ҚИПЧОҚ ОВУЛИДАГИ КАСБ-ҲУНАР МАКТАБИДА “ЯШИЛ МАКОН” УМУММИЛЛИЙ ЛОЙИҲАСИ ДОИРАСИДА КЎЧАТ ЭКИШ ИШЛАРИ ТАШКИЛ ЭТИЛДИ

Амударё туманида “Яшил макон” умуммиллий лойиҳаси доирасидаги кўчат экиш ишлари қизғин давом этмоқда. Барча овул ва маҳаллаларда, корхона-ташкилотлар, таълим муассасалари бинолари атрофида лойиҳа доирасида яшил боғ барпо этиш учун турли мевали ва манзарали дарахтлар кўчатларини ўтқазиш, уларни мунтазам равишда парваришлаш ишларига алоҳида эътибор қаратилмоқда.

7 ноябрь куни Қипчоқ овулидаги 1-сонли касб-ҳунар мактаби биноси атрофида ҳам яшил ҳудудларни янада кенгайтириш, экология яхшиланишига ҳисса қўшиш мақсадида кўчат экиш ва ободонлаштириш ишлари ташкил қилинди. Ушбу эзгу ва хайрли ишларда мактабнинг барча ходимлари, ўқитувчи ва ўқувчилар иштирок этишди.

Тадбир давомида мактаб ҳудудидаги майдонларда ободонлаштириш ишларини ўтказилиб, мавжуд дарахтлар, арчалар ва буталарга шакл берилди, қуриган шохлари олиб ташланди. Ёввойи ўтлардан тозаланган ер майдонларига мевали ва манзарали дарахтлар кўчатлари ўтқазилди.

Ушбу касб-ҳунар мактабида барча қулайликларга эга бўлган ўқув биносидан ташқари, 240 ўринли ўқув устахонаси, 120 ўринли ошхона ва 100 ўринлик ўқувчилар турар жойи мавжуд. Масканда ўқувчи-ёшларнинг сифатли таълим олишлари учун барча шарт-шароитлар яратилган. Мактабда бу йилги ўқув йилида 1-босқичга 8 та йўналиш бўйича 205 нафар ўқувчи қабул қилинган. Ҳозирги кунда ўқувчи-ёшларга 28 нафар ўқитувчи ва 9 нафар ишлаб чиқариш усталари таълим-тарбия беришмоқда.

Мазкур касб-ҳунар мактабида ёшларга автомобиль двигателларини ташхислаш ва таъмирлаш, автомобиль электр ва электрон жиҳозларига хизмат кўрсатиш, ахборот воситалари машиналари ва компьютер тармоқлари оператори, тикувчи, ўт ўчирувчи, тракторчи-машинист, рақамли ахборотларни қайта ишлаш устаси, электрик каби йўналишлар бўйича пухта билим берилмоқда. Мактабнинг тажрибали ўқитувчилари умумтаълим фанларини, маҳоратли ишлаб чиқариш таълими усталари касб ва ҳунар сирларини мукаммал ўргатишмоқда. Касб ва ҳунар сирларини чуқур ўрганаётган ёшлар мактаб, туман ва республика миқёсидаги турли тадбирлар, танловларда ўз иқтидорларини намойиш этишмоқда.

Ҳар жабҳада ўз фаоллигини намоён этаётган мактаб жамоаси “Яшил макон” умуммиллий лойиҳаси доирасидаги кўкаламзорлаштириш ва ободонлаштириш ишларига ҳам ўз ҳиссаларини қўшишмоқда.

Шу пайтга қадар касб-ҳунар мактаби атрофидаги ер майдонларига шартномага кўра, Қипчоқ давлат ўрмон хўжалигидан 6,5 млн. сўмлик кўчатлар келтирилиб экилди. Ҳудудга 100 туп ясин, 100 туп катальпа, 100 туп қайрағоч, 100 туп япон сапураси, 100 туп терак кўчатлари кўчирилди. Ундан ташқари, лойиҳа доирасидаги эзгу ишлар давомида ўқитувчи ва ўқувчиларнинг ташаббуси билан 700 туп мевали ва манзарали дарахт кўчатлари ҳам ўтқазилди.

Мактаб боғига яхши ният билан экилган барча кўчатлар ҳудуднинг иқлим шароитидан келиб чиқиб, боғлар ҳосил қилиш ва кўкаламзорлаштиришни назарда тутган ҳолда танлаб олинди. Энди улар агротехник талаблар асосида парвариш қилинади, минерал ва органик ўғитлар билан озиқлантирилиб, зараркунандалардан ҳимоя қилиб борилади.

Мактаб атрофини янада обод қилиш мақсадида ташкил этилган хайрли тадбир давомида кўчатлар учун махсус техника ёрдамида чуқурлар қазилди. Ниҳоллар белгиланган ўлчамдаги чуқурларга жойлаштирилди ва сув қуйилиб, юмшатилган тупроқлар билан кўмилди. Лойиҳа доирасидаги мазкур тадбир уюшқоқлик билан ўтказилиб, мактаб ҳудудидаги боғлар янада кенгайтирилди.

О.Худойберганова.