АМУДАРЁ ТУМАНИ “ИНСОН” ИЖТИМОИЙ ХИЗМАТЛАР МАРКАЗИ БОШЛИҒИ ТАЙИНЛАНДИ

16 август куни Амударё тумани ҳокимлигининг мажлислар залида туман “Инсон” ижтимоий хизматлар маркази раисини тайинлаш масаласига бағишланган йиғилиш бўлиб ўтди.

Йиғилишда Ўзбекистон Республикаси Президенти ҳузуридаги Ижтимоий ҳимоя миллий агентлиги Қорақалпоғистон Республикаси бошқармаси раиси Сайлаўбай Данияров, туман ҳокимининг ёшлар масалалари бўйича ўринбосари Маҳмуд Шерметов, фуқароларнинг ўзини ўзи бошқариш органлари раислари, бир гуруҳ фахрийлар иштирок этдилар.

Йиғилиш аввалида иштирокчиларга Ўзбекистон Республикаси Президенти ҳузуридаги Ижтимоий ҳимоя миллий агентлиги раисининг буйруғи асосида агентликнинг Қорақалпоғистон Республикаси Амударё туманидаги “Инсон” ижтимоий хизматлар маркази бошлиғи лавозимига Дуйсенбаев Ғуломжон Исмоилович тайинлангани маълум қилинди.

Ғуломжон Дуйсенбаев 1983 йилда Амударё туманида туғилган. 2007 йилда Қорақалпоқ давлат университетини тамомлаган. Меҳнат фаолият давомида Амударё академик лицейи ўқитувчиси, мазкур академик лицей директорининг маънавий ва маърифий ишлар бўйича ўринбосари, ушбу академик лицей директори, туман ҳокимлиги ташкилий-назорат гуруҳи раҳбари лавозимларида фаолият олиб борган. Кейинчалик Амударё тумани ҳокимининг ўринбосари – Маҳалла ва оилани қўллаб-қувватлаш бўлими бошлиғи лавозимида фаолият юритган. Ғуломжон Дуйсенбаев шу кунга қадар туман Камбағалликни қисқартириш ва аҳоли бандлигига кўмаклашиш бўлими бошлиғи вазифасида ишлаб келаётган эди.

Айтиш жоизки, Ўзбекистон Республикаси Президентининг 2023 йил 1 июндаги “Аҳолига сифатли ижтимоий хизмат ва ёрдам кўрсатиш ҳамда унинг самарали назорат тизимини йўлга қўйиш бўйича комплекс чора-тадбирлар тўғрисида”ги Фармони билан давлат томонидан аҳолини манзилли ҳимоя қилишнинг асосий йўналишлари белгилаб берилди. Бу эса мазкур йўналишдаги ишларни янги босқичга кўтаришга хизмат қилмоқда.

Фармонга мувофиқ эндиликда ҳудудларда ижтимоий ҳимоя тизимини жорий қилиш ва унинг самарадорлиги ва манзиллилигини ошириш орқали аҳолининг кўмакка муҳтож қатлами ижтимоийлашувини таъминлаш ҳамда ижтимоий ҳимояни маҳалла даражасигача ташкил этиш, турмуши оғир аҳволга тушиб қолган аҳолига индивидуал ёндашувга мувофиқ ижтимоий хизмат ва ёрдам кўрсатишни йўлга қўйишга алоҳида эътибор қаратилади.

Аҳолига индивидуал ёндашув асосида ижтимоий кўмак кўрсатишда ҳеч шубҳасиз айтиш мумкинки, сўнгги йилларда яратилган “Аёллар дафтари”, “Ёшлар дафтари”, “Темир дафтар” тизимларининг ўрни беқиёс. Ўз навбатида, маҳаллаларда ҳоким ёрдамчилари ва ёшлар етакчилари лавозимларининг жорий этилгани эса ижтимоий ҳимояни маҳалла даражасида ташкил этиш имконини бермоқда.

Бу борадаги ишларни янада кучайтириш мақсадида юқоридаги Фармонга кўра туман ва шаҳарларда “Инсон” ижтимоий хизматлар марказлари ташкил этилиб, ижтимоий ходимлар гуруҳлари фаолияти йўлга қўйилиши белгиланган.

Йиғилишда тегишли масъулларга ҳар бир хонадон аҳволини ўрганиб, оилалардаги ҳақиқий ҳолатни ҳамда уларнинг ижтимоий хизматлар ва ёрдамга бўлган эҳтиёжини аниқлаш, оилаларнинг иқтисодий-ижтимоий ҳолати ва эҳтиёжларини ўрганиш натижасида уларнинг ижтимоий паспортларини шакллантириш, оғир аҳволга тушиб қолган ва оғир аҳволга тушиб қолиш хавфи юқори бўлган оилаларни мунтазам равишда мониторинг қилиб бориш, улар учун ижтимоий хизмат ва ёрдамларни ташкил этиш бўйича кўрсатмалар берилди.

Шуни таъкидлаш лозимки, аҳолининг ижтимоий қўллаб-қувватлашга эҳтиёжи юқори бўлган қатламини манзилли аниқлаш борасида янги тизимнинг жорий этилиши келгусида аҳоли турмуш фаровонлигининг янада юксалишида ўзининг ижобий самараларини беради.

Туман ҳокимлигининг Ахборот хизмати.