QIPChOQ DAVLAT OʻRMON XOʻJALIGIDA MAXSUS-TAKTIK OʻQUV-MAShGʻULOTI OʻTKAZILDI

Joriy yilning 8-iyun kuni Qozogʻiston Respublikasining Abay viloyati hududida yirik oʻrmon yongʻinlari sodir boʻlib, bugungi kunda 60 ming gektardan ortiq maydonga tarqalgan yongʻinni bartaraf etish uchun Qozogʻiston Respublikasi Favqulodda vaziyatlar vazirligi va tegishli xizmatlarning kuch va vositalari jalb qilingan. Sodir boʻlgan yongʻin natijasida fuqarolarning tan jarohati olish hamda vafot etish holatlari aniqlangan.

Oʻrmonlarda yongʻinlarning kelib chiqishining asosiy sabablari yoz oylarida havo haroratining keskin koʻtarilishi, oʻrmonlardagi oʻt-oʻlanlarning qurishi, yashin urishi hamda insonlarning tabiatga boʻlgan eʼtiborsizliklaridir.

Qoraqalpogʻiston Respublikasi Favqulodda vaziyatlar boshqarmasining topshiriqlari ijrosini taʼminlash maqsadida Amudaryo tumanidagi Qipchoq davlat oʻrmon xoʻjaligida obʼekt rahbarlar tarkibi va fuqaro muhofazasi tuzilmalarining “Oʻrmon hududida yongʻin sodir boʻlganda Qipchoq davlat oʻrmon xoʻjaligining fuqaro muhofazasi tuzilmalari va tuman Favqulodda vaziyatlar davlat quyi tuzilmasi xizmatlarining hamkorlikdagi harakatlari” mavzusida maxsus-taktik oʻquv mashqi oʻtkazildi.

Oʻquv mashqiga Qipchoq davlat oʻrmon xoʻjaligi rahbarlari, xodimlari, tuman Favqulodda vaziyatlar boʻlimi boʻlinma boshligʻi kapitan Bekzod Tajibayev, tuman Favqulodda vaziyatlar davlat quyi tuzilmasining tegishli xizmatlari va oʻquv mashqi mavzusiga aloqador sohalar xodimlari ishtirok etdi.

Tadbirdan koʻzlangan maqsad – oʻrmon hududida yongʻin sodir boʻlganda Qipchoq davlat oʻrmon xoʻjaligi fuqaro muhofazasi tuzilmalarining amaliy harakatlarini va koʻnikmalarini oshirish, tabiiy va texnogen tusdagi favqulodda vaziyatlar yuzaga kelganda obʼekt rahbarlar tarkibi hamda fuqaro muhofazasi shaxsiy tarkibning toʻgʻri harakat qilish koʻnikmalarini takomillashtirishdir. Oʻquv mashqi boshqaruv organi va fuqaro muhofazasi shaxsiy tarkibining kechiktirib boʻlmaydigan yongʻin oʻchirish va qutqaruv ishlariga tayyorgarligini kuchaytirish, favqulodda vaziyatlar yuzaga kelganda fuqaro muhofazasi shaxsiy tarkibining oʻz majburiyatlarini aniq va toʻgʻri bajarishini amaliyotda sinash va oʻrganish, tuman fuqaro muhofazasi xizmatlarining hamkorlikdagi harakatlarini takomillashtirish maqsadida tashkil etildi.

Oʻquv mashqining birinchi bosqichida Qipchoq ovulidagi Qipchoq davlat oʻrmon xoʻjaligiga qarashli maydonda yongʻinlar bilan bogʻliq boʻlgan favqulodda vaziyatlar roʻy berganda obʼekt fuqaro muhofazasi tuzilmasining tezkorlik bilan favqulodda vaziyatni bartaraf etish harakatlari va tuman Favqulodda vaziyatlar davlat quyi tuzilmasi xizmatlari bilan saf koʻrigi namoyish etildi.

Ikkinchi bosqichda esa oʻrmon xoʻjaligida yongʻin sodir boʻlganda jabrlanganlarni xavfsiz hududga esa olib chiqish va birinchi tibbiy yordam koʻrsatish hamda yongʻinni bartaraf etish mashqi bajarildi.

Oʻquv mashqiga jami 59 nafar shaxsiy tarkib va 11 ta maxsus texnikalar jalb qilindi.

Qipchoq davlat oʻrmon xoʻjaligi fuqaro muhofazasi tuzilmalari guruhlari shaxsiy tarkibi favqulodda vaziyatlarda harakat qilishga “Cheklangan tayyor” deb baholandi. Maxsus taktik oʻquv mashqi yakunida ishtirokchilarning kamchiliklari koʻrsatilib, kelgusida ularni bartaraf etish lozimligi tushuntirildi.

I.HOSILOV, tuman Favqulodda vaziyatlar boʻlimi boshligʻi, podpolkovnik.