БЕШОВУЛЛИКЛАР НАВРЎЗ БАЙРАМИНИ КЎТАРИНКИ РУҲДА НИШОНЛАШДИ

Юртимиз бўйлаб ўтказилган Наврўз тантаналари халқимизга баҳорий ва кўтаринки кайфият бахш этди. Айём муносабати билан туманимизнинг барча ҳудудларида, овул ва маҳаллалар, таълим муассасалари, корхона-ташкилотларда концерт дастурлари, сайиллар ва спорт мусобақалари ўтказилди.

Наврўз байрами муносабати билан Бешовул маҳалласида ҳам катта сайил бўлиб ўтди. Маҳалла ҳудудидаги фермерлар ҳомийлигида фуқаролар йиғини томонидан ташкил этилган ушбу тадбирга ёши улуғлардан тортиб, кичик ёшдаги болаларгача ташриф буюришди.

Маҳалладаги 37-сонли мактабнинг спорт майдончасида ўтказилган байрам тадбирини фуқаролар йиғинидаги ҳоким ёрдамчиси Шерзод Тўраев очиб берди ва маҳалла аҳолисини байрам билан табриклади. У ўз сўзида ҳудудни ривожлантириш, аҳолига фаровон турмуш тарзини яратиш борасида олиб борилаётган ишлар хусусида тўхталди. Шунингдек, маҳаллада бандликни таъминлаш, тадбиркорликни йўлга қўйиш ва ривожлантириш бўйича амалга оширилган чора-тадбирлар тўғрисида ҳам сўзлади.

Фуқаролар йиғинида ташкил этилган Кексалар гуруҳи аъзоси, қишлоқ хўжалиги соҳасида узоқ йиллар фаолият кўрсатган нуроний отахон Фарҳод ота Искандаров ҳам маҳалладошларни байрам билан қутлаб, Наврўз байрами муносабати билан фахрийлар, кекса авлод вакилларини ҳар томонлама эъзозлаш, «Темир дафтар», «Аёллар дафтари», «Ёшлар дафтари» ва «Меҳр дафтари»га киритилган ҳамда кўмакка муҳтож инсонларнинг ҳолидан хабар олиш, уларга беғараз ёрдам бериш билан боғлиқ хайрия тадбирлари ҳам ташкил этилганини таъкидлади. Беморлар, якка-ёлғиз яшовчилар хонадонларида ободонлаштириш, томорқадаги экиш ишларига кўмаклашилгани, маҳаллада бирдамликда пиширилган сумалаклар тарқатилгани, байрамни муносиб кутиб олишга қизғин тайёргарлик кўрилганини айтиб ўтди.

Байрам сайлида Қиличбой маданият маркази ходимлари ва ҳаваскорлари, 37-сонли мактаб ўқувчилари ва маҳалла ҳудудидаги мактабгача таълим ташкилоти тарбияланувчилари томонидан тайёрланган катта мусиқий дастур намойиш этилди. Дастур давомида ижро этилган баҳор, Наврўз, Ватан ҳақидаги куй ва қўшиқлар, халқ оғзаки ижоди намуналари, ёр-ёр ва лапарлар, келинсалом, она алласи, қиз узатиш каби миллий қадриятларимиз акс этган саҳна кўринишлари иштирокчиларга кўтаринки кайфият бағишлади. Шунингдек, ўйингоҳда турли спорт мусобақалари ҳам ташкил этилди. Маҳалланинг спортчи ёшлари тош кўтариш, куч синашиш, арқон тортиш мусобақаларида фаол қатнашишди. Айниқса, сунъий қопламали спорт майдончасида бўлиб ўтган футбол мусобақасидаги ўйинлар жуда қизғин кечди. Болажонлар ўртасида бўлиб ўтган варрак учириш мусобақаси ҳам сайилнинг файзли ўтишини таъминлади.

Тадбир давомида ёши улуғ нуронийларга, спорт мусобақалари ғолиблари ва фермер хўжаликларининг илғор ишчиларига байрам совғалари топширилди.

Байрам сайлига ташриф буюрган меҳмонлар дастурхонларга тортилган баҳорий таомлар, сумалаклар ва бошқа турли ноз-неъматлардан баҳраманд бўлдилар. Уларга миллий таомимиз ош ҳам тортилди.

Маҳаллада ўтказилган Наврўз байрами тантаналари бешовулликларга кўтаринки руҳ бахш этиб, катта таассуротлар қолдирди.

Озода Худойберганова.