МАНҒИТ ШАҲРИДАГИ ФАЙЗЛИ МАСКАН

Ҳозирги замон олимлари инсон ақл-закоси, имкониятлари бизнинг ҳаёт тарзимиздан жуда юқори эканлигини, биз ҳаётда шуларнинг маълум қисмидангина фойдаланишимизни таъкидлайди. Эҳтимол, шундайдир? Ахир ҳаётда ҳеч ким қилмаган лойиҳаларга қўл ураётганлар, турли йўналишларда ҳамма ҳавас қиларлик натижаларга эришаётганлар ҳам бор албатта, дадиллик билан иш бошлаб, эл –юртга хизмат қилаётганларга ҳавасимизни ҳам яширмаймиз.

Туманимизда Манғит Маданият ва истироҳат боғига келиб кўрмаган, у ерда намойиш этиладиган томошаларни кўриб завқланмаган одам топилмаса керак. Айниқса, болажонлар турли байрам кунларида бу ерда бўлишиб, аттракционларда сайр қилишиб, унутилмас таассуротлар олишади. Ҳозирги кунда катта-ю кичик дам олиб, маданий ҳордиқ чиқарадиган яшил табиат қўйнида яратилган ландшафтдан, биохилма-хилликдан завқ оладиган ушбу маданият ва истироҳат боғи ўн беш йилларча аввал экин майдони бўлганлиги ҳам кўпчиликнинг ёдида бўлса керак. Ана шу экин майдонда 2007 йилда тадбиркор аёл Санамжон Нагимова туманимиз аҳолиси учун маданият ва истироҳат боғи барпо этишга киришди. Ва бунинг уддасидан чиқди. 6 гектардан зиёд ҳудудда болалар учун ўйингоҳлар ташкил этиб, безатишга киришди. Ҳар бир томоша ўрнига ўтиш йўлаклари қурилиб, атрофларига турли кўп йиллик дарахтлар, гуллар экилди.

Истироҳат боғида тадбиркор опа 2017 йилда “юрак ютиб” Хитойга ўзи таржимон билан бориб 150 минг доллар ҳисобига харид қилиб келтирган денгиз поезди, карнавал, самолёт, юлдузча, акулага ҳужум, кинотеатр, батут, поезд каби аттракционлар кичкинтойлар сайр қилиб, мароқли дам оладиган, бахтиёр болаликни чуқур ҳис қилиб, завқланадиган воситалардир.

Булардан ташқари истироҳат боғи ҳудуди яхшиллик билан қопланиб, сайр қилган кишига табиат билан уйғунликни сингдира оладиган файзли гўшага айланган.

Атрофи сув билан ўралган замонавий меъморий услубда қурилган амфитеатрдаги фавворалардан тараладиган мусаффолик байрам тадбирлари, юртдошларимизнинг яхши кунлари эсда қоларли ўтишига хизмат қилади. Ёзнинг жазирамасида ҳам соя-салқин, оромбахш бўладиган дам олиш масканини яна ҳам ривожлантириш тадбиркор Санамжон Нагимованинг келгуси орзуларидан.

Туманимизда ягона бўлган ушбу истироҳат боғида шу пайтгача тўйхона сифатида фойдаланиб келинган бино ичида йилнинг ҳамма фаслида одамлар ҳордиқ чиқариб, яшил табиат қўйнида дам оладиган тирик боғ, боғ этагига сувлари оқиб турадиган шаршара бунёд этилади.

Ҳаёт тезкор. Чор-атрофимизда бирон нарсанинг диққатимизни ўзига жалб қилиши қийин. Кундалик турмуш ташвишларидан чарчаган, дам олишни истаган одамлар Манғит маданият ва истироҳат боғига ташриф буюриб албатта, вақтлари кўнгилли ўтади. Шунингдек, ёз-куз ойларида ҳар хил кўнгилочар томошалар ҳам намойиш қилиб турилади. “Қўшаев Раим” хусусий корхонасига қарашли истироҳат боғида 12 нафар ишчи-хизматчилар доимо эл хизматида бўлишади. Яйдоқ дала қўйнида ана шундай оромбахш, болажонлар яйраб-қувнаб дам оладиган масканни бунёд этган интилувчан тадбиркор Санамжон Нагимованинг кейинги ишларига ҳам муваффақиятлар тилаб қоламиз.

Ойгул РАЖАБОВА.