ҲАРБИЙЛАР ИШТИРОКИДА ВАТАНПАРВАРЛИК ОЙЛИГИ ДОИРАСИДАГИ ТАДБИРЛАР ЎТКАЗИЛДИ
Ёшларни ватанпарварлик руҳида тарбиялаш, улар қалбида она Юртга садоқат ва меҳр-муҳаббат туйғуларини мустаҳкамлаш, мард, жасур ўғлонлар қилиб камолга етказиш бугунги куннинг устувор вазифаларидан бири ҳисобланади. Давлат хавфсизлик хизмати Чегара қўшинларига қарашли ҳарбий қисм хизматчилари ва ҳамкорликдаги ташкилотлар билан биргаликда чегара олди ҳудудларда бу борада ватанпарварлик ойлиги доирасида олиб борилаётган ишлар ўз самарасини бермоқда.
Бу каби тадбирлар Амударё туманида ҳам бўлиб ўтмоқда. Айниқса, туманнинг чегара олди ҳудудларида бўлиб ўтаётган ушбу тадбирларга ёшларимизни жалб этиш қамрови ортиб, қатнашувчилар сафи кенгайиб бормоқда.
13 октябрь куни туманнинг чегара олди ҳудудида жойлашган Қиличбой овулидаги 83-сонли мактабда Давлат хавфсизлик хизмати Чегара қўшинларига қарашли ҳарбий қисм ва мутасадди ташкилотлар масъуллари ҳамда ўқувчилар иштирокида “Амир Темур издошлари” шиори остида ҳарбий-ватанпарварлик тадбирлари ўтказилди.
Тадбир давомида мактаб ўқувчиларига замонавий ёшларга қурол-аслаҳалар, ҳарбий-техникалар кўргазмаси намойиш этилиб, ушбу воситалар ва хизмат ҳайвонларидан фойдаланиш тўғрисида атрофлича тушунчалар берилди. Ўқувчи-ёшлар ҳарбий қурол-аслаҳалар, техникалар билан танишиб, соҳага бўлган қизиқишлари янада ортди.
Ундан ташқари, давлат мукофотига эга бўлган ҳарбий хизматчилар билан мактаб ўқувчилари ўртасида давра суҳбати ташкил этилди. Суҳбат давомида мустақиллик йилларида Ўзбекистонда ҳарбий-сиёсий соҳада амалга оширилган кенг кўламли ислоҳотлар натижасида юртимиз хавфсизлиги ва тинчлиги, сарҳадларимиз дахлсизлигини ишончли ҳимоя қилишга ҳар жиҳатдан қодир, замонавий, энг янги қурол-яроғлар ва ҳарбий техника билан таъминланган, мутлақо янги Миллий армия вужудга келгани ҳақида сўз юритилди.
Шунингдек, бугунги кунда давлатимиз томонидан ҳарбийлар учун яратилган шароитлар ва имкониятлар тўғрисида ҳам маълумотлар берилди. Ўтказилган тадбир жараёнида мактаб ўқувчилари ҳарбий хизмат тўғрисидаги ўзларини қизиқтирган саволларга жавоб олишди. Тадбирда фаол иштирок этган, иқтидорли ва намунали ўқувчиларга китоблар совға қилинди.
Ватанпарварлик ойи доирасидаги тадбирларда туманнинг иқтидорли ёшлари рассомчилик, касаначилик, робототехника йўналишлари бўйича кўргазмалари билан қатнашишди. Бўлиб ўтган китоблар кўргазмасида ҳам ҳарбийлар ва ёшлар катта қизиқиш билан иштирок этишди.
Шу куни ҳарбий хизматчилар ва ёшлар ўртасида спортнинг волейбол, шахмат-шашка ҳамда стол тенниси йўналишлари бўйича мусобақалар ўтказилди. Мусобақаларда иштирок этган овул ёшлари ўзларининг спорт маҳорати, чаққонлиги ва эпчиллигини намойиш этиб, ғолиблик учун интилишди. Мусобақалар якунида ғолибларга Давлат хавфсизлик хизмати Чегара қўшинларига қарашли ҳарбий қисм томонидан китоблар жамланмаси ва дипломлар топширилди.
Ватанпарварлик ойлиги доирасида ёшларни ватанпарварлик руҳида тарбиялаш, юртимизда тинчлик ва осойишталикни сақлаш борасида амалга оширилаётган ислоҳотларни аҳолига етказиш ҳамда ёшлар қалбида юрт келажаги учун дахлдорлик туйғуларини ошириш каби мақсадларни кўзлаб ўтказилган ушбу тадбирлар қизиқарли лаҳзаларга бой бўлди.
Ватанпарварлик ойлиги доирасидаги бу каби тадбирлар Қорақалпоғистон Республикаси бўйлаб давом этмоқда.
М.Ҳабибуллаев, ҳарбий хизматчи
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
