тадбирларининг ижобий самара бераётганини ҳаётий мисоллар орқали қайд этди.

Тадбир давомида Тошқаъа маҳалласи ҳудуди бўйича профилактика инспектори Иноят Бобожонов маҳалла фуқаролар йиғини оқсоқоли, ёшлар етакчиси ҳамда хотин-қизлар фаоли билан ҳамкорликда вояга етмаганлар билан ишлашиш бўйича амалга оширилаётган кенг қамровли маънавий-маърифий, тарбиявий ишлар хусусида батафсил маълумот берди. Хусусан, “Ёшлар дафтари” рўйхатига киритилган ёшларнинг ижтимоий фаоллигини ошириш, вояга етмаганлар ўртасида ҳуқуқбузарликларнинг олдини олиш, тунги вақтларда ўқувчи-ёшларнинг тўй ва бошқа маросимларда қатнашишларига барҳам бериш, уларнинг иқтидорларини ривожлантиришга кўмаклашиш мақсадида ҳудуддаги ибратли оилалар вакиллари, таниқли инсонлар иштирокида ўтказилаётган “Бир болага етти маҳалла ота-она”, “Кексалар ўгити – бахт калити”, “Китоб – юксак маънавият ва ёрқин ҳаёт сари элтувчи куч” мавзусида ўтказилаётган маънавий-маърифий тадбирлар ва эришилаётган натижалар ҳақида сўз юритди.

Шунингдек, тадбирда Тошқалъа маҳалла фуқаролар йиғини раиси Сарвар Султонов ҳам сўзга чиқиб, мактаб ўқувчисининг бир соат дарс қолдириши ўз ҳаётида эришиши мумкин бўлган ютуқларнинг маълум қисмини йўқотиш билан баравар эканлигини таъкидлаб, ўқувчи-ёшларга қимматли маслаҳатларини берди.

Учрашув тадбирида мактабнинг ёш ижодкор ўқувчиларидан Зарина Тозабоева, Ҳаётхон Ҳайитбоева, Венера Шомуродова, Улбўлсин Темирова ҳамда Машҳура Қундузбоевалар ўз ижодларидан намуналар ўқиб беришди. Шу билан бирга ҳуқуқий-маърифий мавзулардаги саволлар билан мурожаат этдилар. Ўқувчи-ёшларнинг барча саволларига масъуллар томонидан жавоблар ва зарур тушунча ва тавсиялар берилди.

Учрашув тадбири давомида Робия Йўлдошева Амударё телевидениеси ижодий жамоаси томонидан тошқалъалик ўқувчи-ёшлар ҳаётига оид муаммолар, хусусан, вояга етмаганлар ўртасида назоратсизлик ва ҳуқуқбузарликларнинг олдини олишга қаратилган ишларни ўрганиш жараёнида сезиларли ютуқлар қайд этилганини мамнуният билан билдирди. Айниқса, маҳалла масъулларининг манзилли режа асосида ҳудуддаги умумтаълим мактаблари педагогика жамоалари ва ота-оналар билан ҳамкорлиги яхши йўлга қўйилгани туфайли вояга етмаганлар ўртасида назоратсизликка, ўқувчиларнинг узрли сабабларсиз дарс қолдириш ҳолатларига барҳам берилиб, ҳуқуқбузарликлар кескин камайганини алоҳида эътироф этди.

Тадбир якунида Робия Йўлдошева ижодкор ёшлар билан дилдан, самимий мулоқот ўтказиб, ўзининг она Ватанни мадҳ этувчи, ватанпарварлик мавзусидаги шеърларидан ўқиб берди.

Бўлиб ўтган учрашув тадбири тошқалъалик ёшлар учун ҳақиқий маънавият сабоқларини тақдим этгани билан аҳамиятли бўлди.

Равшан БАҲРАМОВ, Маҳмуджон ШОМУРОДОВ.