MAʼRIFATPARVAR OILA

Bugungi kunda butun dunyo globallashuvi jarayonida buzgʻunchilik va qoʻporuvchilik mazmunidagi, tajovuzkor gʻoyalarning turli davlatlar tinch hayoti va barqaror taraqqiyotiga salbiy taʼsiri tobora kuchaymoqda. Bunday mafkuraviy tahdidilarga qarshi kurashishda maʼnaviy-axloqiy tarbiya eng taʼsirchan va samarali vositadir.

Taʼlim-tarbiya haqida gap ketganida, eng avvalo koʻz oldimizda bolalar va oʻsmirlar bilan gavjum maktablar, ularda shu el bolalariga oʻz oʻgʻli, qizidan mehr bilan ilm oʻrgatayotgan ustozlar keladi.

Ha, ularning yurtimizda yuksak qadr topayotgani bejiz emas.

Olmazor mahallasida istiqomat qiluvchi Gulmurza Davumov va Dilbar Reyimboyevalarni oilaviy ziyo tarqatuvchilar desak, adashmagan boʻlamiz.

Ular Buxoro Davlat pedagogika institutida tahsil olgan damlarida bir-biriga koʻngil qoʻyishgan. Shu bois oliygohni tugatgach, Dilbarxon Beruniy tumanidan Mangʻitga kelib tushdi. Ular oilada ham, kasbiy faoliyatida ham bir-biriga suyanchiq, hammaslak boʻldilar.

Gulmirza Davumov 1990-yildan oʻqituvchilik faoliyatini boshlab, dastlab 1-sonli maktabda, keyinchalik esa Mangʻit Qishloq xoʻjalik kasb-hunar kollejida, kollej tugatilgach esa 40-sonli maktabda chaqiriqqa qadar boshlangʻich tayyorgarlik fani oʻqituvchisi boʻlib ishlab, oʻquvchi-yoshlar koʻnglida Vatan xizmatiga kamarbastalik, fidoyilik tuygʻularini shakllantirishga, harbiy xizmat – har bir yigitning sharafli burchi ekanligini singdirishga intildi. Rafiqasi Dilbar Reyimboyeva Mangʻit shahridagi 31-sonli maktabda, sobiq 83-sonli maktab-bogʻcha majmuasida, 76-sonli maktabda boshlangʻich taʼlim oʻqituvchisi boʻlib ishladi.

Ular ikki yildirki pensiyaga chiqib, shuncha yillik mehnatlarining rohatini koʻrib, farzandlar kamolidan quvonib yashashmoqda, tillaridan shukrona tushmaydi. Axir farzandlar tinch-totuvligi, baxtiyorligidan ulkan baxt bormi ota-ona uchun?!

Butun hayotini bolalar koʻnglini ilm nuri ila charogʻon etishga bagʻishlagan Gulmirza Davumov, Dilbar Reyimovalarning ahil oilasida voyaga yetgan toʻngʻich qiz Yulduz Davumova hozirgi kunda tuman yoʻllardan foydalanish unitar korxonasida kadrlar boʻlim boshligʻi, Alibek Sobirov Mangʻit shahrining Olmazor mahallasi yoshlar yetakchisi boʻlib ishlaydi, kenjatoy farzand Dilshoda esa Toshkent Davlat Agrar institutining Nukus filialida veterinariya fakultetini tugatgan, zootexnik, kelini esa notaris. Hammasining oilasi tinch-osoyishta, biri-biridan shirin 6 nafar nevaralar bobo-buviga yana ham aziz, qadrli.

Oʻqituvchi mehnati qadrlanib, mavqei yuksaltirilayotgani nafaqada boʻlishsa ham ularni juda quvontiradi. Aslida ularni nafaqada deyish ham unchalik toʻgʻri boʻlmas. Boisi, keksaydik demay, mahalla hayotida faol ishtirok etilishadi, qoʻni-qoʻshni, mahalladosh oʻgʻil-qizlarga sharqona odob-axloqni singdirishga intilishadi, birining nojoiz ishini koʻrsa, toʻgʻri yoʻlga solishadi.

Tan olish kerak, oʻqituvchilik gʻoyat mashaqqatli, zahmatli kasb. Gulmirza Davumov, Dilbarxon Reyimboyevalar ana shunday sharafli kasbda ishlab, elga maʼrifat ulashib, eʼzoz topganlardan.

Biz ularga halol mehnatlaringiz, farzandlar, nevaralar rohatini koʻrib uzoq yashashini tilab, xayrlashdik.

Oygul RAJABOVA, Ravshanbek BAHROMOV.