«ХАВФСИЗ ТУН» ТЕЗКОР-ПРОФИЛАКТИК ТАДБИРЛАРИ ДАВОМ ЭТМОҚДА

Амударё туманида фуқароларнинг ҳуқуқлари, эркинликлари ва қонуний манфаатларини, жисмоний ва юридик шахсларнинг мулкини ҳимоя қилиш, қонун устуворлигини, шахс, жамият ва давлатнинг хавфсизлигини таъминлаш, ҳуқуқбузарликларнинг олдини олиш мақсадида «Хавфсиз тун» тезкор ва профилактик тадбирлари ўтказилиб келинмоқда.
9 октябрдан 10 октябрга ўтар кечаси тунги вақт давомида туман ҳудудида бўлиб ўтган навбатдаги тадбирда туман Ички ишлар бўлими профилактика инспекторлари, Йўл ҳаракати хавфсизлиги бўлинмаси, прокуратура, Қўриқлаш бўлими, Фавқулодда вазиятлар бўлими,  Тиббиёт бирлашмаси ходимлари, фуқаролар йиғинлари раислари, ҳоким ёрдамчилари ҳамда ёшлар етакчилари жалб этилди.
Туман ҳокимлиги биноси олдида дастлаб тегишли топшириқларни белгилаб олиш ва хизмат олди йўриқномаси  бериш учун ўтказилган йиғилишда Ўзбекистон Республикаси Бош прокуратураси тергов тармоқлари фаолияти устидан назорат катта прокурори Абдураҳмон Абдуллаев, туман прокурори Азиз Рўзметов, Ички ишлар бўлими бошлиғи Жамоладдин Юсупов ва бошқа масъуллар қатнашишди. Йиғилишни туман Ички ишлар бўлим бошлиғи Жамолиддин Юсупов кириш сўзи билан очиб берди ва муҳтарам Президентимизнинг 2021 йил 29 ноябрь кунги “Ўзбекистон Республикаси Жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида”ги Фармони бўйича қисқача тўхталди. Ушбу Фармоннинг ижросини таъминлаш мақсадида Республика миқёсида “Хавфсиз тун” тадбирлари ўтказилаётгани, барча ҳуқуқ-тартибот идораларининг жамоат хавфсизлигини таъминлаш, ҳуқуқбузарликлар профилактикаси ва жиноятчиликка қарши курашишдаги ҳамкорлиги ўз самарасини беришини алоҳида таъкидлаб ўтди.
Шунингдек, фуқаролар ўртасида жиноят ва ҳуқуқбузарликларнинг олдини олиш ҳамда тунги вақтларда жамоат жойи ва турли кўнгилочар масканларда жамоат тартибини сақлаш бўйича ҳамкорликдаги янги амалиёт услубларининг амалий ижроси самара бераётганлиги таъкидланиб, бу борадаги ишларни жадаллаштириш юзасидан вазифалар белгилаб олинди.
Рейд давомида тадбирга жалб этилган ходимлар томонидан туман ҳудудидаги жиноят содир этилишига имкон берувчи шарт-шароитлар ўрганилди. Жамоат жойларида пиёдалар, автотранспорт воситаларининг ҳаракат хавфсизлиги қоидаларига амал қилиши назорат қилинди, пробация назоратидаги шахсларнинг ўрнатилган чекловларга риоя этиши текширилди. Шунингдек, тунги вақтдаги Ички ишлар ва Қўриқлаш бўлимларининг тезкор ҳаракатланувчи гуруҳларининг шайлик ҳолати, маҳаллалардаги таянч пунктлари фаолияти, уларда тунги навбатчиликни ташкил этилганлиги, аҳоли мурожаатларининг қабул қилиниши, тезкор чора-тадбирлар кўрилиши, жамоат хавфсизлигини таъминлаш бўйича ҳамкорликдаги ишларнинг амалий ижроси ўрганилди.
Ундан ташқари, тунги вақтларда юрган фуқаролар билан профилактик суҳбат ўтказилиб, ушбу фуқароларни шахсига ойдинлик киритилди. Спиртли ичимлик истеъмол қилган, бемақсад юрган фуқаролар туман Ички ишлар бўлимига олиб келинди ва уларнинг шахси аниқланиб, тезкор-профилактик суҳбатдан ўтказилди. Улар ҳуқуқбузарлик ва жиноят содир этмасликлари тўғрисида расман огоҳлантирилди.
Тадбир давомида умумий овқатланиш шохобчалари, тумандаги истироҳат боғи, корхона-ташкилотлар, савдо ва маиший хизмат кўрсатиш объектлари текширилди. Тунги вақтларда ишлаётган турли объектлар ва уларда фаолият олиб бораётган шахслар билан профилактик суҳбатлар ўтказилди.
Рейд тадбирига жалб этилган ходимлар томонидан аниқланган ҳолатлар ўрганилиб, тегишли чоралар кўрилди. Туман ҳудудида ҳуқуқбузарлик ва жиноятлар, транспорт йўлларида турли хавфли ҳодисалар содир этилишининг олдини олиш, аҳолининг тинчлик-осойишталигини сақлашда муҳим аҳамият касб этаётган бу каби тадбирларни келгусида кенгроқ миқёсда, ҳамкор ташкилотларни жалб этган ҳолда ўтказишга келишиб олинди.

Илҳом Абутов, туман ИИБ ҲПБ бошлиғи, подполковник.