MANGʻIT ShAHRIDAGI FAYZLI MASKAN
Hozirgi zamon olimlari inson aql-zakosi, imkoniyatlari bizning hayot tarzimizdan juda yuqori ekanligini, biz hayotda shularning maʼlum qismidangina foydalanishimizni taʼkidlaydi. Ehtimol, shundaydir? Axir hayotda hech kim qilmagan loyihalarga qoʻl urayotganlar, turli yoʻnalishlarda hamma havas qilarlik natijalarga erishayotganlar ham bor albatta, dadillik bilan ish boshlab, el –yurtga xizmat qilayotganlarga havasimizni ham yashirmaymiz.
Tumanimizda Mangʻit Madaniyat va istirohat bogʻiga kelib koʻrmagan, u yerda namoyish etiladigan tomoshalarni koʻrib zavqlanmagan odam topilmasa kerak. Ayniqsa, bolajonlar turli bayram kunlarida bu yerda boʻlishib, attraktsionlarda sayr qilishib, unutilmas taassurotlar olishadi. Hozirgi kunda katta-yu kichik dam olib, madaniy hordiq chiqaradigan yashil tabiat qoʻynida yaratilgan landshaftdan, bioxilma-xillikdan zavq oladigan ushbu madaniyat va istirohat bogʻi oʻn besh yillarcha avval ekin maydoni boʻlganligi ham koʻpchilikning yodida boʻlsa kerak. Ana shu ekin maydonda 2007-yilda tadbirkor ayol Sanamjon Nagimova tumanimiz aholisi uchun madaniyat va istirohat bogʻi barpo etishga kirishdi. Va buning uddasidan chiqdi. 6 gektardan ziyod hududda bolalar uchun oʻyingohlar tashkil etib, bezatishga kirishdi. Har bir tomosha oʻrniga oʻtish yoʻlaklari qurilib, atroflariga turli koʻp yillik daraxtlar, gullar ekildi.
Istirohat bogʻida tadbirkor opa 2017-yilda “yurak yutib” Xitoyga oʻzi tarjimon bilan borib 150 ming dollar hisobiga xarid qilib keltirgan dengiz poyezdi, karnaval, samolyot, yulduzcha, akulaga hujum, kinoteatr, batut, poyezd kabi attraktsionlar kichkintoylar sayr qilib, maroqli dam oladigan, baxtiyor bolalikni chuqur his qilib, zavqlanadigan vositalardir.
Bulardan tashqari istirohat bogʻi hududi yaxshillik bilan qoplanib, sayr qilgan kishiga tabiat bilan uygʻunlikni singdira oladigan fayzli goʻshaga aylangan.
Atrofi suv bilan oʻralgan zamonaviy meʼmoriy uslubda qurilgan amfiteatrdagi favvoralardan taraladigan musaffolik bayram tadbirlari, yurtdoshlarimizning yaxshi kunlari esda qolarli oʻtishiga xizmat qiladi. Yozning jaziramasida ham soya-salqin, orombaxsh boʻladigan dam olish maskanini yana ham rivojlantirish tadbirkor Sanamjon Nagimovaning kelgusi orzularidan.
Tumanimizda yagona boʻlgan ushbu istirohat bogʻida shu paytgacha toʻyxona sifatida foydalanib kelingan bino ichida yilning hamma faslida odamlar hordiq chiqarib, yashil tabiat qoʻynida dam oladigan tirik bogʻ, bogʻ etagiga suvlari oqib turadigan sharshara bunyod etiladi.
Hayot tezkor. Chor-atrofimizda biron narsaning diqqatimizni oʻziga jalb qilishi qiyin. Kundalik turmush tashvishlaridan charchagan, dam olishni istagan odamlar Mangʻit madaniyat va istirohat bogʻiga tashrif buyurib albatta, vaqtlari koʻngilli oʻtadi. Shuningdek, yoz-kuz oylarida har xil koʻngilochar tomoshalar ham namoyish qilib turiladi. “Qoʻshayev Raim” xususiy korxonasiga qarashli istirohat bogʻida 12 nafar ishchi-xizmatchilar doimo el xizmatida boʻlishadi. Yaydoq dala qoʻynida ana shunday orombaxsh, bolajonlar yayrab-quvnab dam oladigan maskanni bunyod etgan intiluvchan tadbirkor Sanamjon Nagimovaning keyingi ishlariga ham muvaffaqiyatlar tilab qolamiz.
Oygul RAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
