“AYoLLAR MUHOFAZASI – OILA XAVFSIZLIGI” MAVZUSIDA PSIXOLOGIK SEMINAR-TRENING OʻTKAZILDI

Oʻzbekiston Respublikasi Prezidentining 2021-yil 19-maydagi “Zoʻrlik ishlatishdan jabr koʻrgan xotin-qizlarni reabilitatsiya qilishga oid qoʻshimcha chora-tadbirlar toʻgʻrisida”gi Qarori asosida zoʻrlik ishlatishdan jabr koʻrgan shaxslarni reabilitatsiya qilish va moslashtirish hamda oʻz joniga qasd qilishning oldini olish respublika Markazi negizida Mahalla va oilani qoʻllab-quvvatlash vazirligi huzurida Ayollarni reabilitatsiya qilish va moslashtirish respublika Markazi, uning hududiy boʻlimlari hamda namunali tumanlararo Markazlari tashkil etildi.

Prezidentimizning ushbu Qaroriga muvofiq “Ayollarni reabilitatsiya qilish va moslashtirish respublika Markazi, uning hududiy boʻlimlari hamda namunali tumanlararo Markazlari toʻgʻrisida”gi Nizomi ham qabul qilindi. Ushbu Nizomga asosan Amudaryo namunali tumanlararo Markazi ham oʻz faoliyatini boshladi.

5-oktyabr kuni mazkur markazda “Ayollar daftari” ruyxatida turgan, himoya orderi olgan ayollar uchun “Ayollar muhofazasi – oila xavfsizligi” motivatsion seminar-trening tashkil etildi. Seminar-treningni tumandagi 12-sonli umumtaʼlim maktabi psixologi Gulnora Sharipova olib bordi.

Seminar-treningni tuman hokimi oʻrinbosari, oila va xotin-qizlar boʻlimi boshligʻi Goʻzal Sobirova ochdi. Shuningdek, Markaz direktori Gavxar Chimbaychiyeva Oʻzbekiston Respublikasi Prezidentining 2021-yil 19-maydagi “Zoʻrlik ishlatishdan jabr koʻrgan xotin-qizlarni reabilitatsiya qilishga oid qoʻshimcha chora-tadbirlar toʻgʻrisida”gi Qarori, Ayollarni reabilitatsiya qilish va moslashtirish markazining faoliyati xamda zoʻravonlikdan jabr koʻrgan ayollarga koʻrsatilayotgan yordamlar va xizmatlar xaqida maʼlumot berdi. Ayollar xuquqlarini himoya qiladigan “Himoya orderi” berish tartiblari, 1146 raqamli “Ishonch telefoni” faoliyati xaqida batafsil soʻz yuritildi.

Aytish joizki, oʻtgan davr mobaynida Amudaryo namunali tumanlararo Markazi tazyiq va zoʻravonlikdan jabr koʻrgan, oʻz joniga suiqasd qilgan yoki oʻz joniga qasd qilishga moyilligi boʻlgan xotin-qizlarga anonim tarzda shoshilinch tibbiy, psixologik, ijtimoiy, pedagogik, huquqiy va boshqa yordamlar koʻrsatib kelmoqda.

Shuningdek, Markaz tomonidan ogʻir ijtimoiy ahvolda qolgan, oilaviy muammolar va turmushida zoʻrlik ishlatilishiga duch kelgan xotin-qizlar huquqlarining kafolatlarini taʼminlashga alohida eʼtibor qaratilmoqda.

Zoʻravonlikning oldini olish, xotin-qizlarning huquqlari kafolatlarini taʼminlash, ularning huquqiy madaniyatini yuksaltirishga qaratilgan targʻibot-tashviqot ishlarini amalga oshirish uchun Markazda barcha zarur sharoitlar yaratilgan.

Markaz uchun 8 ta xona ajratilgan boʻlib, direktor, psixolog, 2 ta ona va bolalar xonasi, oshxona mavjud. Barcha xonalar toʻligʻi bilan zarur mebellar va maishiy texnikalar bilan jixozlangan.

Ayollarni reabilitatsiya qilish va moslashtirish Qoraqalpogʻiston Respublikasi Amudaryo namunali tumanlararo Markaziga joriy yilning 9 oyi davomida 322 nafar ayol-qizlar va 9 nafar erkaklar tomonidan murojaatlar boʻldi. Ushbu murojaatchilarning 32 nafariga huquqiy yordam, 232 nafariga psixologik yordamlar, 6 nafariga tibbiy, 34 nafariga esa boshqa turdagi yordamlar koʻrsatildi. Bundan tashqari, hamkor tashkilotlar bilan birgalikda 15 ta sayyor qabullar, 21 ta psixologik treninglar oʻtkazilib, 100 dan ortiq oilalarni yarashtirishga, 19 nafar ayol-qizlarga himoya orderi berilishida koʻmaklashildi.

Tadbir davomida Oila va xotin-qizlar boʻlimi boshligʻi, markaz direktori, ichki ishlar boʻlimi xotin-qizlar masalalari boʻyicha inspektori bilan birgalikda 2 ta oilaning muammolari oʻrganildi. Ularga oilalar mustahkamligini taʼminlash, oilaning tarbiyaviy-taʼlimiy salohiyatini mustahkamlash, jamiyatda oilaviy qadriyatlarni saqlash, oilalarda maʼnaviy-axloqiy muhitni yaxshilash, oilaning jamiyat hayotidagi ahamiyati hamda oilada er va xotinning vazifalari, burchlari haqida tushuntirildi. Oilalar yarashtirilib, 1 nafar ayolga himoya orderi berildi.

Bundan tashqari, har bir ayol-qizning muammolarini oʻrganish maqsadida sayyor qabul ham tashkil qilinib, “Ayollar daftari”ga kiritilgan 6 nafar ayollarning muammolari tinglandi, ularga tegishlicha maslahat va tavsiyalar berildi.

Seminar-treningda ayol-qizlar 12-sonli umumtaʼlim maktabi psixologi Gulnora Sharipova tomonidan oʻtkazilgan psixologik suhbat va mashgʻulotlarda faol ishtirok etdilar. Shu bilan birgalikda oʻzlarini qiziqtirgan savollar yuzasidan mutaxassislarning fikr-mulohazalarini tingladilar. Psixologik mashgʻulotlardan olgan taassurotlari yuzasidan oʻzaro fikr almashdilar.

Gavxar ChIMBAYChIYeVA, Ayollarni reabilitatsiya qilish va moslashtirish Qoraqalpogʻiston Respublikasi Amudaryo namunali tumanlararo markazi direktori.