HARBIYLAR IShTIROKIDA VATANPARVARLIK OYLIGI DOIRASIDAGI TADBIRLAR OʻTKAZILDI
Yoshlarni vatanparvarlik ruhida tarbiyalash, ular qalbida ona Yurtga sadoqat va mehr-muhabbat tuygʻularini mustahkamlash, mard, jasur oʻgʻlonlar qilib kamolga yetkazish bugungi kunning ustuvor vazifalaridan biri hisoblanadi. Davlat xavfsizlik xizmati Chegara qoʻshinlariga qarashli harbiy qism xizmatchilari va hamkorlikdagi tashkilotlar bilan birgalikda chegara oldi hududlarda bu borada vatanparvarlik oyligi doirasida olib borilayotgan ishlar oʻz samarasini bermoqda.
Bu kabi tadbirlar Amudaryo tumanida ham boʻlib oʻtmoqda. Ayniqsa, tumanning chegara oldi hududlarida boʻlib oʻtayotgan ushbu tadbirlarga yoshlarimizni jalb etish qamrovi ortib, qatnashuvchilar safi kengayib bormoqda.
13-oktyabr kuni tumanning chegara oldi hududida joylashgan Qilichboy ovulidagi 83-sonli maktabda Davlat xavfsizlik xizmati Chegara qoʻshinlariga qarashli harbiy qism va mutasaddi tashkilotlar masʼullari hamda oʻquvchilar ishtirokida “Amir Temur izdoshlari” shiori ostida harbiy-vatanparvarlik tadbirlari oʻtkazildi.
Tadbir davomida maktab oʻquvchilariga zamonaviy yoshlarga qurol-aslahalar, harbiy-texnikalar koʻrgazmasi namoyish etilib, ushbu vositalar va xizmat hayvonlaridan foydalanish toʻgʻrisida atroflicha tushunchalar berildi. Oʻquvchi-yoshlar harbiy qurol-aslahalar, texnikalar bilan tanishib, sohaga boʻlgan qiziqishlari yanada ortdi.
Undan tashqari, davlat mukofotiga ega boʻlgan harbiy xizmatchilar bilan maktab oʻquvchilari oʻrtasida davra suhbati tashkil etildi. Suhbat davomida mustaqillik yillarida Oʻzbekistonda harbiy-siyosiy sohada amalga oshirilgan keng koʻlamli islohotlar natijasida yurtimiz xavfsizligi va tinchligi, sarhadlarimiz daxlsizligini ishonchli himoya qilishga har jihatdan qodir, zamonaviy, eng yangi qurol-yarogʻlar va harbiy texnika bilan taʼminlangan, mutlaqo yangi Milliy armiya vujudga kelgani haqida soʻz yuritildi.
Shuningdek, bugungi kunda davlatimiz tomonidan harbiylar uchun yaratilgan sharoitlar va imkoniyatlar toʻgʻrisida ham maʼlumotlar berildi. Oʻtkazilgan tadbir jarayonida maktab oʻquvchilari harbiy xizmat toʻgʻrisidagi oʻzlarini qiziqtirgan savollarga javob olishdi. Tadbirda faol ishtirok etgan, iqtidorli va namunali oʻquvchilarga kitoblar sovgʻa qilindi.
Vatanparvarlik oyi doirasidagi tadbirlarda tumanning iqtidorli yoshlari rassomchilik, kasanachilik, robototexnika yoʻnalishlari boʻyicha koʻrgazmalari bilan qatnashishdi. Boʻlib oʻtgan kitoblar koʻrgazmasida ham harbiylar va yoshlar katta qiziqish bilan ishtirok etishdi.
Shu kuni harbiy xizmatchilar va yoshlar oʻrtasida sportning voleybol, shaxmat-shashka hamda stol tennisi yoʻnalishlari boʻyicha musobaqalar oʻtkazildi. Musobaqalarda ishtirok etgan ovul yoshlari oʻzlarining sport mahorati, chaqqonligi va epchilligini namoyish etib, gʻoliblik uchun intilishdi. Musobaqalar yakunida gʻoliblarga Davlat xavfsizlik xizmati Chegara qoʻshinlariga qarashli harbiy qism tomonidan kitoblar jamlanmasi va diplomlar topshirildi.
Vatanparvarlik oyligi doirasida yoshlarni vatanparvarlik ruhida tarbiyalash, yurtimizda tinchlik va osoyishtalikni saqlash borasida amalga oshirilayotgan islohotlarni aholiga yetkazish hamda yoshlar qalbida yurt kelajagi uchun daxldorlik tuygʻularini oshirish kabi maqsadlarni koʻzlab oʻtkazilgan ushbu tadbirlar qiziqarli lahzalarga boy boʻldi.
Vatanparvarlik oyligi doirasidagi bu kabi tadbirlar Qoraqalpogʻiston Respublikasi boʻylab davom etmoqda.
M.Habibullayev, harbiy xizmatchi
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
