TOShQALʼA MAHALLASI YoShLARINING IJTIMOIY FAOLLIGI OShMOQDA

Yoshlarning maʼnaviy-ruhiy va intillektual salohiyatini oshirish, “Jaholatga qarshi - maʼrifat” tamoyili asosida ijtimoiy-maʼnaviy muhitni sogʻlomlashtirish, yoshlarning boʻsh vaqtlarini mazmunli oʻtkazish, ularni mafkura maydonininig turli xurujlaridan himoya qilish, maʼnaviy dunyosini boyitish, alohida iqtidorga ega yoshlarni qoʻllab-quvvatlash maqsadida Amudaryo televideniyesi ijodiy jamoasi tomonidan taʼlim muassasalarida turli mavzularda tadbirlar, huquqni muhofaza qilish organlari xodimlari, shoir va yozuvchilar, jurnalistlar bilan uchrashuvlar oʻtkazilmoqda.

Yaqinda Toshqalʼa mahalla fuqarolar yigʻini hududidagi 34-sonli umumtaʼlim maktabi faollar zalida maktab oʻqituvchilari va yuqori sinflar oʻquvchilari ishtirokida “Jaholatga qarshi - maʼrifat” tamoyili asosida “Yuksak maʼnaviyatli va axloqli yoshlar – kelajak poydevori” grant loyihasi doirasida dildan suhbat tarzidagi uchrashuv tadbiri oʻtkazildi.

Uchrashuvda “Taraqqiyot koʻzgusi” gazetasi maxsus muxbiri, Oʻzbekiston Yozuvchilar Uyushmasi aʼzosi, Qoraqalpogʻistonda xizmat koʻrsatgan jurnalist, “Yuksak maʼnaviyatli va axloqli yoshlar – kelajak poydevori” grant loyihasi koordinatori, shoira Robiya Yoʻldosheva, Toshqaʼla mahalla fuqarolar yigʻini raisi Sarvar Sultonov, hudud boʻyicha profilaktika inspektori Inoyat Bobojonov, 34-sonli umumtaʼlim maktabi oʻqituvchilari va yuqori sinf oʻquvchilari hamda ota-onalar, ommaviy axborot vositalari vakillari ishtirok etishdi.

Uchrashuv tadbirini mazkur maktab direktorining maʼnaviy-maʼrifiy ishlar boʻyicha oʻrinbosari Sherzod Sultonov ochdi va maktab oʻquvchilarining boʻsh vaqtlarini mazmunli oʻtkazish, ular oʻrtasida kitobxonlik muhitini yaxshilash, ayniqsa, voyaga yetmaganlarning darsdan boʻsh vaqtlarida nazoratsiz qolishlarining oldini olish, uzrli sabablarsiz dars qoldirishlariga yoʻl qoʻymaslik borasida amalga oshirilayotgan ishlar xususida toʻxtaldi.

Shundan soʻng, Robiya Yoʻldosheva Amudaryo televideniyesi ijodiy jamoasi tomonidan olib borilayotgan maʼnaviy-tarbiyaviy ishlarga toʻxtalib, voyaga yetmaganlar oʻrtasida nazoratsizlik va huquqbuzarliklarning oldini olish, yoshlarning tungi vaqtlarda koʻngilochar maskanlarda ota-onalari yoki ularning oʻrnini bosuvchi shaxslarsiz yurishlariga yoʻl qoʻymaslik, taʼlim-tarbiya muassasalarida belgilangan qonun-qoidalarga amal qilish har bir oʻquvchining zimmasidagi masʼuliyatli vazifa ekanligini taʼkidladi. Bu borada Amudaryo televideniyesi ijodiy jamoasi bilan taʼlim muassasalari hamda hududlar boʻyicha profilaktika inspektorlari oʻrtasidagi hamkorlik asosida oʻtkazilayotgan turli mavzulardagi samimiy muloqot tadbirlarining ijobiy samara berayotganini hayotiy misollar orqali qayd etdi.

