ИЧКИ ҚИШЛОҚ ЙЎЛЛАРИ ТАЪМИРЛАНМОҚДА

Мамлакатимизда “Янги Ўзбекистонда эл азиз, инсон азиз!” шиори остида олиб борилаётган туб ислоҳотлар ва демократик давлат барпо қилиш йўлидаги саъй-ҳаракатлар биз учун ягона ва энг тўғри йўл эканлиги бу борадаги кенг миқёсли ишларда аниқ-равшан кўриниб турибди.

Халқимиз бекорга: “Йўлинг равон бўлса, ишинг унумли бўлади”, “Йўл таъмирлаб, кўприклар қурганнинг икки дунёси обод”, деган пурмаъно ҳикматларни яратмаган. Бу ҳикматларнинг ҳаётдаги ифодаси эса ўзимиз ҳар куни юриб ўтадиган йўллар ҳолатидан аён.

Сўнгги йилларда Амударё туманининг умумфойдаланишдаги ички йўлларида ҳам кенг камровли қурилиш-таъмирлаш ишлари амалга оширилиб, йўлларимиз равонлашди. Шунингдек, ички қишлоқ йўлларида ҳам жиддий таъмирлаш ишлари амалга оширилмоқда.

Хусусан, Ўзбекистон Республикаси Вазирлар Маҳкамасининг 500-сонли Қарорига асосан туман ҳудудидаги жами 37 км. узунликдаги ички кўча йўлларига тош ётқизиш белгиланган бўлиб, бугунги кунда туман ободонлаштириш бошқармаси томонидан 22,1 км. узунликдаги ички кўча йўлларига тош ётқизиш ишлари якунланди ва белгиланган ҳудудларда тош ётқизиш ишлари давом этмоқда.

Қорақалпоғистон Республикаси Жўқорғи Кенгеси Президиумининг Қарорига асосан жорий йилда туман ҳудудидаги 1 та автомобиль йўли, 2 та ички йўлларни таъмирлаш белгиланган бўлиб, мазкур объектларда пудратчи ташкилотлар томонидан таъмирлаш ишлари олиб борилмоқда.

 “Ташаббусли бюджет”нинг 1-босқич маблағлари ҳисобидан жами 16 та объектларда таъмирлаш ишлари белгиланган бўлиб, бугунги кунда белгиланган объектларда таъмирлаш ишлари тўлиқ якунланди.

Йўлларнинг текис ва равонлиги билан биргаликда йўллар бўйидаги экотизим ҳолатини яхшилашга ҳам эътибор қаратилмоқда. Жорий йил “Яшил макон” умуммиллий лойиҳасини халқимиз ҳаётига тўлиқ татбиқ этиш ҳамда дарахт экиш, парваришлаш ва кўкаламзорлаштириш тизимини самарали ташкил этиш, туман ҳудудида мевали ва манзарали дарахт кўчатлари ҳамда қаламчаларини экиб кўпайтириш бўйича баҳор мавсумида 770 минг дона ниҳол экиш режалаштирилган эди. Ушбу режа ўтган давр мобайнида 102 фоизга бажарилди, яъни туман ҳудудида 789,9 минг дона мевали ва манзарали дарахт кўчатлари экилди.

Туманнинг барча овул ва маҳалла гузарларида, катта ва ички йўллар, кўчалар бўйларида экилган ниҳолларнинг униб-ўсиб кетишини таъминлаш мақсадида ҳар бир туп кўчат алоҳида эътиборга олинган. Оқар сув етиб бормайдиган ҳудудлардаги ниҳоллар сувсизликдан қуриб қолмаслиги учун туман Ободонлаштириш бўлими томонидан махсус автомобилларда суғориш йўлга қўйилган.

Натижада сўнгги уч-тўрт йил ичида катта йўллар бўйлари, ички дала йўллари ҳамда кўчалар четлари кўкаламзор ҳудудларга айланди. Таъмирланиб, текис ва равон бўлган ички кўчалар, қишлоқ йўллари бўйларида ям-яшил дарахтлар қаторлари ҳосил бўлиб, йўловчилар учун айни ёзнинг жазирама кунларида қулайлик яратилганидан халқимиз мамнун. Зеро, юқорида айтганимиздай, йўлларнинг равонлиги ишнинг унумидир.

Робия ЙЎЛДОШЕВА.