9-СОНЛИ БОЛАЛАР МУСИҚА ВА САНЪАТ МАКТАБИ ЎҚУВЧИЛАРИНИНГ ҲИСОБОТ КОНЦЕРТИ БЎЛИБ ЎТДИ

Ҳар ўқув йили якуни арафасида Амударё туманидаги Болалар мусиқа ва санъат мактабларининг ҳисобот концертларини ташкил этиш анъанага айланган. Концертда ўқувчилар ўзларининг иқтидорларини, йил давомида олган билимлари ва маҳоратларини намойиш этишади.

12 май куни туман Маданият бўлимининг концертлар залида 9-сонли Болалар мусиқа ва санъат мактаби ўқувчиларининг ҳисобот концерти бўлиб ўтди. Концертга 9-сонли Болалар мусиқа ва санъат мактаби ўқитувчи ва ўқувчилари, туман Маданият бўлими масъуллари ва ходимлари, ўқувчиларнинг ота-оналари ва санъат ихлосмандлари ташриф буюришди.

Ушбу концертга “Менинг оилам” газетаси таҳририятининг “Беш муҳим ташаббус – ёшларга қанот” грант лойиҳаси доирасида ногиронлиги бўлган ёшларнинг мусиқа ва санъатга қизиқишини ошириш мақсадида умумтаълим мактабларининг уй шароитида таҳсил олаётган ўқувчилари ҳам жалб этилди.

Концерт давомида 9-сонли Болалар мусиқа ва санъат мактаби ўқувчилари хореография, баян-аккордеон, торли-камонли, пуфлаб чалинадиган чолғулар, халқ чолғулари, анъанавий созандалик, анъанавий ашулачилик йўналишлари бўйича ўз ижроларини тақдим этишди. Шунингдек, анъанавий ижро ва эстрада йўналиши бўйича ижролар, театрлаштирилган саҳна томошалари ҳам томошабинлар эътиборига ҳавола қилинди.

Тадбирни 9-сонли Болалар мусиқа ва санъат мактаби директори Йўлдош Абдалов очиб берди ва юртимизда ёшларнинг таълим олишлари, иқтидорларини юзага чиқаришга қаратилаётган эътибор, яратилаётган имкониятлар хусусида сўзлади. Шунингдек, ушбу мактабда 250 нафардан зиёд ўқувчилар 12 та йўналишларда таълим олишаётгани, уларга 40 нафар ўқитувчилар мусиқа ва санъатдан чуқур таълим бериб, иқтидорларини юксалтиришга интилишаётгани хусусида гапирди.

Мактаб фортепиано, рояль, торли-камонли ва пуфлаб чалинадиган мусиқий асбоблар билан тўлиқ таъминлангани, баян-аккордеон, халқ чолғулари, анъанавий хонандалик, эстрада, тасвирий санъат, хореография, театр санъати йўналишларида таҳсил олаётган ўқувчи-ёшлар орасида нафақат Қорақалпоғистон, балки Ўзбекистон Республикаси миқёсидаги кўрик-танловлар ғолиблари борлигини фахр билан эътироф этиб ўтди.

Ҳисобот концерт дастуридан ўрин олган хореография, баян-аккордеон, торли-камонли, пуфлаб чалинадиган чолғулар, анъанавий ижро ва эстрада йўналишлари ўқувчилари ижросидаги куй-қўшиқ ва дилрабо рақслар томошабинларга хуш кайфият бағишлади.

Театрлаштирилган саҳна томошалари, халқ чолғулари, анъанавий созандалик, анъанавий ашулачилик йўналишлари бўйича ўқувчи-ёшларнинг чиқишлари олқишлар билан кутиб олинди. Айниқса, мактаб ўқитувчилари Дилфуза Раҳимова, Ирода Ендирбоева, Зумрад Мирзаеваларнинг ўқувчилари ижросидаги “Онажоним”, “Итальянская полка”, “Неаполь қўшиғи” куйлари, хореография бўлими ўқитувчиси Қундузой Эшчанованинг ўқувчиси ижросидаги жозибали қорақалпоқча рақс ва театр бўлими ўқувчилари ижросидаги мазмунли саҳна томошаси, ўқувчиларнинг актёрлик маҳорати томошабинларга жуда манзур бўлди.

Ҳисобот концерт дастури якунида ўқишда, жамоат ишларида ва туманда ўтказиладиган маънавий-маърифий тадбирларда фаол иштирок этган ўқувчилар, ўз педагогик фаолияти давомида юқори натижаларга эришган ўқитувчилар, ўқув йили давомида доимий ҳамкорлик қилган ота-оналарга миннатдорчилик билдирилиб, фахрий ёрлиқлар топширилди.

Озода Худойберганова.