АҲОЛИНИ СОҒЛОМ ЯШАШГА ТАРҒИБ ЭТМОҚДАМИЗ

Бугунги кунда инсоният олдида турган глобал муаммолардан бири – экологик мувозанатнинг издан чиқаётганидир. Унинг салбий оқибатларини ҳар бир юртдошимиз ўз ҳаётида яққол  ҳис қилаётир. Инсониятнинг келгусида ер куррасида эмин-эркин яшашининг асосий шартларидан бири экология ва атроф-муҳитни ҳимоя қилишдир.

Ўзбекистон Экологик партияси экологияни яхшилашнинг асосий ечими сифатида “Яшил иқтисодиёт”га ўтиш, ушбу сиёсатни амалга ошириш туфайли Ўзбекистонда барқарор ва доимий ўсиб борадиган иқтисодиётни шакллантириш тарафдори.

Шунингдек, иқтисодий фаолиятнинг атроф-табиий муҳитга ва аҳолининг саломатлигига салбий таъсирини пасайтирувчи инновацион технологияларни жорий этиш ҳисобига барқарор иқтисодий ривожланишга эришиш каби вазифаларнинг ҳал этилиши Ўзбекистон тараққиёти, халқ фаровонлиги таъминланишига асос бўлади.

Экологик партия аъзоси, туман Кенгаши депутати сифатида ва ўзим айнан шифокор бўлганим боисидан ҳам бу вазифаларнинг нечоғлик муҳим эканлигини чуқур англайман. Депутат ва партия фаоли сифатида ўз ҳудудимда атроф-муҳитни ободонлаштириш, яшил дарахтларни кўпайтириш, чор-атрофни тоза, ораста тутиш лозимлигини аҳоли орасида тарғиб этаман, ҳар бир киши ўз саломатлигига ўзи масъул бўлишини, соғлом турмуш тарзи ҳаётда бахтиёр ва узоқ яшашнинг асосий шартларидан эканлигини тушунтиришга ҳаракат қиламан.

Бугунги кунда бизнинг “Қангли” оилавий шифокорлик пунктимиз 1410 хонадонда истиқомат қилувчи 8228 нафар аҳолига тиббий хизмат кўрсатади. Пунктимизда фаолият юритаётган 1 нафар стоматолог, 4 нафар оила шифокори, 23 нафар ўрта тиббиёт ходимлари, шундан 9 нафар патронаж ҳамширалар аҳоли соғлиғини сақлашда, уларга тиббий хизмат кўрсатишда фидойилик билан ишлаяптилар.

Тиббиётда касални даволагандан кўра, унинг олдини олган афзал, деган ибора бор. Бу бизнинг фаолиятимизнинг асосий мезонига айланган. Чунки ҳар қандай касалликка чалинган одамда даволанишдан сўнг ҳам маълум асоратлар қолади. Бундан ташқари, дард исканжага олган одамнинг  ҳаётий фаоллиги сусайиб, руҳий тушкунликка тушади. Уни даволаш, соғлом ҳаётга қайтариш эса анча вақт ва маблағни талаб қилади. Шу боисдан ҳам мамлакатимизда тиббий хизмат сифати ва самарадорлигини ошириш билан бир қаторда, аҳоли орасида соғлом яшаш тамойиллари кенг тарғиб этилаяпти. Бу борада турли тарғибот-ташвиқот тадбирлари ўтказаяпмиз, ходимларимиз уйма-уй юриб ҳам бу борада кенг тушунтириш ишларини олиб бораяпти. Натижада аҳоли орасида бирламчи касалланиш сони ўтган йилнинг шу даврига нисбатан камайишига эришилди.

Ҳаётда соғломлик – бахтиёр,  фаровон яшаш имконини беради. Бу бебаҳо неъматни, чор-атрофимиздаги табиий муҳитни асрашимиз, соғлом турмуш тарзига амал қилишимиз лозим.

Туманимизнинг барча аҳолисини мустақиллигимизнинг 32 йиллиги билан қизғин қутлайман ва соғлом яшашга чорлаб қоламан.

Замира САПАРОВА,

Қангли оилавий шифокорлик пункти мудираси,

туман Кенгаши депутати,

Экологик партия туман Кенгаши “Аёллар қаноти” етакчиси.