ҚИПЧОҚ ДАВЛАТ ЎРМОН ХЎЖАЛИГИДА МАХСУС-ТАКТИК ЎҚУВ-МАШҒУЛОТИ ЎТКАЗИЛДИ

Жорий йилнинг 8 июнь куни Қозоғистон Республикасининг Абай вилояти ҳудудида йирик ўрмон ёнғинлари содир бўлиб, бугунги кунда 60 минг гектардан ортиқ майдонга тарқалган ёнғинни бартараф этиш учун Қозоғистон Республикаси Фавқулодда вазиятлар вазирлиги ва тегишли хизматларнинг куч ва воситалари жалб қилинган. Содир бўлган ёнғин натижасида фуқароларнинг тан жароҳати олиш ҳамда вафот этиш ҳолатлари аниқланган.

Ўрмонларда ёнғинларнинг келиб чиқишининг асосий сабаблари ёз ойларида ҳаво ҳароратининг кескин кўтарилиши, ўрмонлардаги ўт-ўланларнинг қуриши, яшин уриши ҳамда инсонларнинг табиатга бўлган эътиборсизликларидир.

Қорақалпоғистон Республикаси Фавқулодда вазиятлар бошқармасининг топшириқлари ижросини таъминлаш мақсадида Амударё туманидаги Қипчоқ давлат ўрмон хўжалигида объект раҳбарлар таркиби ва фуқаро муҳофазаси тузилмаларининг “Ўрмон ҳудудида ёнғин содир бўлганда Қипчоқ давлат ўрмон хўжалигининг фуқаро муҳофазаси тузилмалари ва туман Фавқулодда вазиятлар давлат қуйи тузилмаси хизматларининг ҳамкорликдаги ҳаракатлари” мавзусида махсус-тактик ўқув машқи ўтказилди.

Ўқув машқига Қипчоқ давлат ўрмон хўжалиги раҳбарлари, ходимлари, туман Фавқулодда вазиятлар бўлими бўлинма бошлиғи капитан Бекзод Тажибаев, туман Фавқулодда вазиятлар давлат қуйи тузилмасининг тегишли хизматлари ва ўқув машқи мавзусига алоқадор соҳалар ходимлари иштирок этди.

Тадбирдан кўзланган мақсад – ўрмон ҳудудида ёнғин содир бўлганда Қипчоқ давлат ўрмон хўжалиги фуқаро муҳофазаси тузилмаларининг амалий ҳаракатларини ва кўникмаларини ошириш, табиий ва техноген тусдаги фавқулодда вазиятлар юзага келганда объект раҳбарлар таркиби ҳамда фуқаро муҳофазаси шахсий таркибнинг тўғри ҳаракат қилиш кўникмаларини такомиллаштиришдир. Ўқув машқи бошқарув органи ва фуқаро муҳофазаси шахсий таркибининг кечиктириб бўлмайдиган ёнғин ўчириш ва қутқарув ишларига тайёргарлигини кучайтириш, фавқулодда вазиятлар юзага келганда фуқаро муҳофазаси шахсий таркибининг ўз мажбуриятларини аниқ ва тўғри бажаришини амалиётда синаш ва ўрганиш, туман фуқаро муҳофазаси хизматларининг ҳамкорликдаги ҳаракатларини такомиллаштириш мақсадида ташкил этилди.

Ўқув машқининг биринчи босқичида Қипчоқ овулидаги Қипчоқ давлат ўрмон хўжалигига қарашли майдонда ёнғинлар билан боғлиқ бўлган фавқулодда вазиятлар рўй берганда объект фуқаро муҳофазаси тузилмасининг тезкорлик билан фавқулодда вазиятни бартараф этиш ҳаракатлари ва туман Фавқулодда вазиятлар давлат қуйи тузилмаси хизматлари билан саф кўриги намойиш этилди.

Иккинчи босқичда эса ўрмон хўжалигида ёнғин содир бўлганда жабрланганларни хавфсиз ҳудудга эса олиб чиқиш ва биринчи тиббий ёрдам кўрсатиш ҳамда ёнғинни бартараф этиш машқи бажарилди.

Ўқув машқига жами 59 нафар шахсий таркиб ва 11 та махсус техникалар жалб қилинди.

Қипчоқ давлат ўрмон хўжалиги фуқаро муҳофазаси тузилмалари гуруҳлари шахсий таркиби фавқулодда вазиятларда ҳаракат қилишга “Чекланган тайёр” деб баҳоланди. Махсус тактик ўқув машқи якунида иштирокчиларнинг камчиликлари кўрсатилиб, келгусида уларни бартараф этиш лозимлиги тушунтирилди.

И.ҲОСИЛОВ, туман Фавқулодда вазиятлар бўлими бошлиғи, подполковник.