Хотин-қизлар фаоли аёлларнинг ҳақиқий кўмакчисига айланган

Овул ва маҳаллаларда хотин-қизлар фаоли лавозими жорий этилганига бир йилдан ошиғроқ вақт бўлди. Шу давр мобайнида Амударё туманидаги ижтимоий ҳимояга муҳтож, бандлиги таъминланмаган, тадбиркорлик қилиш истагидаги кўплаб хотин-қизларга ёрамлар кўрсатилиб муаммолари ижобий ҳал этилди. Бу борадаги ишларнинг тизимли ва самарали йўлга қўйилишида албатта, маҳаллалардаги хотин-қизлар фаолларининг хизматларини эътироф этмоқ лозимдир.

Амударё тумани марказидан олисроқда жойлашган Хизр эли маҳалла фуқаролар йиғинининг хотин-қизлар фаоли Гулнора Матниязова ҳам ўз фаолияти давомида хонадонма-хонадон юриб, ҳудуд хотин-қизларининг турмуш тарзи, турли ёш тоифасидаги аёлларни қийнаб келаётган муаммоларни ўрганган ҳолда ёрдамлар кўрсатиб келмоқда.

Маҳаллада жорий йил бошидан “Аёллар дафтарига” 107 нафар аёллар қамраб олинди. Ушбу аёлларга “Аёллар дафтари”га киритиш тоифалари бўйича турли ижтимоий-иқтисодий ёрдамлар кўрсатилди.

Бундан ташқари, хотин–қизлар фаоли Гулнора Матниязова ҳоким ёрдамчиси Анвар Тажибоев билан биргаликда ҳамкорликни самарали тарзда йўлга қўйиб ишсиз аёлларга имтиёзли равишда кредитлар ажратилишига ва бандлиги таъминланишига ҳисса қўшиб келмоқда. Шунингдек, маҳалладаги 11 нафар аёлга ўз эҳтиёжлари учун имтиёзли равишда кредитлар ажратилиб электромотацикллар берилди.

Маҳалла аҳлининг тиниб-тинчимаслиги, меҳнаткашлиги, қолаверса, хотин-қизлар фаолининг ўз касбига фидоийлиги сабаб шаҳар ҳудудлардаги барча шароитлар шу ернинг ўзида яратилишига эришилган.

Маҳаллада истиқомат қилувчи Дилбар Хўжанова “Хизир эли ширинликлари” номи остида нон ва қандолат цехини очиб ўзининг тадбиркорлик фаолиятини йўлга қўйди. Шундан буён маҳалла аҳли ортиқча овворагарчиликдан қутилди. Ўз уйидан бир чақрим ҳам нари кетмай тўй ва базмлар учун нон ва нон маҳсулотларини, ширинликларни шу ернинг ўзидан харид қиладиган бўлди. Тадбиркор аёл аввало ўзининг, қолаверса икки нафар ишсиз келинларини ҳам иш билан таъминлади.

Маҳалладаги ишсиз аёллардан яна бири Дилбар Абуллаева ҳам “Аёллар дафтари”нинг 6-тоифасига киритилган эди. Аёлга 2022 йилнинг декабрь ойида субсидия ажратилиб, 1 сотих томорқа ерига иссиқхона қуриб берилди. Хозирги кунда у иссиқхонадан каттагина даромад олиб келмоқда.

Маҳаллада паррандачилик йўналиши бўйича ҳам ўз тадбиркорлик фаолиятини йўлга қўйган аёллар талайгина. Шулардан бири Ҳайитжон Жумашевадир. Унга хотин-қизлар фаолининг кўмаги билан 5 млн. сўм миқдорида пул маблағи ажратилди. У бу маблағ эвазига ўз уйида инкубация ташкил қилиб, маҳалладошларини парранда гўшти ва тухуми билан таъминлаб келмоқда.

Хизр эли маҳалласида аёллар учун гўзаллик салони йўқлиги хотин-қизлар фаолини қийнаб келарди. Бу соҳага қизиқиши кучли бўлган маҳалладоши Моҳира Шамуродова билан яқиндан суҳбатлашиб, гўзаллик салони очишига ёрдам берди. Моҳира Шамуродовага ҳоким ёрдамчиси Анвар Тожибаевнинг тавсияномаси ососида 33 млн. сўм имтиёзли кредит ажратилди.

Биз ижодий гуруҳимиз билан бугунги кунда маҳалла аҳли ўз эҳтиёжлари учун шаҳарга бориб келиши шарт эмаслигини, ҳамма шароит ва имкониятлар шу кичик қишлоқнинг ўзида мавжуд эканлигига гувоҳ бўлдик.

Хотин-қизлар фаолининг эса ҳар бир оиланинг дарди ва қувончига шериклиги, ҳар қандай муаммони маҳалланинг ўзида ҳал қилишга интилиши, аёлларнинг муаммоси унинг ҳам муаммоси эканлиги бир кундик иш фаолияти давомида ўз исботини кўрсатди.

Орамизда Гулнора Матниязова сингари ўз касбига фидоий маҳалла тизими ходимлари кўпаяверишига тилакдошмиз!

Туман ҳокимлигининг Ахборот хизмати.