“ЮКСАК МАЪНАВИЯТЛИ ВА АХЛОҚЛИ ЁШЛАР – КЕЛАЖАК ПОЙДЕВОРИ” НОМЛИ ГРАНТ ЛОЙИҲАСИ ДОИРАСИДА “КУТУБХОНАГА САЁҲАТ” ТАДБИРИ ЎТКАЗИЛДИ
Кутубхоналар мутолаани севган китобхонлар учун энг севимли маскандир. Зеро, ҳар бир инсоннинг катта ҳаёт майдонида ўз йўлини топишида, баркамол шахс сифатида камол топишида бу даргоҳнинг аҳамияти катта. Шу сабабли китобхонликни кенг тарғиб этиш, ёшларни бадиий ва илмий асарларни мутолаа қилишга чорлаш, шу орқали маданиятимиз ва маънавиятимизни юксалтириб бориш бугунги кундаги долзарб масалалардан бирига айланган.
19 сентябрь куни Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёшлар ўртасида китобхонликни кенг тарғиб қилиш мақсадида тумандаги Ахборот-кутубхона марказига саёҳат ташкил этилди. Гулзор маҳалласидаги 55-сонли мактаб ўқувчилари иштирокида бўлиб ўтган ушбу тадбир давомида лойиҳа доирасида ўтказилаётган кенг қамровли амалий ишлар хусусида батафсил маълумот берилди. Шунингдек, мазкур грант лойиҳаси доирасида ёшларни китобхонликка жалб этиш мақсадидаги тадбирлар кенг тарзда ўтказилиб келинаётгани, “Китоблар карвони”, “Кутубхонага саёҳат”, “Ёш китобхонлар” кўрсатув ва тадбирлари, “Мен севган бадиий қаҳрамон”, “Мен севган бадиий асар” танловларида ёш китобхонлар фаол иштирок этишаётгани баён этилди.
Марказ ходимлари ҳам ушбу зиё маскани фаолияти ҳақида гапириб, ўтказилаётган бу каби маънавий-маърифий, тарғибот тадбирлари, турли лойиҳалар китобхонлар сафи ортишида алоҳида аҳамият касб этаётганини таъкидлашди. Шунингдек, бу ерда мавжуд бўлган китоблар ҳақида батафсил маълумотлар беришди ва ўқувчи-ёшларни улар билан танишиб чиқишга таклиф этишди. Ёшлар жавонларга тартиб билан терилган турли китобларни катта қизиқиш билан кўриб, танишиб чиқишди. Уларга кутубхона ходимлари ушбу кутубхонага аъзо бўлиш, китобларни шу ерда ва ўзлари билан олиб кетиб мутолаа қилиш муддатлари, тартиби ҳақида тушунчалар беришди.
Ойбек номли маҳалла ҳудудида жойлашган ушбу Ахборот-кутубхона маркази фаолияти 2019 йилда йўлга қўйилган. Замонавий кўринишдаги бинода жойлашган ушбу кутубхонада китобхонлар учун барча шароитлар яратилган бўлиб, бу ерда турли бадиий ва илмий адабиётлар мавжуд. Ахборот-кутубхона марказида айни пайтда 19330 та номдаги, 64168 та нусхада китоблар бор. Уларнинг 31922 таси ўзбек тилида, 981 таси қорақалпоқ тилида, 31265 таси эса хорижий тилдаги адабиётлардир. Кутубхона хизматидан фойдаланувчилар 16485 нафар бўлса, шундан 12176 нафарини ёш китобхонлар ташкил этади. Ахборот-кутубхона марказида китобларнинг электрон нусхалари ҳам мавжуд ва китобхонларга бу хизмат туридан фойдаланишлари учун зарур шароитлар яратилган.
Таъкидлаш жоизки, ёшлар орасида китоб мутолаасини оммалаштириш, уларнинг маънавиятини юксалтиришга хизмат қиладиган бундай маърифат масканлари – кутубхоналарнинг аҳамияти катта. Ҳозирги пайтда шу сабабдан ҳам кутубхоналар хизматини юқори даражада ташкил этиш ва уларнинг моддий-техник базасини бойитишга алоҳида эътибор қаратилмоқда. Барча кутубхоналар қатори Амударё туманидаги Ахборот-кутубхона маркази ходимларининг ҳам Кутубхона фондидан фойдаланиш тизимини такомиллаштириш, китобхонларга хизмат кўрсатишда турли ёшдаги аҳоли қатламларининг талаб ва эҳтиёжлари, қизиқишларини эътиборга олиш, кўрсатилаётган қўшимча хизматлар турларини янада кенгайтириш ва сифатини ошириш муҳим вазифадир. Бу даргоҳ замонавий асбоб-ускуна ва техник воситалар билан таъминланиб, интернет тармоғи ўрнатилган. Бундай шароитлар китобхонлар ташрифини йилдан-йилга ошириб бориш, айниқса, ёшларни кўпроқ жалб қилиш имкониятини бермоқда.
Грант лойиҳаси доирасидаги тадбирда ўқувчи-ёшларга кутубхона ҳақидаги бу каби қизиқарли маълумотларни тинглаш, жаҳон ва миллий адабиётнинг хилма-хил олами билан танишиш мароқли бўлди. Китоблар оламига саёҳат ёшларда унутилмас таассуротлар қолдирди.
Озода Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
