Olmazor mahallasida tuman hokimining yoshlar bilan uchrashuvi boʻlib oʻtdi

Bugungi yoshlar – mamlakat iqtisodiyoti, siyosiy-maʼnaviy, ijtimoiy va madaniy hayotining ertangi kungi qudratli lokomotivlaridir. Bu haqda Prezidentimiz har galgi uchrashuvlarida ham faxr, ham ishonch bilan taʼkidlashlari bejiz emas. Shu bois, mamlakatimizda yoshlarning bilim olishlari, oʻz qobiliyat va iqtidorlarini amalda namoyon etishlari uchun barcha zarur sharoitlar, imkoniyatlar yaratilgan. Mamlakat rahbaridan tortib, quyi boʻgʻin rahbarlarigacha yoshlar hayotiga oid muammolarni oʻrganish, mavjud muammolarni joylariga chiqqan holda ijobiy hal etishga koʻmaklashish maqsadida oʻtkazilayotgan yoshlar bilan uchrashuvlar, davra suhbatlari samimiy muloqot maydoniga aylanmoqda.

23-mart kuni Amudaryo tumani Olmazor mahallasining maʼmuriy binosida boʻlib oʻtgan uchrashuvda tuman hokimi Sultonboy Yoʻldashev, tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismailov hamda mahallaning faol yoshlari ishtirok etishdi.

Tuman Xalq qabulxonasi boʻlimi mudiri Erkin Rajabov yoshlar uchun imkoniyatlar koʻlami nihoyatda keng ekanligini, bu imkoniyatlardan faqatgina toʻlaqonli ravishda foydalanib, Vatan ravnaqiga hissa qoʻshish lozimligini aytib oʻtdi.

Tuman hokimi Sultonboy Yoʻldashev joriy yilning 30-aprel kuni boʻlib oʻtadigan umumxalq referendumida barcha yoshlarni faol ishtirok etishga chorlab, mazkur siyosiy jarayonning ahamiyati toʻgʻrisida oʻz fikrlarini bildirib oʻtdi. Shuningdek, uchrashuvda yoshlarning bandligini taʼminlash, qoʻshimcha ish oʻrinlarini yaratish, yosh tadbirkorlar safini kengaytirishga qaratilgan muhim chora-tadbirlar belgilanib, shu asosida olib borilayotgani qayd etib oʻtildi.

Shundan soʻng Yoshlar ishlari agentligi tuman boʻlimi boshligʻi Sardor Ismailov yoshlarning murojaatlari imkon qadar bartaraf etilishiini aytib, tumanimizning chekka hududlarida istiqomat qiluvchi yoshlarning muammolari ham sayyor qabul tarzida koʻrib chiqilayotganligini va hech bir murojaat eʼtibordan chetda qolmasligini taʼkidladi.

Tuman hokimi bilan boʻlib oʻtgan uchrashuvda yoshlarning muammo va takliflaridan iborat murojaatlari tinglandi.

Jumladan, mahalla hududida istiqomat qiluvchi faol yoshlardan biri Shahzod Ibodullayev haydovchilik guvohnomasini olish uchun oʻquv kursi xarajatlarini qoplab berilishida, Farida Abdullayeva, Sevara Murodova, Dinora Qurboniyozova, Shohista Sobirovalar esa kontrakt toʻlovining bir qismi toʻlab berilishida amaliy yordam soʻrab murojaat qildilar.

Aksariyat murojaatlar shu yerning oʻzida qanoatlantirilib, qolganlari tez kunda ijobiy hal qilinishi maʼlum qilindi.

Shu oʻrinda aytish kerakki, bugun yoshlar yaratilayotgan har bir imkoniyatdan unumli foydalanishga intilmoqda. Uchrashuv davomida berilgan savollar va bildirilan muammolardan ham bilsa boʻladiki, bugun har bir oʻgʻil-qizning oʻz rejalari va maqsadlari bor. Chunki, davlatimiz tomonidan olib borilayotgan yoshlar siyosati ularni yanada ilhomlantirmoqda.

Tuman hokimligining Axborot xizmati.