Ўтган 6 ойда туман Давлат хизматлари маркази ва Ягона интерактив давлат хизматлари портали орқали жисмоний ва юридик шахсларга 39 минг 632та давлат хизматлари кўрсатилди

Сир эмаски, кейинги йилларда давлат хизматлари марказлари “бир дарча” тамойили асосида кўплаб хизматларни йўлга қўйгани билан аҳоли ва тадбиркорларга катта қулайликлар яратмоқда. Давлат хизматлари маркази давлат хизматларини тақдим этишнинг янгича кўриниши бўлиб, ортиқча ва кераксиз қадамлар сонини камайтиришда ёрдам беради. Соҳани аҳолига янада яқинлаштириш, кўрсатилаётган хизматлар сифатини ва ҳажмини ошириш мақсадида 2022 йил 20 апрель куни “Давлат хизматлари кўрсатишни соддалаштириш, бюрократик тўсиқларни қисқартириш ҳамда давлат хизматлари кўрсатиш миллий тизимини ривожлантиришнинг қўшимча чора-тадбирлари тўғрисида”ги Президент Фармони қабул қилинди.

Фармон билан “Давлат хизматлари кўрсатиш тизимини модернизация қилиш ва жадал ривожлантиришнинг 2022-2026 йилларга мўлжалланган миллий стратегияси” тасдиқланди. Стратегия давлат хизматларини кўрсатишнинг жорий ҳолати ва хорижий мамлакатларнинг ушбу соҳадаги энг яхши тажрибаларини ҳисобга олган ҳолда, “Давлат хизматларини кўрсатишда фуқаро эътибор марказида” тамойили асосида тизимни модернизация қилиш ва жадал ривожлантиришнинг мақсадлари, вазифалари ва устувор йўналишларини белгилайди.

Амударё тумани Давлат хизматлари марказида ҳам мазкур Стратегияни амалиётга татбиқ қилиш борасида салмоқли ишлар амалга оширилмоқда.

Биргина 2023 йилнинг ўтган 6 ойи давомида туман Давлат хизматлари маркази ва Ягона интерактив давлат хизматлари портали орқали жисмоний ва юридик шахсларга 39 минг 632та давлат хизматлари кўрсатилди. Шу жумладан, 277та юридик корхоналар, 522та якка тартибдаги тадбиркорлар янгидан давлат рўйхатидан ўтказилди. Шунингдек, марказ томонидан кўрсатилган сайёр тартибдаги давлат хизматлари сони 2 минг 239тани ташкил қилди. Марказнинг тумандан олисдаги – Хитой филиали орқали эса 1736та давлат хизмати кўрсатилди.

Давлат хизматлари марказида жисмоний ва юридик шахсларга хизмат кўрсатиш намунали йўлга қўйилган. Марказда мурожаатчилар учун етарлича шароитлар яратилган бўлиб, жисмоний ва юридик шахсларга кўрсатиладиган давлат хизматлари сони ой сайин ортиб, такомиллашиб бормоқда. Шунингдек, ташриф буюрувчиларга ўз-ўзига хизмат кўрсатишнинг турли хил имкониятлари тўғрисида маълумот берувчи ахборот стендлари ва плакатлар ўрнатилган.

Давлат хизматлари марказларининг устун жиҳатлари кўп. Мазкур тизим орқали аҳоли ва ташкилотларга бир қанча давлат ва жамоат хизматлари бир жойда кўрсатилади. Бу эса, ўз навбатида, фуқароларга зарур маълумотлар олиш ва бошқа хизматлардан фойдаланишларида вақтни тежаш баробарида, ортиқча расмиятчилик ҳолатларини қисқартиришга ёрдам беради.

Жорий йилнинг ўтган 6 ойи давомида марказ орқали 8386та электрон рақамли имзо калитлари берилди. Қурилиш-монтаж ишлари тугалланган объектлардан фойдаланиш учун рухсатнома бериш ва кадастр ҳужжатларини расмийлаштириш бўйича 1872та хизматлар кўрсатилди. Ўтган 6 ой давомида кўрсатилган кадастр соҳасига оид хизматлар 3168тани ташкил қилди. Шу билан бирга, болани давлат мактабгача таълим муассасасига жойлаштириш бўйича 3273та хизмат кўрсатилди.

Ҳисобот даврида кўчмас мулк объектларига бўлган ҳуқуқларни давлат рўйхатидан ўтказиш бўйича 2472та хизматлар кўрсатилиб, наркология бўйича диспансер ҳисобида туриши ёки турмаслиги тўғрисида 2277та, руҳий диспансер ҳисобида туриши ёки турмаслиги тўғрисида 2297та, судланмаганлик ёки судланганлик тўғрисида 1383та маълумотномалар берилди.

Аҳолининг ҳаёт даражасини ошириш ва ишбилармонлик муҳитини яхшилаш, бизнесни ривожлантириш мақсадида давлат хизматлари кўрсатишнинг миллий тизимини сифат жиҳатидан янги даражага кўтариш жадал суръатларда амалга оширилмоқда. Давлат хизматлари кўрсатиш марказларининг фаолияти эса бу борадаги саъй-ҳаракатларнинг узвий давомидир.

Бундан кўзланган асосий мақсад – соҳада учрайдиган сунъий тўсиқларни бартараф қилиб, аҳолига қулайликлар яратиш, тадбиркорларнинг иш бошлашидан тортиб фаолияти давомида зарур бўладиган хизматларни бир жойда кўрсатишдан иборат.

Севара ИСМОИЛОВА