ОРОЛБЎЙИ ҲУДУДЛАРИДА ЭКОЛОГИЯНИ ЯХШИЛАШГА ДОИР ЛОЙИҲАНИ АМАЛГА ОШИРИШГА БАҒИШЛАНГАН СЕМИНАР ЎТКАЗИЛДИ
Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги, Бирлашган миллатлар ташкилоти Тараққиёт дастури ва Глобал экологик жамғармасининг “Орол денгизи ҳавзаси ландшафтининг таназзул ерларида барқарор ҳаётни таъминлашни қўллаб-қувватлайдиган асос сифатида кўллар, сув-ботқоқ ерлар ва қирғоқбўйи ҳудудларни сақлаш ҳамда бошқариш” қўшма лойиҳаси доирасида давлат ва нодавлат ташкилотлар ҳамда ОАВ вакиллари иштирокида семинар ўтказилди.
2023 йил 20 сентябрь куни Aмударё тумани ҳокимлиги биносида лойиҳани амалга ошириш гуруҳи томонидан ўтказилган ушбу семинарда мазкур лойиҳанинг мақсади ва вазифалари ҳақида сўз юритилди.
Таъкидланганидек, ушбу лойиҳа Оролбўйи минтақаси кўллари, сув-ботқоқ ҳудудларини сақлаш ва барқарор бошқариш бўйича олиб бориладиган амалий ишларни қамраб олади.
Сув-ботқоқ ҳудудлари жаҳондаги биологик хилма-хиллик ва энг қимматли экотизимлардан биридир. Бугунги кунда Орол денгизи ҳавзасида ҳам кўллар, ботқоқ ҳудудлар ва қирғоқ экотизимлари сақланиб келмоқда. Кўчманчи қушларнинг жуда кўп турлари учун Ўзбекистон жуда муҳим учиб ўтиш йўлида жойлашган. Масалан, Судочье, Денгизкўл, Aйдар-Aрнасой кўллар тизими қишловчи-кўчманчи қушнинг асосий маконлари ҳисобланади.
Семинар давомида ушбу лойиҳанинг мақсади – муҳофаза этиладиган табиий ҳудудларни, асосий биологик хилма-хиллик ҳудудлари ва асосий орнитологик ҳудудлар атрофидаги маҳсулдор ландшафтларни ер ва сув ресурсларини комплекс бошқариш билан биргаликда тупроқ деградациясининг олдини олиш орқали Қуйи Aмударё ва Орол денгизи ҳавзаси ҳудудида экотизимлар барқарорлигини ва ҳаёт фаолиятини оширишдан иборатлиги кенг тушунтирилди. Шунингдек, лойиҳанинг мақсадли ҳудудлари Ўзбекистоннинг жанубий ва жануби-ғарбида жойлашган Aмударёнинг қуйи оқими ва Орол денгизи ҳавзаси ҳисобланиши, бу ҳудуд маъмурий жиҳатдан Бухоро вилоятининг Олот, Қоракўл туманлари ҳамда Қорақалпоғистон Республикасининг Aмударё ва Мўйноқ туманларини ўз ичига олиши алоҳида таъкидлаб ўтилди.
Лойиҳани амалга ошириш гуруҳи аъзолари мақсадли ҳудудларда табиий экотизимларнинг кўпчилиги, яъни ботқоқ ҳудудлар, кўллар Aмударё ҳавзасининг қирғоқбўйи майдонлари жойлашганини, бу ҳудудларда деградацияга энг кўп учраган яйловлар ва суғориладиган майдонлар мавжудлиги, уларнинг аксарияти шўрланишга мойиллиги эътиборга олинганини қайд этишди. Лойиҳа фаолияти ушбу қурғоқчил ландшафтдаги кўллар, ботқоқ ерлар ва қирғоқ биохилма-хиллигининг қисқариши ва йўқолиши билан бевосита боғлиқ бўлган ерларнинг деградацияси, сув танқислиги ва биологик хилма-хилликнинг йўқолишига олиб келувчи омилларни бартараф этишга қаратилганига кенг тўхталишди.
Лойиҳа доирасида умумий майдони 3 млн. гектардан ортиқ бўлган Жанубий Устюрт, Оролбўйи, Марказий Қизилқум миллий табиат боғлари, Судочье-Aкпетки, Борсакелмас буюртмахоналари сингари янги ташкил этилган муҳофаза этиладиган табиий ҳудудлар ривожлантирилишини эътироф этишди.
Семинар иштирокчиларига 2022 йилнинг 30 ноябрида Вазирлар Маҳкамасининг “Бирлашган Миллатлар Ташкилоти Тараққиёт Дастури ва Глобал Экологик Жамғарма иштирокида “Орол денгизи ҳавзаси ландшафтининг таназзул ерларида барқарор ҳаётни таъминлашни қўллаб-қувватлайдиган асос сифатида кўллар, сув-ботқоқ ерлари ва қирғоқбўйи ҳудудларини сақлаш ҳамда бошқариш” лойиҳасини амалга оширишга доир чора-тадбирлар тўғрисида”ги тегишли қарори тасдиқлангани, 1971 йил 2 февралда Эроннинг Рамсар шаҳрида Халқаро аҳамиятга эга, асосан, сувда сузувчи қушларнинг яшаш макони бўлган сувли-ботқоқли ҳудудлар тўғрисидаги Конвенция имзолангани тўғрисида маълумотлар берилиб, уларнинг мазмун-моҳияти билан таништириб ўтилди.
Семинар якунида иштирокчиларни қизиқтирган саволларга батафсил жавоблар берилиб, ҳамкор ташкилотларни лойиҳани амалга оширишда, бу борада тарғибот-ташвиқот ишларини олиб боришда фаол иштирок этишга даъват этилди.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
