ЭЛДА ЭЪЗОЗЛИ, ФАХРИЙ ШИФОКОР

Тиббиёт соҳасида 50 йилдан бери самарали меҳнат қилиб келаётган олий тоифали уролог-жарроҳ шифокор, Қорақалпоғистонда хизмат кўрсатган тиббиёт ходими Султон Тажиниёзов бу йил 75 ёшга тўлади. Шифокорни дўстлари олдинлари ҳазиллашиб, “Султон доктор – менда касал йўқдир” деб чақиришар эди. Ҳақиқатан унинг олдига келган беморлар ўз дардини унутиб, шифокорнинг амалий ёрдами билан бирга, ширин сўзидан ҳам шифо топиб келмоқда. Соғлом ҳаётга қайтган қанчадан-қанча беморлар ундан жуда миннатдор.

Малакали шифокорнинг соҳада ишлаб келаётганига ҳам мана ярим аср, яъни 50 йил бўлибди.

Шу меҳнат фаолияти давомида Султон Тажиниёзов рентгенолог-уролог, анестезиолог-уролог, шифохона жарроҳлик бўлими бошлиғи, урология бўлими бошлиғи вазифаларида ишлади. Тиббиёт соҳасидаги ўзгаришларга кўра, урология, қулоқ, томоқ бурун касалликлари, травматология, кўз касалликлари бўлимлари ўрнига – шошилинч тез тиббий ёрдам бўлими ташкил қилинди. Ҳозирги кунда шу масканнинг жарроҳлик бўлинмасида катта ординатор вазифасида ўз ишини давом эттириб, эл саломатлиги йўлида хизмат қилмоқда.

У иш фаолияти давомида Тбилиси, Иркутск, Челябинск ва Тошкент шаҳарларидаги клиникаларда малака ошириб, олийгоҳларда таълим олиб, тажриба орттирди.

Шифокор туман Тиббиёт бирлашмасида беморларни даволаш билан бирга жамоат ишларида ҳам фаол бўлди. Бирлашмада касаба уюшмаси раиси вазифасини ҳам бажарди. Бу фидойиликлари учун Султон Тажиниёзов ҳукуматимиз томонидан “Қорақалпоғистонда хизмат кўрсатган тиббиёт ходими” унвони, “Ўзбекистон Республикаси мустақиллигининг 30 йиллиги”, “Ардақлы нураный” кўкрак нишонлари ва қатор “Фахрий ёрлиқ”лар билан тақдирланди.

Султон ака умр йўлдоши раҳматлик Марям опа билан 5 ўғилни юрт корига ярайдиган инсонлар қилиб тарбиялашди. Ҳозир улар бири шифокор, бири тадбиркор, яна бирлари турли ҳунар эгалари бўлиб, ота-оналари каби эзгу ишлари билан эл олқишини олишмоқда.

Ҳозир шифокорнинг 17 нафар невараси бор. Уларнинг тўрт нафари Тошкент шаҳрида турли олийгоҳларда таълим олишмоқда. Невараларидан Фазлиддин – спортчи. У спортнинг каратэ WKF тури бўйича туман, Қорақалпоғистон, Ўзбекистон ва бир қатор халқаро спорт мусобақалари, чемпионатларда қатнашиб, шу кунгача 16 та олтин, 6 та кумуш, 10 бронза медалларни қўлга киритди.

Умрининг 75-баҳорини қарши олаётган фахрий шифокор Султон Тажиниёзов ўзини жуда бахтли инсон деб билади. Унинг яна бир – мўмин-мусулмонлар қатори Ҳаж зиёратини адо этиш ва юртимиздаги тинчликка, тўкин-сочин кунларга шукрона айтиб яшашдек катта орзуси бор. Биз элимизда эътиборли ва эъзозли бўлган нуроний инсон, ҳормай-толмай халқ саломатлиги йўлида хизмат қилиб келаётган тажрибали шифокорнинг шу эзгу орзуси ҳам амалга ошишини, юз ёшлардан ошиб юришини тилаб қоламиз.

Хонимжон РАЖАБОВА,

Ўзбекистон Журналистлар уюшмаси аъзоси.