AHOLINI SOGʻLOM YaShAShGA TARGʻIB ETMOQDAMIZ

Bugungi kunda insoniyat oldida turgan global muammolardan biri – ekologik muvozanatning izdan chiqayotganidir. Uning salbiy oqibatlarini har bir yurtdoshimiz oʻz hayotida yaqqol  his qilayotir. Insoniyatning kelgusida yer kurrasida emin-erkin yashashining asosiy shartlaridan biri ekologiya va atrof-muhitni himoya qilishdir.

Oʻzbekiston Ekologik partiyasi ekologiyani yaxshilashning asosiy yechimi sifatida “Yashil iqtisodiyot”ga oʻtish, ushbu siyosatni amalga oshirish tufayli Oʻzbekistonda barqaror va doimiy oʻsib boradigan iqtisodiyotni shakllantirish tarafdori.

Shuningdek, iqtisodiy faoliyatning atrof-tabiiy muhitga va aholining salomatligiga salbiy taʼsirini pasaytiruvchi innovatsion texnologiyalarni joriy etish hisobiga barqaror iqtisodiy rivojlanishga erishish kabi vazifalarning hal etilishi Oʻzbekiston taraqqiyoti, xalq farovonligi taʼminlanishiga asos boʻladi.

Ekologik partiya aʼzosi, tuman Kengashi deputati sifatida va oʻzim aynan shifokor boʻlganim boisidan ham bu vazifalarning nechogʻlik muhim ekanligini chuqur anglayman. Deputat va partiya faoli sifatida oʻz hududimda atrof-muhitni obodonlashtirish, yashil daraxtlarni koʻpaytirish, chor-atrofni toza, orasta tutish lozimligini aholi orasida targʻib etaman, har bir kishi oʻz salomatligiga oʻzi masʼul boʻlishini, sogʻlom turmush tarzi hayotda baxtiyor va uzoq yashashning asosiy shartlaridan ekanligini tushuntirishga harakat qilaman.

Bugungi kunda bizning “Qangli” oilaviy shifokorlik punktimiz 1410 xonadonda istiqomat qiluvchi 8228 nafar aholiga tibbiy xizmat koʻrsatadi. Punktimizda faoliyat yuritayotgan 1 nafar stomatolog, 4 nafar oila shifokori, 23 nafar oʻrta tibbiyot xodimlari, shundan 9 nafar patronaj hamshiralar aholi sogʻligʻini saqlashda, ularga tibbiy xizmat koʻrsatishda fidoyilik bilan ishlayaptilar.

Tibbiyotda kasalni davolagandan koʻra, uning oldini olgan afzal, degan ibora bor. Bu bizning faoliyatimizning asosiy mezoniga aylangan. Chunki har qanday kasallikka chalingan odamda davolanishdan soʻng ham maʼlum asoratlar qoladi. Bundan tashqari, dard iskanjaga olgan odamning  hayotiy faolligi susayib, ruhiy tushkunlikka tushadi. Uni davolash, sogʻlom hayotga qaytarish esa ancha vaqt va mablagʻni talab qiladi. Shu boisdan ham mamlakatimizda tibbiy xizmat sifati va samaradorligini oshirish bilan bir qatorda, aholi orasida sogʻlom yashash tamoyillari keng targʻib etilayapti. Bu borada turli targʻibot-tashviqot tadbirlari oʻtkazayapmiz, xodimlarimiz uyma-uy yurib ham bu borada keng tushuntirish ishlarini olib borayapti. Natijada aholi orasida birlamchi kasallanish soni oʻtgan yilning shu davriga nisbatan kamayishiga erishildi.

Hayotda sogʻlomlik – baxtiyor,  farovon yashash imkonini beradi. Bu bebaho neʼmatni, chor-atrofimizdagi tabiiy muhitni asrashimiz, sogʻlom turmush tarziga amal qilishimiz lozim.

Tumanimizning barcha aholisini mustaqilligimizning 32 yilligi bilan qizgʻin qutlayman va sogʻlom yashashga chorlab qolaman.

Zamira SAPAROVA,

Qangli oilaviy shifokorlik punkti mudirasi,

tuman Kengashi deputati,

Ekologik partiya tuman Kengashi “Ayollar qanoti” yetakchisi.