Oʻtgan 6 oyda tuman Davlat xizmatlari markazi va Yagona interaktiv davlat xizmatlari portali orqali jismoniy va yuridik shaxslarga 39 ming 632ta davlat xizmatlari koʻrsatildi

Sir emaski, keyingi yillarda davlat xizmatlari markazlari “bir darcha” tamoyili asosida koʻplab xizmatlarni yoʻlga qoʻygani bilan aholi va tadbirkorlarga katta qulayliklar yaratmoqda. Davlat xizmatlari markazi davlat xizmatlarini taqdim etishning yangicha koʻrinishi boʻlib, ortiqcha va keraksiz qadamlar sonini kamaytirishda yordam beradi. Sohani aholiga yanada yaqinlashtirish, koʻrsatilayotgan xizmatlar sifatini va hajmini oshirish maqsadida 2022-yil 20-aprel kuni “Davlat xizmatlari koʻrsatishni soddalashtirish, byurokratik toʻsiqlarni qisqartirish hamda davlat xizmatlari koʻrsatish milliy tizimini rivojlantirishning qoʻshimcha chora-tadbirlari toʻgʻrisida”gi Prezident Farmoni qabul qilindi.

Farmon bilan “Davlat xizmatlari koʻrsatish tizimini modernizatsiya qilish va jadal rivojlantirishning 2022-2026-yillarga moʻljallangan milliy strategiyasi” tasdiqlandi. Strategiya davlat xizmatlarini koʻrsatishning joriy holati va xorijiy mamlakatlarning ushbu sohadagi eng yaxshi tajribalarini hisobga olgan holda, “Davlat xizmatlarini koʻrsatishda fuqaro eʼtibor markazida” tamoyili asosida tizimni modernizatsiya qilish va jadal rivojlantirishning maqsadlari, vazifalari va ustuvor yoʻnalishlarini belgilaydi.

Amudaryo tumani Davlat xizmatlari markazida ham mazkur Strategiyani amaliyotga tatbiq qilish borasida salmoqli ishlar amalga oshirilmoqda.

Birgina 2023-yilning oʻtgan 6 oyi davomida tuman Davlat xizmatlari markazi va Yagona interaktiv davlat xizmatlari portali orqali jismoniy va yuridik shaxslarga 39 ming 632ta davlat xizmatlari koʻrsatildi. Shu jumladan, 277ta yuridik korxonalar, 522ta yakka tartibdagi tadbirkorlar yangidan davlat roʻyxatidan oʻtkazildi. Shuningdek, markaz tomonidan koʻrsatilgan sayyor tartibdagi davlat xizmatlari soni 2 ming 239tani tashkil qildi. Markazning tumandan olisdagi – Xitoy filiali orqali esa 1736ta davlat xizmati koʻrsatildi.

Davlat xizmatlari markazida jismoniy va yuridik shaxslarga xizmat koʻrsatish namunali yoʻlga qoʻyilgan. Markazda murojaatchilar uchun yetarlicha sharoitlar yaratilgan boʻlib, jismoniy va yuridik shaxslarga koʻrsatiladigan davlat xizmatlari soni oy sayin ortib, takomillashib bormoqda. Shuningdek, tashrif buyuruvchilarga oʻz-oʻziga xizmat koʻrsatishning turli xil imkoniyatlari toʻgʻrisida maʼlumot beruvchi axborot stendlari va plakatlar oʻrnatilgan.

Davlat xizmatlari markazlarining ustun jihatlari koʻp. Mazkur tizim orqali aholi va tashkilotlarga bir qancha davlat va jamoat xizmatlari bir joyda koʻrsatiladi. Bu esa, oʻz navbatida, fuqarolarga zarur maʼlumotlar olish va boshqa xizmatlardan foydalanishlarida vaqtni tejash barobarida, ortiqcha rasmiyatchilik holatlarini qisqartirishga yordam beradi.

Joriy yilning oʻtgan 6 oyi davomida markaz orqali 8386ta elektron raqamli imzo kalitlari berildi. Qurilish-montaj ishlari tugallangan obʼektlardan foydalanish uchun ruxsatnoma berish va kadastr hujjatlarini rasmiylashtirish boʻyicha 1872ta xizmatlar koʻrsatildi. Oʻtgan 6 oy davomida koʻrsatilgan kadastr sohasiga oid xizmatlar 3168tani tashkil qildi. Shu bilan birga, bolani davlat maktabgacha taʼlim muassasasiga joylashtirish boʻyicha 3273ta xizmat koʻrsatildi.

Hisobot davrida koʻchmas mulk obʼektlariga boʻlgan huquqlarni davlat roʻyxatidan oʻtkazish boʻyicha 2472ta xizmatlar koʻrsatilib, narkologiya boʻyicha dispanser hisobida turishi yoki turmasligi toʻgʻrisida 2277ta, ruhiy dispanser hisobida turishi yoki turmasligi toʻgʻrisida 2297ta, sudlanmaganlik yoki sudlanganlik toʻgʻrisida 1383ta maʼlumotnomalar berildi.

Aholining hayot darajasini oshirish va ishbilarmonlik muhitini yaxshilash, biznesni rivojlantirish maqsadida davlat xizmatlari koʻrsatishning milliy tizimini sifat jihatidan yangi darajaga koʻtarish jadal surʼatlarda amalga oshirilmoqda. Davlat xizmatlari koʻrsatish markazlarining faoliyati esa bu boradagi saʼy-harakatlarning uzviy davomidir.

Bundan koʻzlangan asosiy maqsad – sohada uchraydigan sunʼiy toʻsiqlarni bartaraf qilib, aholiga qulayliklar yaratish, tadbirkorlarning ish boshlashidan tortib faoliyati davomida zarur boʻladigan xizmatlarni bir joyda koʻrsatishdan iborat.

Sevara ISMOILOVA