Tadbir davomida Toshqaʼa mahallasi hududi boʻyicha profilaktika inspektori Inoyat Bobojonov mahalla fuqarolar yigʻini oqsoqoli, yoshlar yetakchisi hamda xotin-qizlar faoli bilan hamkorlikda voyaga yetmaganlar bilan ishlashish boʻyicha amalga oshirilayotgan keng qamrovli maʼnaviy-maʼrifiy, tarbiyaviy ishlar xususida batafsil maʼlumot berdi. Xususan, “Yoshlar daftari” roʻyxatiga kiritilgan yoshlarning ijtimoiy faolligini oshirish, voyaga yetmaganlar oʻrtasida huquqbuzarliklarning oldini olish, tungi vaqtlarda oʻquvchi-yoshlarning toʻy va boshqa marosimlarda qatnashishlariga barham berish, ularning iqtidorlarini rivojlantirishga koʻmaklashish maqsadida hududdagi ibratli oilalar vakillari, taniqli insonlar ishtirokida oʻtkazilayotgan “Bir bolaga yetti mahalla ota-ona”, “Keksalar oʻgiti – baxt kaliti”, “Kitob – yuksak maʼnaviyat va yorqin hayot sari eltuvchi kuch” mavzusida oʻtkazilayotgan maʼnaviy-maʼrifiy tadbirlar va erishilayotgan natijalar haqida soʻz yuritdi.

Shuningdek, tadbirda Toshqalʼa mahalla fuqarolar yigʻini raisi Sarvar Sultonov ham soʻzga chiqib, maktab oʻquvchisining bir soat dars qoldirishi oʻz hayotida erishishi mumkin boʻlgan yutuqlarning maʼlum qismini yoʻqotish bilan baravar ekanligini taʼkidlab, oʻquvchi-yoshlarga qimmatli maslahatlarini berdi.

Uchrashuv tadbirida maktabning yosh ijodkor oʻquvchilaridan Zarina Tozaboyeva, Hayotxon Hayitboyeva, Venera Shomurodova, Ulboʻlsin Temirova hamda Mashhura Qunduzboyevalar oʻz ijodlaridan namunalar oʻqib berishdi. Shu bilan birga huquqiy-maʼrifiy mavzulardagi savollar bilan murojaat etdilar. Oʻquvchi-yoshlarning barcha savollariga masʼullar tomonidan javoblar va zarur tushuncha va tavsiyalar berildi.

Uchrashuv tadbiri davomida Robiya Yoʻldosheva Amudaryo televideniyesi ijodiy jamoasi tomonidan toshqalʼalik oʻquvchi-yoshlar hayotiga oid muammolar, xususan, voyaga yetmaganlar oʻrtasida nazoratsizlik va huquqbuzarliklarning oldini olishga qaratilgan ishlarni oʻrganish jarayonida sezilarli yutuqlar qayd etilganini mamnuniyat bilan bildirdi. Ayniqsa, mahalla masʼullarining manzilli reja asosida hududdagi umumtaʼlim maktablari pedagogika jamoalari va ota-onalar bilan hamkorligi yaxshi yoʻlga qoʻyilgani tufayli voyaga yetmaganlar oʻrtasida nazoratsizlikka, oʻquvchilarning uzrli sabablarsiz dars qoldirish holatlariga barham berilib, huquqbuzarliklar keskin kamayganini alohida eʼtirof etdi.

Tadbir yakunida Robiya Yoʻldosheva ijodkor yoshlar bilan dildan, samimiy muloqot oʻtkazib, oʻzining ona Vatanni madh etuvchi, vatanparvarlik mavzusidagi sheʼrlaridan oʻqib berdi.

Boʻlib oʻtgan uchrashuv tadbiri toshqalʼalik yoshlar uchun haqiqiy maʼnaviyat saboqlarini taqdim etgani bilan ahamiyatli boʻldi.

Ravshan BAHRAMOV, Mahmudjon ShOMURODOV.