“АЁЛЛАР МУҲОФАЗАСИ – ОИЛА ХАВФСИЗЛИГИ” МАВЗУСИДА ПСИХОЛОГИК СЕМИНАР-ТРЕНИНГ ЎТКАЗИЛДИ

Ўзбекистон Республикаси Президентининг 2021 йил 19 майдаги “Зўрлик ишлатишдан жабр кўрган хотин-қизларни реабилитация қилишга оид қўшимча чора-тадбирлар тўғрисида”ги Қарори асосида зўрлик ишлатишдан жабр кўрган шахсларни реабилитация қилиш ва мослаштириш ҳамда ўз жонига қасд қилишнинг олдини олиш республика Маркази негизида Маҳалла ва оилани қўллаб-қувватлаш вазирлиги ҳузурида Аёлларни реабилитация қилиш ва мослаштириш республика Маркази, унинг ҳудудий бўлимлари ҳамда намунали туманлараро Марказлари ташкил этилди.

Президентимизнинг ушбу Қарорига мувофиқ “Аёлларни реабилитация қилиш ва мослаштириш республика Маркази, унинг ҳудудий бўлимлари ҳамда намунали туманлараро Марказлари тўғрисида”ги Низоми ҳам қабул қилинди. Ушбу Низомга асосан Амударё намунали туманлараро Маркази ҳам ўз фаолиятини бошлади.

5 октябрь куни мазкур марказда “Аёллар дафтари” руйхатида турган, ҳимоя ордери олган аёллар учун “Аёллар муҳофазаси – оила хавфсизлиги” мотивацион семинар-тренинг ташкил этилди. Семинар-тренингни тумандаги 12-сонли умумтаълим мактаби психологи Гулнора Шарипова олиб борди.

Семинар-тренингни туман ҳокими ўринбосари, оила ва хотин-қизлар бўлими бошлиғи Гўзал Собирова очди. Шунингдек, Марказ директори Гавхар Чимбайчиева Ўзбекистон Республикаси Президентининг 2021 йил 19 майдаги “Зўрлик ишлатишдан жабр кўрган хотин-қизларни реабилитация қилишга оид қўшимча чора-тадбирлар тўғрисида”ги Қарори, Аёлларни реабилитация қилиш ва мослаштириш марказининг фаолияти хамда зўравонликдан жабр кўрган аёлларга кўрсатилаётган ёрдамлар ва хизматлар хақида маълумот берди. Аёллар хуқуқларини ҳимоя қиладиган “Ҳимоя ордери” бериш тартиблари, 1146 рақамли “Ишонч телефони” фаолияти хақида батафсил сўз юритилди.

Айтиш жоизки, ўтган давр мобайнида Амударё намунали туманлараро Маркази тазйиқ ва зўравонликдан жабр кўрган, ўз жонига суиқасд қилган ёки ўз жонига қасд қилишга мойиллиги бўлган хотин-қизларга аноним тарзда шошилинч тиббий, психологик, ижтимоий, педагогик, ҳуқуқий ва бошқа ёрдамлар кўрсатиб келмоқда.

Шунингдек, Марказ томонидан оғир ижтимоий аҳволда қолган, оилавий муаммолар ва турмушида зўрлик ишлатилишига дуч келган хотин-қизлар ҳуқуқларининг кафолатларини таъминлашга алоҳида эътибор қаратилмоқда.

Зўравонликнинг олдини олиш, хотин-қизларнинг ҳуқуқлари кафолатларини таъминлаш, уларнинг ҳуқуқий маданиятини юксалтиришга қаратилган тарғибот-ташвиқот ишларини амалга ошириш учун Марказда барча зарур шароитлар яратилган.

Марказ учун 8 та хона ажратилган бўлиб, директор, психолог, 2 та она ва болалар хонаси, ошхона мавжуд. Барча хоналар тўлиғи билан зарур мебеллар ва маиший техникалар билан жихозланган.

Аёлларни реабилитация қилиш ва мослаштириш Қорақалпоғистон Республикаси Амударё намунали туманлараро Марказига жорий йилнинг 9 ойи давомида 322 нафар аёл-қизлар ва 9 нафар эркаклар томонидан мурожаатлар бўлди. Ушбу мурожаатчиларнинг 32 нафарига ҳуқуқий ёрдам, 232 нафарига психологик ёрдамлар, 6 нафарига тиббий, 34 нафарига эса бошқа турдаги ёрдамлар кўрсатилди. Бундан ташқари, ҳамкор ташкилотлар билан биргаликда 15 та сайёр қабуллар, 21 та психологик тренинглар ўтказилиб, 100 дан ортиқ оилаларни яраштиришга, 19 нафар аёл-қизларга ҳимоя ордери берилишида кўмаклашилди.

Тадбир давомида Оила ва хотин-қизлар бўлими бошлиғи, марказ директори, ички ишлар бўлими хотин-қизлар масалалари бўйича инспектори билан биргаликда 2 та оиланинг муаммолари ўрганилди. Уларга оилалар мустаҳкамлигини таъминлаш, оиланинг тарбиявий-таълимий салоҳиятини мустаҳкамлаш, жамиятда оилавий қадриятларни сақлаш, оилаларда маънавий-ахлоқий муҳитни яхшилаш, оиланинг жамият ҳаётидаги аҳамияти ҳамда оилада эр ва хотиннинг вазифалари, бурчлари ҳақида тушунтирилди. Оилалар яраштирилиб, 1 нафар аёлга ҳимоя ордери берилди.

Бундан ташқари, ҳар бир аёл-қизнинг муаммоларини ўрганиш мақсадида сайёр қабул ҳам ташкил қилиниб, “Аёллар дафтари”га киритилган 6 нафар аёлларнинг муаммолари тингланди, уларга тегишлича маслаҳат ва тавсиялар берилди.

Семинар-тренингда аёл-қизлар 12-сонли умумтаълим мактаби психологи Гулнора Шарипова томонидан ўтказилган психологик суҳбат ва машғулотларда фаол иштирок этдилар. Шу билан биргаликда ўзларини қизиқтирган саволлар юзасидан мутахассисларнинг фикр-мулоҳазаларини тингладилар. Психологик машғулотлардан олган таассуротлари юзасидан ўзаро фикр алмашдилар.

Гавхар ЧИМБАЙЧИЕВА, Аёлларни реабилитация қилиш ва мослаштириш Қорақалпоғистон Республикаси Амударё намунали туманлараро маркази директори.