Олмазор маҳалласида туман ҳокимининг ёшлар билан учрашуви бўлиб ўтди

Бугунги ёшлар – мамлакат иқтисодиёти, сиёсий-маънавий, ижтимоий ва маданий ҳаётининг эртанги кунги қудратли локомотивларидир. Бу ҳақда Президентимиз ҳар галги учрашувларида ҳам фахр, ҳам ишонч билан таъкидлашлари бежиз эмас. Шу боис, мамлакатимизда ёшларнинг билим олишлари, ўз қобилият ва иқтидорларини амалда намоён этишлари учун барча зарур шароитлар, имкониятлар яратилган. Мамлакат раҳбаридан тортиб, қуйи бўғин раҳбарларигача ёшлар ҳаётига оид муаммоларни ўрганиш, мавжуд муаммоларни жойларига чиққан ҳолда ижобий ҳал этишга кўмаклашиш мақсадида ўтказилаётган ёшлар билан учрашувлар, давра суҳбатлари самимий мулоқот майдонига айланмоқда.

23 март куни Амударё тумани Олмазор маҳалласининг маъмурий биносида бўлиб ўтган учрашувда туман ҳокими Султонбой Йўлдашев, туман Халқ қабулхонаси бўлими мудири Эркин Ражабов, туман ҳокими ўринбосари Маҳмуд Шерметов, Ёшлар ишлари агентлиги туман бўлими бошлиғи Сардор Исмаилов ҳамда маҳалланинг фаол ёшлари иштирок этишди.

Туман Халқ қабулхонаси бўлими мудири Эркин Ражабов ёшлар учун имкониятлар кўлами ниҳоятда кенг эканлигини, бу имкониятлардан фақатгина тўлақонли равишда фойдаланиб, Ватан равнақига ҳисса қўшиш лозимлигини айтиб ўтди.

Туман ҳокими Султонбой Йўлдашев жорий йилнинг 30 апрель куни бўлиб ўтадиган умумхалқ референдумида барча ёшларни фаол иштирок этишга чорлаб, мазкур сиёсий жараённинг аҳамияти тўғрисида ўз фикрларини билдириб ўтди. Шунингдек, учрашувда ёшларнинг бандлигини таъминлаш, қўшимча иш ўринларини яратиш, ёш тадбиркорлар сафини кенгайтиришга қаратилган муҳим чора-тадбирлар белгиланиб, шу асосида олиб борилаётгани қайд этиб ўтилди.

Шундан сўнг Ёшлар ишлари агентлиги туман бўлими бошлиғи Сардор Исмаилов ёшларнинг мурожаатлари имкон қадар бартараф этилишиини айтиб, туманимизнинг чекка ҳудудларида истиқомат қилувчи ёшларнинг муаммолари ҳам сайёр қабул тарзида кўриб чиқилаётганлигини ва ҳеч бир мурожаат эътибордан четда қолмаслигини таъкидлади.

Туман ҳокими билан бўлиб ўтган учрашувда ёшларнинг муаммо ва таклифларидан иборат мурожаатлари тингланди.

Жумладан, маҳалла ҳудудида истиқомат қилувчи фаол ёшлардан бири Шаҳзод Ибодуллаев ҳайдовчилик гувоҳномасини олиш учун ўқув курси харажатларини қоплаб берилишида, Фарида Абдуллаева, Севара Муродова, Динора Қурбониёзова, Шоҳиста Собировалар эса контракт тўловининг бир қисми тўлаб берилишида амалий ёрдам сўраб мурожаат қилдилар.

Аксарият мурожаатлар шу ернинг ўзида қаноатлантирилиб, қолганлари тез кунда ижобий ҳал қилиниши маълум қилинди.

Шу ўринда айтиш керакки, бугун ёшлар яратилаётган ҳар бир имкониятдан унумли фойдаланишга интилмоқда. Учрашув давомида берилган саволлар ва билдирилан муаммолардан ҳам билса бўладики, бугун ҳар бир ўғил-қизнинг ўз режалари ва мақсадлари бор. Чунки, давлатимиз томонидан олиб борилаётган ёшлар сиёсати уларни янада илҳомлантирмоқда.

Туман ҳокимлигининг Ахборот хизмати.