МАЪРИФАТПАРВАР ОИЛА

Бугунги кунда бутун дунё глобаллашуви жараёнида бузғунчилик ва қўпорувчилик мазмунидаги, тажовузкор ғояларнинг турли давлатлар тинч ҳаёти ва барқарор тараққиётига салбий таъсири тобора кучаймоқда. Бундай мафкуравий таҳдидиларга қарши курашишда маънавий-ахлоқий тарбия энг таъсирчан ва самарали воситадир.

Таълим-тарбия ҳақида гап кетганида, энг аввало кўз олдимизда болалар ва ўсмирлар билан гавжум мактаблар, уларда шу эл болаларига ўз ўғли, қизидан меҳр билан илм ўргатаётган устозлар келади.

Ҳа, уларнинг юртимизда юксак қадр топаётгани бежиз эмас.

Олмазор маҳалласида истиқомат қилувчи Гулмурза Давумов ва Дилбар Рейимбоеваларни оилавий зиё тарқатувчилар десак, адашмаган бўламиз.

Улар Бухоро Давлат педагогика институтида таҳсил олган дамларида бир-бирига кўнгил қўйишган. Шу боис олийгоҳни тугатгач, Дилбархон Беруний туманидан Манғитга келиб тушди. Улар оилада ҳам, касбий фаолиятида ҳам бир-бирига суянчиқ, ҳаммаслак бўлдилар.

Гулмирза Давумов 1990 йилдан ўқитувчилик фаолиятини бошлаб, дастлаб 1-сонли мактабда, кейинчалик эса Манғит Қишлоқ хўжалик касб-ҳунар коллежида, коллеж тугатилгач эса 40-сонли мактабда чақириққа қадар бошланғич тайёргарлик фани ўқитувчиси бўлиб ишлаб, ўқувчи-ёшлар кўнглида Ватан хизматига камарбасталик, фидойилик туйғуларини шакллантиришга, ҳарбий хизмат – ҳар бир йигитнинг шарафли бурчи эканлигини сингдиришга интилди. Рафиқаси Дилбар Рейимбоева Манғит шаҳридаги 31-сонли мактабда, собиқ 83-сонли мактаб-боғча мажмуасида, 76-сонли мактабда бошланғич таълим ўқитувчиси бўлиб ишлади.

Улар икки йилдирки пенсияга чиқиб, шунча йиллик меҳнатларининг роҳатини кўриб, фарзандлар камолидан қувониб яшашмоқда, тилларидан шукрона тушмайди. Ахир фарзандлар тинч-тотувлиги, бахтиёрлигидан улкан бахт борми ота-она учун?!

Бутун ҳаётини болалар кўнглини илм нури ила чароғон этишга бағишлаган Гулмирза Давумов, Дилбар Рейимоваларнинг аҳил оиласида вояга етган тўнғич қиз Юлдуз Давумова ҳозирги кунда туман йўллардан фойдаланиш унитар корхонасида кадрлар бўлим бошлиғи, Алибек Собиров Манғит шаҳрининг Олмазор маҳалласи ёшлар етакчиси бўлиб ишлайди, кенжатой фарзанд Дилшода эса Тошкент Давлат Аграр институтининг Нукус филиалида ветеринария факультетини тугатган, зоотехник, келини эса нотарис. Ҳаммасининг оиласи тинч-осойишта, бири-биридан ширин 6 нафар неваралар бобо-бувига яна ҳам азиз, қадрли.

Ўқитувчи меҳнати қадрланиб, мавқеи юксалтирилаётгани нафақада бўлишса ҳам уларни жуда қувонтиради. Аслида уларни нафақада дейиш ҳам унчалик тўғри бўлмас. Боиси, кексайдик демай, маҳалла ҳаётида фаол иштирок этилишади, қўни-қўшни, маҳалладош ўғил-қизларга шарқона одоб-ахлоқни сингдиришга интилишади, бирининг ножоиз ишини кўрса, тўғри йўлга солишади.

Тан олиш керак, ўқитувчилик ғоят машаққатли, заҳматли касб. Гулмирза Давумов, Дилбархон Рейимбоевалар ана шундай шарафли касбда ишлаб, элга маърифат улашиб, эъзоз топганлардан.

Биз уларга ҳалол меҳнатларингиз, фарзандлар, неваралар роҳатини кўриб узоқ яшашини тилаб, хайрлашдик.

Ойгул РАЖАБОВА, Равшанбек БАҲРОМОВ.