ELDA EʼZOZLI, FAXRIY ShIFOKOR

Tibbiyot sohasida 50-yildan beri samarali mehnat qilib kelayotgan oliy toifali urolog-jarroh shifokor, Qoraqalpogʻistonda xizmat koʻrsatgan tibbiyot xodimi Sulton Tajiniyozov bu yil 75 yoshga toʻladi. Shifokorni doʻstlari oldinlari hazillashib, “Sulton doktor – menda kasal yoʻqdir” deb chaqirishar edi. Haqiqatan uning oldiga kelgan bemorlar oʻz dardini unutib, shifokorning amaliy yordami bilan birga, shirin soʻzidan ham shifo topib kelmoqda. Sogʻlom hayotga qaytgan qanchadan-qancha bemorlar undan juda minnatdor.

Malakali shifokorning sohada ishlab kelayotganiga ham mana yarim asr, yaʼni 50-yil boʻlibdi.

Shu mehnat faoliyati davomida Sulton Tajiniyozov rentgenolog-urolog, anesteziolog-urolog, shifoxona jarrohlik boʻlimi boshligʻi, urologiya boʻlimi boshligʻi vazifalarida ishladi. Tibbiyot sohasidagi oʻzgarishlarga koʻra, urologiya, quloq, tomoq burun kasalliklari, travmatologiya, koʻz kasalliklari boʻlimlari oʻrniga – shoshilinch tez tibbiy yordam boʻlimi tashkil qilindi. Hozirgi kunda shu maskanning jarrohlik boʻlinmasida katta ordinator vazifasida oʻz ishini davom ettirib, el salomatligi yoʻlida xizmat qilmoqda.

U ish faoliyati davomida Tbilisi, Irkutsk, Chelyabinsk va Toshkent shaharlaridagi klinikalarda malaka oshirib, oliygohlarda taʼlim olib, tajriba orttirdi.

Shifokor tuman Tibbiyot birlashmasida bemorlarni davolash bilan birga jamoat ishlarida ham faol boʻldi. Birlashmada kasaba uyushmasi raisi vazifasini ham bajardi. Bu fidoyiliklari uchun Sulton Tajiniyozov hukumatimiz tomonidan “Qoraqalpogʻistonda xizmat koʻrsatgan tibbiyot xodimi” unvoni, “Oʻzbekiston Respublikasi mustaqilligining 30 yilligi”, “Ardaqli nuraniy” koʻkrak nishonlari va qator “Faxriy yorliq”lar bilan taqdirlandi.

Sulton aka umr yoʻldoshi rahmatlik Maryam opa bilan 5 oʻgʻilni yurt koriga yaraydigan insonlar qilib tarbiyalashdi. Hozir ular biri shifokor, biri tadbirkor, yana birlari turli hunar egalari boʻlib, ota-onalari kabi ezgu ishlari bilan el olqishini olishmoqda.

Hozir shifokorning 17 nafar nevarasi bor. Ularning toʻrt nafari Toshkent shahrida turli oliygohlarda taʼlim olishmoqda. Nevaralaridan Fazliddin – sportchi. U sportning karate WKF turi boʻyicha tuman, Qoraqalpogʻiston, Oʻzbekiston va bir qator xalqaro sport musobaqalari, chempionatlarda qatnashib, shu kungacha 16 ta oltin, 6 ta kumush, 10 bronza medallarni qoʻlga kiritdi.

Umrining 75-bahorini qarshi olayotgan faxriy shifokor Sulton Tajiniyozov oʻzini juda baxtli inson deb biladi. Uning yana bir – moʻmin-musulmonlar qatori Haj ziyoratini ado etish va yurtimizdagi tinchlikka, toʻkin-sochin kunlarga shukrona aytib yashashdek katta orzusi bor. Biz elimizda eʼtiborli va eʼzozli boʻlgan nuroniy inson, hormay-tolmay xalq salomatligi yoʻlida xizmat qilib kelayotgan tajribali shifokorning shu ezgu orzusi ham amalga oshishini, yuz yoshlardan oshib yurishini tilab qolamiz.

Xonimjon RAJABOVA,

Oʻzbekiston Jurnalistlar uyushmasi aʼzosi.