АМУДАРЁДА ЯНГИЛАНАЁТГАН КОНСТИТУЦИЯ ТАРҒИБОТИГА БАҒИШЛАНГАН ТАДБИР ЎТКАЗИЛДИ

Амударё туманида Янги Ўзбекистоннинг янгиланаётган Конституцияси тарғиботига бағишланган катта тадбир бўлиб ўтди.

29 март куни туман ҳокимлиги биноси ёнида бўлиб ўтган тадбирда Ўзбекистон Либерал-демократик партияси Сиёсий Кенгаши Ижроия қўмитаси раиси, Ўзбекистон фермер, деҳқон хўжаликлари ва томорқа ер эгалари кенгаши раиси Актам Ҳаитов ҳамда сенатор Баҳодир Тажиевлар қатнашди. Шунингдек, тадбирда Қорақалпоғистон Республикаси Жўқорғи Кенгесига тумандан сайланган депутатлар, халқ депутатлари туман Кенгаши депутатлари, партиялар фаоллари, умумтаълим мактаблари ўқитувчилари, фермерлар, ёшлар вакиллари иштирок этишди.

Тадбирда сўзга чиққан Актам Ҳаитов ҳамда Баҳодир Тажиевлар Бош қомусимизга киритилаётган ўзгартишларнинг мазмун-моҳияти хусусида тушунчалар беришди. Янгиланаётган Конституция юртимизда қонун устуворлигини таъминловчи мустаҳкам хуқуқий пойдевор – келажагимизнинг ишончли кафолати эканлиги ҳақида батафсил сўзлаб, лойиҳани ишлаб чиқишда кенг жамоатчилик, сиёсий партиялар, жамоат ташкилотлари, экспертлик ва илмий доиралар вакиллари, зиёлилар фаол иштирок этганини баён этишди.

Лойиҳа умумхалқ муҳокамаларига қўйилганидан сўнг, 220 мингдан зиёд таклифлар келиб тушгани, ушбу таклифлар ҳам эътиборга олганини айтиб ўтилди. Шунга кўра янгиланаётган Конституция том маънода халқ Конституциясига айлангани эътироф этилди. Шунингдек, Янгиланаётган Конституциянинг Қорақалпоғистон Республикасига тегишли қисми ўзгаришсиз қолдирилгани қайд этиб ўтилди.

Шундан сўнг сўзга чиққан фахрий ўқитувчи Турсунбой Абдуллаев, 82-сонли мактаб директорининг маънавий-маърифий масалалар бўйича ўринбосари Моҳира Юсупова, “Зулфия” номидаги Давлат мукофоти совриндори Барно Самандарова ва бошқалар “Ўзбекистон Республикасининг Конституцияси тўғрисида”ги Қонун умумхалқ референдумида овозга қўйилиши ва референдум жорий йилнинг 30 апрель, якшанба кунига белгилангани, ушбу тарихий ҳодисага бефарқ бўлмасликни айтиб, бошқаларни ҳам овоз беришга чақирди.

Таъкидланганидек, Ўзбекистон Республикасининг амалдаги Конституциясидаги моддалар сони 128 та бўлган бўлса, янги Қомусда уларнинг сони 155 тани ташкил этади, ундаги нормалар эса 275 тадан 434 тага оширилган. Амалдаги Конституциямизнинг 65 фоизига ўзгартириш киритилган. Айтиб ўтилганидек, лойиҳада давлат ёшларнинг шахсий, сиёсий, иқтисодий, ижтимоий, маданий, экологик ҳуқуқлари ҳимоя қилинишини таъминлаши, уларнинг жамият ва давлат ҳаётида фаол иштирок этишини рағбатлантириши алоҳида меъёрлар билан мустаҳкамланган. Унга кўра, юртимизда ёшларнинг интеллектуал, ижодий, жисмоний ва ахлоқий жиҳатдан шаклланиши ҳамда ривожланиши учун, уларнинг таълим олиш, соғлиғини сақлаш, уй-жой, бандлик ва дам олишга бўлган ҳуқуқларини амалга ошириш учун зарур шарт-шароитлар яратилади.

Кўтаринки руҳда ўтган тадбир давомида туман Маданият бўлими хонандалари Ватан, тинчлик ҳақидаги қўшиқларни ижро этиб, иштирокчиларга хуш кайфият улашди.

Тадбирда сўзга чиққанлар барчани 30 апрель куни бўлиб ўтадиган умумхалқ референдумида келажагимиз ва ҳақ-ҳуқуқларимиз кафолати учун овоз беришга чақирди.

Шундан сўнг, масъуллар “Amudaryotex” хорижий корхонасига қарашли ўсимлик ёғ-мой ишлаб чиқариш заводига ташриф буюриб, ишчи-ходимлар билан суҳбатлашишди. Суҳбат давомида завод ишчи-ходимларига Конституциявий қонун лойиҳасида инсон ҳуқуқ ва эркинликлари янада мустаҳкамланганини мисоллар билан тушунтиришди. Янгиланаётган Конституция жонажон Ватанимиз тараққиёти, халқимиз ҳаёти, ҳуқуқ ва манфаатлари, қадр-қимматини таъминлашда муҳим ўрин тутишини айтиб, бўлиб ўтадиган умумхалқ референдумида фаол қатнашишга чақиришди.

Масъуллар 40-сонли умумтаълим мактаби ҳудудида ташкил этилган “Фермерлар боғи”га ҳам ташриф буюришди. Боғда янги экилган мевали дарахт кўчатлари яхши парвариш қилинаётганини кўриб, керакли тавсия ва маслаҳатлар беришди. Шунингдек мактаб педагоглар жамоаси билан ҳам учрашиб, янгиланаётган конституциявий қонун лойиҳасининг 50- ва 52-моддаларида мактаб ва мактабгача таълимни ривожлантириш бўйича қатор ҳуқуқий асослар келтириб ўтилгани, Асосий қонунга киритилаётган ўзгартиришлар билан соҳа ходимларининг конституцион ҳуқуқлари, манфаатлари, мақоми мустаҳкамланишини айтиб ўтишди. Ўз навбатида мазкур ҳуқуқий ўзгартиришларнинг соҳа ривожидаги ўрни хусусида педагогларнинг фикр-мулоҳазалари тингланди. Масъуллар ўқитувчиларни ўз фуқаролик позициясини намоён этган ҳолда референдумда фаол иштирок этишга чақиришди.

Ташриф “Амударё томорқа хизмати” кластерида давом эттирилди. Масъуллар кластердаги иш жараёни билан яқиндан танишди. Корхонага қарашли цехларда тайёрланаётган пишириқ ва нонлар, 750 тонналик сиғимга эга музлатгичда сақланаётган сабзавот ва мева-чева заҳираси, 50 сотихлик иссиқхонада етиштирилаётган сабзавотларни кўриб, тадбиркорликни янада ривожлантириш бўйича ўз таклифлари ва маслаҳатларини беришди ҳамда тадбиркорларни ҳам референдумда фаол иштирок этишга чорлашди.

О.Худойберганова.