“ҲАР КУНИНГ НАВРЎЗ БЎЛСИН, ЖОНАЖОН ЎЗБЕКИСТОНИМ!” ШИОРИ ОСТИДА НАВРЎЗ САЙЛИ ВА БАЙРАМ ТАДБИРИ ЎТКАЗИЛДИ

Бу йилги кўклам юртимизга ўзгача тароват, шукуҳ билан кириб келди. Кўкламни соғинган дилларга унинг ташрифи илиқлик бахш этди, руҳини кўтариб, юраклардаги завқ-у шавқни оширди. Элимизда кўтаринкилик, жўшқинлик билан Наврўзи олам тадориги бошланди. Яшил майсалар бош кўтараётган замин-у, қушлар чуғурига тўлаётган ферузаранг само, биз нафас олаётган мусаффо ҳавони овул ва маҳаллаларда ҳамжиҳатликда пиширилаётган шоҳ таом – сумалакнинг хушбўй ҳиди тутди.

Юртимизга мана шундай шод-у хуррамлик, қувонч улашиб, қутлуғ қадам билан Наврўзи олам кириб келди. Ушбу байрамни муносиб нишонлаш бўйича 2023 йил 1 март куни Ўзбекистон Республикаси Президентининг «2023 йилги Наврўз – умумхалқ байрамига тайёргарлик кўриш ва уни ўтказиш тўғрисида»ги Қарори қабул қилинди. Унга кўра, бу йилги Наврўз байрами мамлакатимизда «Ҳар кунинг Наврўз бўлсин, жонажон Ўзбекистоним!» деган бош ғоя асосида нишонланиши белгиланди.

Туманимизда ҳам ушбу шиор остида катта байрам сайли ўтказилди.

18 март куни тумандаги Марказий ўйингоҳда бўлиб ўтган ушбу сайилга бутун амударёликлар, ёш-у қари юртдошларимиз ташриф буюришди. Нуроний отахонлар, мўътабар онахонлар байрамона безатилган сўрилар, шоҳсупаларда ўтириб, миллий анъаналаримиз бўлган ёр-ёр, лапарлар куйлашди, қуроқ қураб, ип йигириб, айтишувлар айтишди. Наврўз байрами туманимизнинг овул ва маҳаллаларида, шаҳар ва қишлоқларда ҳам кенг нишонланмоқда.

Қатор кўркам расталарда ташкил қилинган миллий ҳунармандлик маҳсулотлари, миллий таомлар, савдо ярмаркалари, нафосат билан безатилган дастурхонлар кўзларни яшнатди.

Байрам томошаси бошланишидан олдин туманимиз раҳбарлари ва меҳмонлар биргаликда халқимиз билан мулоқот қилиб, кўргазмаларни кўздан кечиришди, сайил иштирокчиларини байрам билан табриклашди. Шундан сўнг, “Офарин” фольклор-этнографик халқ жамоасининг карнай-сурнай наволари билан байрам томошаси бошланди.

Туман ҳокими Султонбой Йўлдашев бутун Амударё аҳлини Наврўзи олам билан муборакбод этди ва юртимиздаги бунёдкорликлар, эришилган ютуқлар хусусида сўзлади. Табрикдан сўнг, “Фасли навбаҳор тараннуми” деб номланган мусиқий дастур бошланди.

Дастурда туманимизнинг эстрада хонандалари қатори истеъдодли ёш хонандалар ҳам иштирок этишди. Шунингдек, болалар бадиий жамоалари ўзларининг янги қўшиқ ва рақсларида баҳор қувончларини ифода этдилар. Амударё туманига хос бўлган мумтоз наволар, аскиячилик, масхарабозлик, халқ санъати, урф-одатлар намойиш этилди айтишув, лапарлар, ёр-ёрлар янгради. Халқимизнинг миллий мероси – урф-одатлари, анъаналари мужассам бўлган чиқишлар байрамга ўзига хос бетакрор оҳанг ва маъно бағишлади.

Наврўз байрами муносабати билан бўлиб ўтган ушбу сайилда амударёликлар жам бўлиб, бирдамлик, ҳамжиҳатлик анъаналарига содиқлигини яна бир карра намоён этишди. Байрам томошаси барча юртдошларимизга баҳорий кайфият, кўтаринки руҳ улашди.

Туман ҳокимлигининг Ахборот хизмати.