ЎЙЛАМАЙ ҚИЛИНГАН ИШ – КЕЛТИРДИ ТАШВИШ
Инсон ҳаёти учун хавфли бўлган қуроллар кўп. Ҳатто иш қуролларининг айрим турлари, агар эгаси жоҳилликка берилса, ўта хавфли қуролга айланади. Ўқ отар қуроллари эса ўз номи билан энг хавфли совуқ қуролдир.
Бу ҳақда Хуррам Бобоев (исм-шарифлар ўзгартирилди) марҳум отасидан жуда кўп марта эшитган. Чунки табиатан овчиликка қизиқувчан отаси Юсуфбой Бобоев (исм-шарифлар ўзгартирилди) уйида ов милтиғини сақлар, уни эҳтиёт чораси сифатида болаларининг қўли етмайдиган жойга осиб қўярди. Фарзандларига бу қуролга зинҳор тегмасликни тайинларди.
Отаси оламдан ўтгач, Хуррам бу совуқ қуролга қизиқиб қолди. Шайтон измига кирибми, ҳар ҳолда ўзича би-и-ир ов қилиш истагида, тўғрироғи, 2023 йилнинг 14 март санасида марҳум отаси Юсуф Бобоевга тегишли бўлган “ТОЗ” русумли, 1 стволли, 16 калибрли L-50496 рақамли ов милтиғи ва 1 дона 16 калибрли патрони билан яқин ердаги ўрмон хўжалиги ҳудудида ов қилишга қарор қилди. Шу мақсадда елкасига милтиқни осиб, ўрмон хўжалиги ҳудудига кирганида ҳуқуқни муҳофаза қилиш органи ходимлари томонидан қўлга олинди.
Ўтказилган суд-баллистик экспертизасининг 2023 йил, 18 мартдаги 38-сонли хулосасига кўра, Хуррам Бобоевнинг ов милтиғи яроқли эканлиги, қолаверса, марҳум отаси Юсуф Бобоевга тегишли бўлган L-50496 рақамли мазкур ов милтиғи 2023 йилнинг 12 март санасидан бери ноқонуний равишда, яширин сақлаб келинаётгани аниқланди ва мусодара этилди.
Мазкур иш бўйича тўпланган ашёвий далиллар, гувоҳларнинг кўрсатмалари билан тўлиқ тасдиқланиб, жиноят ишлари бўйича Амударё туман судида кўриб чиқилди ва Хуррам Бобоев қилмишига яраша тегишли жазога ҳукм этилди.
Шунинг учун айтадилар-да, ўйламай қилинган иш – келтирар ташвиш, деб. Хуррам Бобоев ҳам “бир марта ов қилиб кўрсам-у хуморимни боссам”, дея ўйламай ташлаган қадамининг жабрини тортишга мажбур бўлди.
Асқар САФАРОВ, Жиноят ишлари бўйича Амударё туман судининг раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
