AMUDARYoDA YaNGILANAYoTGAN KONSTITUTsIYa TARGʻIBOTIGA BAGʻIShLANGAN TADBIR OʻTKAZILDI

Amudaryo tumanida Yangi Oʻzbekistonning yangilanayotgan Konstitutsiyasi targʻibotiga bagʻishlangan katta tadbir boʻlib oʻtdi.

29-mart kuni tuman hokimligi binosi yonida boʻlib oʻtgan tadbirda Oʻzbekiston Liberal-demokratik partiyasi Siyosiy Kengashi Ijroiya qoʻmitasi raisi, Oʻzbekiston fermer, dehqon xoʻjaliklari va tomorqa yer egalari kengashi raisi Aktam Haitov hamda senator Bahodir Tajiyevlar qatnashdi. Shuningdek, tadbirda Qoraqalpogʻiston Respublikasi Joʻqorgʻi Kengesiga tumandan saylangan deputatlar, xalq deputatlari tuman Kengashi deputatlari, partiyalar faollari, umumtaʼlim maktablari oʻqituvchilari, fermerlar, yoshlar vakillari ishtirok etishdi.

Tadbirda soʻzga chiqqan Aktam Haitov hamda Bahodir Tajiyevlar Bosh qomusimizga kiritilayotgan oʻzgartishlarning mazmun-mohiyati xususida tushunchalar berishdi. Yangilanayotgan Konstitutsiya yurtimizda qonun ustuvorligini taʼminlovchi mustahkam xuquqiy poydevor – kelajagimizning ishonchli kafolati ekanligi haqida batafsil soʻzlab, loyihani ishlab chiqishda keng jamoatchilik, siyosiy partiyalar, jamoat tashkilotlari, ekspertlik va ilmiy doiralar vakillari, ziyolilar faol ishtirok etganini bayon etishdi.

Loyiha umumxalq muhokamalariga qoʻyilganidan soʻng, 220 mingdan ziyod takliflar kelib tushgani, ushbu takliflar ham eʼtiborga olganini aytib oʻtildi. Shunga koʻra yangilanayotgan Konstitutsiya tom maʼnoda xalq Konstitutsiyasiga aylangani eʼtirof etildi. Shuningdek, Yangilanayotgan Konstitutsiyaning Qoraqalpogʻiston Respublikasiga tegishli qismi oʻzgarishsiz qoldirilgani qayd etib oʻtildi.

Shundan soʻng soʻzga chiqqan faxriy oʻqituvchi Tursunboy Abdullayev, 82-sonli maktab direktorining maʼnaviy-maʼrifiy masalalar boʻyicha oʻrinbosari Mohira Yusupova, “Zulfiya” nomidagi Davlat mukofoti sovrindori Barno Samandarova va boshqalar “Oʻzbekiston Respublikasining Konstitutsiyasi toʻgʻrisida”gi Qonun umumxalq referendumida ovozga qoʻyilishi va referendum joriy yilning 30-aprel, yakshanba kuniga belgilangani, ushbu tarixiy hodisaga befarq boʻlmaslikni aytib, boshqalarni ham ovoz berishga chaqirdi.

Taʼkidlanganidek, Oʻzbekiston Respublikasining amaldagi Konstitutsiyasidagi moddalar soni 128 ta boʻlgan boʻlsa, yangi Qomusda ularning soni 155 tani tashkil etadi, undagi normalar esa 275 tadan 434 taga oshirilgan. Amaldagi Konstitutsiyamizning 65 foiziga oʻzgartirish kiritilgan. Aytib oʻtilganidek, loyihada davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini taʼminlashi, ularning jamiyat va davlat hayotida faol ishtirok etishini ragʻbatlantirishi alohida meʼyorlar bilan mustahkamlangan. Unga koʻra, yurtimizda yoshlarning intellektual, ijodiy, jismoniy va axloqiy jihatdan shakllanishi hamda rivojlanishi uchun, ularning taʼlim olish, sogʻligʻini saqlash, uy-joy, bandlik va dam olishga boʻlgan huquqlarini amalga oshirish uchun zarur shart-sharoitlar yaratiladi.

Koʻtarinki ruhda oʻtgan tadbir davomida tuman Madaniyat boʻlimi xonandalari Vatan, tinchlik haqidagi qoʻshiqlarni ijro etib, ishtirokchilarga xush kayfiyat ulashdi.

Tadbirda soʻzga chiqqanlar barchani 30-aprel kuni boʻlib oʻtadigan umumxalq referendumida kelajagimiz va haq-huquqlarimiz kafolati uchun ovoz berishga chaqirdi.

Shundan soʻng, masʼullar “Amudaryotex” xorijiy korxonasiga qarashli oʻsimlik yogʻ-moy ishlab chiqarish zavodiga tashrif buyurib, ishchi-xodimlar bilan suhbatlashishdi. Suhbat davomida zavod ishchi-xodimlariga Konstitutsiyaviy qonun loyihasida inson huquq va erkinliklari yanada mustahkamlanganini misollar bilan tushuntirishdi. Yangilanayotgan Konstitutsiya jonajon Vatanimiz taraqqiyoti, xalqimiz hayoti, huquq va manfaatlari, qadr-qimmatini taʼminlashda muhim oʻrin tutishini aytib, boʻlib oʻtadigan umumxalq referendumida faol qatnashishga chaqirishdi.

Masʼullar 40-sonli umumtaʼlim maktabi hududida tashkil etilgan “Fermerlar bogʻi”ga ham tashrif buyurishdi. Bogʻda yangi ekilgan mevali daraxt koʻchatlari yaxshi parvarish qilinayotganini koʻrib, kerakli tavsiya va maslahatlar berishdi. Shuningdek maktab pedagoglar jamoasi bilan ham uchrashib, yangilanayotgan konstitutsiyaviy qonun loyihasining 50- va 52-moddalarida maktab va maktabgacha taʼlimni rivojlantirish boʻyicha qator huquqiy asoslar keltirib oʻtilgani, Asosiy qonunga kiritilayotgan oʻzgartirishlar bilan soha xodimlarining konstitutsion huquqlari, manfaatlari, maqomi mustahkamlanishini aytib oʻtishdi. Oʻz navbatida mazkur huquqiy oʻzgartirishlarning soha rivojidagi oʻrni xususida pedagoglarning fikr-mulohazalari tinglandi. Masʼullar oʻqituvchilarni oʻz fuqarolik pozitsiyasini namoyon etgan holda referendumda faol ishtirok etishga chaqirishdi.

Tashrif “Amudaryo tomorqa xizmati” klasterida davom ettirildi. Masʼullar klasterdagi ish jarayoni bilan yaqindan tanishdi. Korxonaga qarashli tsexlarda tayyorlanayotgan pishiriq va nonlar, 750 tonnalik sigʻimga ega muzlatgichda saqlanayotgan sabzavot va meva-cheva zahirasi, 50 sotixlik issiqxonada yetishtirilayotgan sabzavotlarni koʻrib, tadbirkorlikni yanada rivojlantirish boʻyicha oʻz takliflari va maslahatlarini berishdi hamda tadbirkorlarni ham referendumda faol ishtirok etishga chorlashdi.

O.Xudoyberganova.