AMUDARYoDA UCh AVLOD VAKILLARI UChRAShDI

Haqiqiy bahor tantanasi boshlangan shukuhli kunlarning biri – 27-mart kuni Amudaryo tumanida tarix, bugun va kelajakni oʻzida ifoda etadigan “Uch avlod uchrashuvi” maʼnaviy-maʼrifiy tadbiri oʻtkazildi.

Uchrashuvning dastlabki qismi Olmazor mahallasidagi Xotira maydonida tashkillashtirildi. Bayramona bezatilgan maydonga tumanimizning turli hududlaridan kelgan keksa avlod vakillari, mahalla va ovullar faollari, yoshlar, jami 200 nafardan ziyod fuqarolar joylashdilar. Ekranda hududimizda amalga oshirilayotgan bunyodkorlik ishlari, ularda turli millat vakillarining ishtirokini aks ettiruvchi lavhalar kishi eʼtiborini tortadi.

Tadbirda asosan oʻzining bosib oʻtgan hayot yoʻli bilan zamondoshlariga ibrat boʻladigan, Ikkinchi jahon urushi davrida yoshligi oʻtgan, front ortida mehnat qilgan, oʻzining mehnati bilan qadr topgan, davlatimizning koʻplab mukofotlari bilan taqdirlangan nuroniylar va oʻrta avlod vakillari, oʻqishda, ishda va sportda katta yutuqlarga erishgan yoshlar qatnashdilar.

Xotira maydonida xalq taʼlimi boʻlimiga qarashli maktablar tomonidan tayyorlangan millatlararo totuvlikni, Oʻzbekistondagi oʻzbek, qoraqalpoq, qozoq, turkman, rus, koreys millatlarining madaniyati, urf-odatlari, kuy-qoʻshiqlari, kiyinishi va boshqalari aks ettirilgan koʻrgazmalar namoyishini barcha qiziqib tomosha qildi.

Tadbirda keksa avlod vakillarining oʻqishda va ishda katta yutuqlarga erishgan yoshlar bilan uchrashuvi juda hayajonli boʻldi. Mudofaaga koʻmaklashuvchi “Vatanparvar” tashkilotining sport-texnika klubi texnikalari va sportchilari faoliyati, tumanimizning iqtidorli yoshlari vakillari, Zulfiya nomidagi davlat mukofoti, “Yosh kitobxon oila” koʻrik-tanlovi gʻoliblari, sport sohasida katta yutuqlarga erishgan sportchilar hamda baynalminal jangchilar bilan uch avlod vakillarining tanishuvlari, muloqotlari, fikr almashuvlari boʻlib oʻtdi.

Shundan soʻng, tadbir ishtirokchilari Motamsaro ona haykali poyiga gulchambarlar, gullar qoʻydilar, tuman tarixi muzeyi bilan tanishdilar.

Uchrashuv “Gulzor” mahallasidagi “Sher” toʻyxonasida davom etdi. Tadbirda tuman Mahalla va nuroniylarni qoʻllab-quvvatlash boʻlimi hamda Madaniyat boʻlimi tomonidan tayyorlangan musiqiy dastur namoyish etildi. “Bir piyola choy ustida” davom etgan suhbatda nuroniylar, faollar, deputatlar, oʻrta avlod hamda yoshlar vakillari soʻzga chiqdilar. Tadbir ishtirokchilariga tumanimizning taniqli insonlari va ularning faoliyati haqidagi videoroliklar namoyish qilindi, sanʼat ustalarining kontsert dasturi taqdim etildi, bayramona bezatilgan dasturxonga osh tortildi.

Tadbirda tuman hokimi Sultonboy Yoʻldashev hamda “Nuroniy” jamgʻarmasi Qoraqalpogʻiston Respublikasi boʻlimi boshligʻi Tursunboy Abdijabbarov qatnashdilar va nutq soʻzladilar.

Shuningdek, tadbirda bir guruh mehnat faxriylariga, yakka-yolgʻiz va ijtimoiy himoyaga muhtoj keksa avlod vakillariga “Nuroniy” jamgʻarmasi Qoraqalpogʻiston Respublikasi boʻlimi hamda tuman hokimligi tomonidan tayyorlangan pul mablagʻlari va sovgʻalar berildi.

“Yangi Oʻzbekistonda el aziz, inson aziz” shiori ostida oʻtkazilgan maʼnaviy-maʼrifiy tadbir barchada ulkan taassurotlar qoldirdi.

Oygul RAJABOVA