"Бир куни афанди..."
Самимий кулгу. Енгил киноя. Ҳазил-ҳузул. Уларсиз ҳаётимизни тасаввур эта олмаймиз. Кун давомидаги чарчоқ, турли кўнгилсизликлар ва баъзида тушкун кайфиятни кулгу билан енгамиз. Кулсак дилимиз яйрайди, чеҳрамиз ёришади. Позитив кайфиятда юрадиган инсонлардан энергия оламиз.
Кулиш бу- гўзал неъмат. Кулдириш - истеъдоддир. Кулгу ҳақида сўз кетар экан, халқимиз орасида ўзининг самимий латифалари, мутойибалари билан машҳур Насриддин Афанди кўз олдимизга келади. Айнан бугун яъни 1 апрель кунини Афандининг туғилган куни, кулгу куни сифатида нишонлаймиз. Шу кунда самимий ҳазиллар билан бир-биримизни "алдаймиз".
Хўш, ўзи Насриддин Афанди ким? Унинг 1 апрель санаси билан боғлиқлиги борми?
Афанди – туркий халқлар оғзаки ижодидаги образ. Исми Хўжа Насриддин (Афанди лақаби). У ўзбекларда Афанди (Насриддин афанди), туркларда Хожа Насриддин, қозоқларда Хўжа Носир, озарбайжонларда Мулла Насриддиндир. Афанди барча латифаларда мард, тўғри сўз, ҳақиқатгўй, адолатни улуғловчи, камбағал, бева-бечораларнинг ҳомийси, шунингдек шахс ва жамият камчиликлари устидан кулувчи халқ қаҳрамони сифатида гавдаланган. У адолатсиз амалдорлар, қозиларнинг, сўзи билан иши мос келмайдиган руҳонийларнинг кирдикорларини фош этган, уларга бўлган муносабатини енгил мутойиба ёки аччиқ ҳажв орқали ихчам ва образли тарзда ифодалаган. Афанди ҳақидаги халқ ижоди бўлмиш латифалар тўплам ҳолида бир неча бор нашр этилган.
1 апрель. Кулги куни ёки ҳазил куни. Кўп мамлакатларда шу куни одамларни ҳазил қилиб алдаш урфга айланган. АҚШда ҳазил қурбони «апрел аҳмоғи» деб аталади.
Ҳазил куни удуми қаерда бошланганини ҳеч ким билмайди. Баъзи тарихчилар бу одат Францияда бошланган бўлиши мумкин, деб ишонади. У ерда эски янги йил байрами 25 мартдан 1 апрелгача нишонланган ва одамларнинг совға алмашиши билан якунланган. 1560 йилларнинг ўрталарида Қирол Чарлес IX янги йилни 1 январга сурган. Янги йилни шундан кейин ҳам апрелда нишонлаганлар «апрел балиқлари» деб аталган ва уларга ҳазил билан масхаралаб совғалар юборилган.
Аслида кулиш учун 1 апрелни кутиш шарт эмас, биз соғ-саломат уйғонган ҳар бир тонг, эмин-эркин ҳаракатда бўлаётган ҳар бир дақиқамиз бахт. Шундай экан, доимо кулиб юринг!
Интернет материаллари асосида Азиза МАДРАҲИМОВА тайёрлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
