Амударё телевидениеси таҳририятининг ташаббуси билан вояга етмаганларнинг ҳуқуқбузарликлар содир этишларига йўл қўймаслик мақсадида назорат тадбири ўтказилди

Юртимизда ўсиб келаётган ёш авлодни маънавий- ахлоқий, жисмоний соғлом қилиб тарбиялаш, уларни барча соҳаларда изчиллик билан татбиқ этилаётган ислоҳотларнинг фаол иштирокчисига айлантиришга қаратилган чора-тадбирлар амалга оширилмоқда. Улар онгига Ватанга содиқлик ва келажаги учун дахлдорлик ҳиссини сингдириш, қалбида ёт ғоя ва қарашларнинг салбий таъсирига нисбатан мафкуравий иммунитетни шакллантиришга ҳисса қўшиш, экстремизм ва терроризмнинг бузғунчи ғояларига нисбатан муросасизликни шакллантириш жуда муҳим.

Ёш авлод таълим-тарбияси мактабгача ва умумий ўрта таълим муассасаларининггина эмас, кенг жамоатчилик, давлат ва нодавлат ташкилотларининг ҳам вазифасидир.

Амударё телевидениеси бунингдек улуғвор мақсад ижросига ҳисса қўшиш мақсадида Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди таъсис этган “Ёшларнинг маънавий-руҳий ва интеллектуал салоҳиятини ошириш” йўналишидаги грант танловида “Юксак маънавиятли ва ахлоқли ёшлар – келажак пойдевори” номли лойиҳаси билан қатнашиб, ғолиб бўлган эди ва айни кунларда лойиҳани муваффақиятли амалга ошириб келмоқда.

Лойиҳа фаолияти бошланганидан бери туманимизнинг турли ҳудудларидаги таълим муассасаларида ва фуқаролар йиғинларида ёшлар тарбиясига оид турли кўрсатувлар, танловлар ўтказиб келинаяпти. Ёшларнинг китобхонликка, санъатга қизиқишларини ошириш учун китоблар кўргазмалари, туманимиздаги Болалар мусиқа ва санъат мактаблари ўқувчиларининг концертлари ташкил этилди ва бу тадбирларга кўплаб ўқувчилар қамраб олинди.

2022-2023 ўқув йили тугалланиши арафасида грант лойиҳаси доирасида тумандаги Қипчоқ шаҳарчаси ҳудудида ўқувчиларнинг таълим-тарбияси, уларнинг сабабсиз дарс қолдиришларининг олдини олиш, мактаб, маҳалла ва ота-оналар ҳамкорлиги масаласи юзасидан ўрганиш олиб борилди. Ҳудуддаги 11 сонли мактабда 934 нафар ўқувчиларга 87 нафар малакали ўқитувчилар таълим-тарбия беришаяпти.

Ўқувчиларнинг билим асосларини чуқур эгаллашлари учун фан тўгараклари, шунингдек, бўш вақтларини самарали ўтказишлари учун ижодий ва спорт тўгараклари мунтазам ишлаб турибди. Таълим- тарбия ишлари эса маҳалла, таълим муассаси ва ота-оналарнинг мустаҳкам ҳамкорлигида амалга оширилмоқда. Режа бўйича ўтказиладиган йиғилишларда улар фаол иштирок этишади.

Бунингдек саъй-ҳаракатлар ўқувчиларнинг интилувчан, одобли ва илмли бўлиб вояга етишига хизмат қилаётир. Ҳар йили ўтказиб келинаётган асосий фанлар олимпиадаларида, кўрик –танловларда ўқувчилар эришаётган ютуқлар буни яққол кўрсатиб турибди.

2021-2022 ўқув йилида мактабни 29 нафар йигит-қизлар битириб чиқишган бўлса, уларнинг 10 нафари турли олийгоҳлар талабалари бўлишди, ўрта таълим муассасаларида касб-ҳунар ўрганаётганлари, корхона, ташкилотларда меҳнат фаолиятини бошлаганлари, олийгоҳларга киришга интилаётганлари ҳам бор. Жорий йилда мактабдан учирма бўлаётган 33 нафар битирувчиларнинг орзулари эса янада юксак.

Шу куни Қипчоқ шаҳарчаси ва Манғит шаҳри ҳудудидаги кўнгилочар масканлар туман Ички ишлар бўлимининг вояга етмаганлар масаласи бўйича катта инспектори, психолог, подполковник Улуғбек Йўлдошев ва бир гуруҳ психологлар ҳамкорлигида вояга етмаганларнинг тунгги вақтларда ота-оналари ёки уларнинг ўрнини босувчи шахслар кузатувисиз юришларига, ҳуқуқбузарликлар содир этишларига йўл қўймаслик мақсадида назорат тадбири ўтказилди.

Тадбир давомида Манғит шаҳрида жойлашган умумий овқатланиш шохобчалари, кафелар ва Манғит истироҳат боғи атрофида вояга етмаганларнинг бемақсад юришларининг олдини олиш мақсадида суҳбатлар олиб борилди.

Туман Ички ишлар бўлимининг вояга етмаганлар масаласи бўйича катта инспектори Улуғбек Йўлдошев ёшларнинг бандлигини таъминлаш, ишсиз ёшларга яратилаётган шароитлар, шунингдек, ўсмирларнинг бўш вақтларини кўнгилли ўтказишлари, салоҳиятларини юксалтиришлари учун ташкил этилган турли тўгараклар, спорт мусобақалари хусусида кенг тушунчалар берди, уларни қизиқтирган саволларга батафсил жавоблар қайтарди.

Боланинг бегонаси бўлмайди. Уларнинг камоли учун кураш эса барчага дахлдор вазифадир.

Ойгул РАЖАБОВА.