OʻYLAMAY QILINGAN ISh – KELTIRDI TAShVISh

Inson hayoti uchun xavfli boʻlgan qurollar koʻp. Hatto ish qurollarining ayrim turlari, agar egasi johillikka berilsa, oʻta xavfli qurolga aylanadi. Oʻq otar qurollari esa oʻz nomi bilan eng xavfli sovuq quroldir.

Bu haqda Xurram Boboyev (ism-shariflar oʻzgartirildi) marhum otasidan juda koʻp marta eshitgan. Chunki tabiatan ovchilikka qiziquvchan otasi Yusufboy Boboyev (ism-shariflar oʻzgartirildi) uyida ov miltigʻini saqlar, uni ehtiyot chorasi sifatida bolalarining qoʻli yetmaydigan joyga osib qoʻyardi. Farzandlariga bu qurolga zinhor tegmaslikni tayinlardi.

Otasi olamdan oʻtgach, Xurram bu sovuq qurolga qiziqib qoldi. Shayton izmiga kiribmi, har holda oʻzicha bi-i-ir ov qilish istagida, toʻgʻrirogʻi, 2023-yilning 14-mart sanasida marhum otasi Yusuf Boboyevga tegishli boʻlgan “TOZ” rusumli, 1 stvolli, 16 kalibrli L-50496 raqamli ov miltigʻi va 1 dona 16 kalibrli patroni bilan yaqin yerdagi oʻrmon xoʻjaligi hududida ov qilishga qaror qildi. Shu maqsadda yelkasiga miltiqni osib, oʻrmon xoʻjaligi hududiga kirganida huquqni muhofaza qilish organi xodimlari tomonidan qoʻlga olindi.

Oʻtkazilgan sud-ballistik ekspertizasining 2023-yil, 18-martdagi 38-sonli xulosasiga koʻra, Xurram Boboyevning ov miltigʻi yaroqli ekanligi, qolaversa, marhum otasi Yusuf Boboyevga tegishli boʻlgan L-50496 raqamli mazkur ov miltigʻi 2023-yilning 12-mart sanasidan beri noqonuniy ravishda, yashirin saqlab kelinayotgani aniqlandi va musodara etildi.

Mazkur ish boʻyicha toʻplangan ashyoviy dalillar, guvohlarning koʻrsatmalari bilan toʻliq  tasdiqlanib, jinoyat ishlari boʻyicha Amudaryo tuman sudida koʻrib chiqildi va Xurram Boboyev qilmishiga yarasha tegishli jazoga hukm etildi.

Shuning uchun aytadilar-da, oʻylamay qilingan ish – keltirar tashvish, deb. Xurram Boboyev ham “bir marta ov qilib koʻrsam-u xumorimni bossam”, deya oʻylamay tashlagan qadamining jabrini tortishga majbur boʻldi.

Asqar SAFAROV, Jinoyat ishlari boʻyicha Amudaryo tuman sudining raisi.