“Ёшлар дафтари”га киритилган ёшларга зарур ускуналар олиб берилди

“Темир дафтар”, “Аёллар дафтари”, “Ёшлар дафтари”, “Меҳр дафтари” дея номланган ижтимоий ҳимоя дафтарлари ҳаётга татбиқ этилиши билан эҳтиёжманд, кам таъминланган оилалар, ижтимоий кўмакка муҳтож хотин­-қизлар ва ёшлар турмуш тарзида туб ўзгаришлар юз берганига барчамиз гувоҳмиз.

Амударё туманида ҳам ёшлар манфаатини ҳимоя қилиш, орзу-умидлари, иқтидор ва салоҳиятини рўёбга чиқариш, уларни тадбиркорликка ўргатиш, касбий малакасини ошириш орқали бандлигини таъминлашга катта эътибор қаратиб келинмоқда. Айниқса, “Ёшлар дафтари”га киритилган ёшларни манзилли қўллаб-қувватлаш, ижтимоий-иқтисодий кўмак кўрсатиш мақсадида амалга оширилаётган саъй-ҳаракатлар ўзининг ижобий натижасини бериб келмоқда.

8 июль куни туман ҳокимлиги биноси олдида “Ёшлар дафтари”га киритилган 47 нафар ёшларга тадбиркорлик фаолиятини бошлаш ва ўзини ўзи банд қилишга кўмаклашиш мақсадида касбий кўникма ва малакасига қараб харид қилинган асбоб-ускуналар тантанали равишда топширилди.

Тадбирда туман ҳокими Султонбой Йўлдашев, 3-сектор раҳбари, туман Ички ишлар бўлими бошлиғи Жамаладдин Юсупов, туман ҳокими ўринбосари Маҳмуд Шерметов, Камбағалликни қисқартириш ва бандлик бўлими бошлиғи Ғуломжон Дуйсенбаев, Ёшлар ишлари агентлиги туман бўлими бошлиғи Сардор Исмаиловлар ҳам иштирок этишди.

Туман ҳокими Султонбой Йўлдашев мамлакатимизда ёшларни қўллаб-қувватлаш мақсадида амалга оширилаётган ислоҳотлар, улар учун яратилаётган кенг имкониятлар ҳақида тўхталиб ўтди. Ёшларни ўз устида кўпроқ ишлаши, танлаган касбини пухта эгаллаб Ватанимиз корига ярайдиган муносиб фарзанд бўлишлари лозимлигини таъкидлади.

3-сектор раҳбари – туман Ички ишлар бўлими бошлиғи Жамаладдин Юсупов ўз касби учун зарурий асбоб-ускуна эгалари бўлаётган ёшларни табриклади. Келажакда ушбу асбсоб-ускуналар уларнинг яхши кунларида хизмат қилишини айтиб келгусидаги ишларига муваффақиятлар тилади.

Туман ҳокими ўринбосари Маҳмуд Шерметов мамлакатимизда аҳолининг ижтимоий ҳимояга муҳтож қатламини қўллаб-қувватлаш, уларнинг иш билан бандлигини таъминлаш, янги иш ўринларини яратиш, айниқса, уюшмаган ёшларнинг муаммоларини ҳал этиш борасида белгиланган чора-тадбир, устувор вазифаларга батафсил тўхталиб ўтди.

Камбағалликни қисқартириш ва бандлик бўлими бошлиғи Ғуломжон Дуйсенбаев “Ёшлар дафтари” рўйхатига киритилган ёшлар билан манзилли ишлаш бўйича эришилаётган ютуқлар, кўплаб ёшларнинг ўзини-ўзи банд қилиш тамойили асосида иш юритиб, оиласи фаровонлигига ҳисса қўшаётганлигини эътироф этди.

Тадбирда “Ёшлар дафтари” рўйхатига киритилган ёшлар туман ҳокимлиги ва Ёшлар ишлари агентлиги туман бўлимига ўзларига кўрсатилаётган беғараз ёрдамлар учун миннатдорлик билдиришиб, бундан кейин самарали фаолият юритажакларини ва албатта, Ватанимиз тараққиёти ҳамда халқимиз турмушининг янада фаровон бўлишига ҳисса қўшишларини айтиб ўтдилар.

Туман ҳокимлигининг Ахборот хизмати.