АМУДАРЁДА УЧ АВЛОД ВАКИЛЛАРИ УЧРАШДИ
Ҳақиқий баҳор тантанаси бошланган шукуҳли кунларнинг бири – 27 март куни Амударё туманида тарих, бугун ва келажакни ўзида ифода этадиган “Уч авлод учрашуви” маънавий-маърифий тадбири ўтказилди.
Учрашувнинг дастлабки қисми Олмазор маҳалласидаги Хотира майдонида ташкиллаштирилди. Байрамона безатилган майдонга туманимизнинг турли ҳудудларидан келган кекса авлод вакиллари, маҳалла ва овуллар фаоллари, ёшлар, жами 200 нафардан зиёд фуқаролар жойлашдилар. Экранда ҳудудимизда амалга оширилаётган бунёдкорлик ишлари, уларда турли миллат вакилларининг иштирокини акс эттирувчи лавҳалар киши эътиборини тортади.
Тадбирда асосан ўзининг босиб ўтган ҳаёт йўли билан замондошларига ибрат бўладиган, Иккинчи жаҳон уруши даврида ёшлиги ўтган, фронт ортида меҳнат қилган, ўзининг меҳнати билан қадр топган, давлатимизнинг кўплаб мукофотлари билан тақдирланган нуронийлар ва ўрта авлод вакиллари, ўқишда, ишда ва спортда катта ютуқларга эришган ёшлар қатнашдилар.
Хотира майдонида халқ таълими бўлимига қарашли мактаблар томонидан тайёрланган миллатлараро тотувликни, Ўзбекистондаги ўзбек, қорақалпоқ, қозоқ, туркман, рус, корейс миллатларининг маданияти, урф-одатлари, куй-қўшиқлари, кийиниши ва бошқалари акс эттирилган кўргазмалар намойишини барча қизиқиб томоша қилди.
Тадбирда кекса авлод вакилларининг ўқишда ва ишда катта ютуқларга эришган ёшлар билан учрашуви жуда ҳаяжонли бўлди. Мудофаага кўмаклашувчи “Ватанпарвар” ташкилотининг спорт-техника клуби техникалари ва спортчилари фаолияти, туманимизнинг иқтидорли ёшлари вакиллари, Зулфия номидаги давлат мукофоти, “Ёш китобхон оила” кўрик-танлови ғолиблари, спорт соҳасида катта ютуқларга эришган спортчилар ҳамда байналминал жангчилар билан уч авлод вакилларининг танишувлари, мулоқотлари, фикр алмашувлари бўлиб ўтди.
Шундан сўнг, тадбир иштирокчилари Мотамсаро она ҳайкали пойига гулчамбарлар, гуллар қўйдилар, туман тарихи музейи билан танишдилар.
Учрашув “Гулзор” маҳалласидаги “Шер” тўйхонасида давом этди. Тадбирда туман Маҳалла ва нуронийларни қўллаб-қувватлаш бўлими ҳамда Маданият бўлими томонидан тайёрланган мусиқий дастур намойиш этилди. “Бир пиёла чой устида” давом этган суҳбатда нуронийлар, фаоллар, депутатлар, ўрта авлод ҳамда ёшлар вакиллари сўзга чиқдилар. Тадбир иштирокчиларига туманимизнинг таниқли инсонлари ва уларнинг фаолияти ҳақидаги видеороликлар намойиш қилинди, санъат усталарининг концерт дастури тақдим этилди, байрамона безатилган дастурхонга ош тортилди.
Тадбирда туман ҳокими Султонбой Йўлдашев ҳамда “Нуроний” жамғармаси Қорақалпоғистон Республикаси бўлими бошлиғи Турсунбой Абдижаббаров қатнашдилар ва нутқ сўзладилар.
Шунингдек, тадбирда бир гуруҳ меҳнат фахрийларига, якка-ёлғиз ва ижтимоий ҳимояга муҳтож кекса авлод вакилларига “Нуроний” жамғармаси Қорақалпоғистон Республикаси бўлими ҳамда туман ҳокимлиги томонидан тайёрланган пул маблағлари ва совғалар берилди.
“Янги Ўзбекистонда эл азиз, инсон азиз” шиори остида ўтказилган маънавий-маърифий тадбир барчада улкан таассуротлар қолдирди.
Ойгул РАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
