9-сонли болалар мусиқа ва санъат мактабида ҳисобот концерти бўлиб ўтди

Санъат ва мусиқа инсон руҳиятини поклаб, унинг қалбида гўзалликка бўлган муҳаббатни уйғотувчи беқиёс кучдир. Айнан шу сеҳрли оламга қадам қўйган ёш истеъдодлар юртимизнинг эртанги маданий қиёфасини яратадилар, миллий меросимизни бутун дунёга тараннум этадилар. Бўлажак маданият ва санъат намояндалари таълим олаётган Амударё туманидаги 9-сонли болалар мусиқа ва санъат мактабида 2025-2026 ўқув йилининг муваффақиятли якунланиши муносабати билан ҳисобот концерти ташкил қилинди.

Ҳисобот концертида Амударё тумани ҳокими Собир Хўжаметов иштирок этиб, 9-сонли Болалар мусиқа ва санъат мактаби жамоасини, барча ўқитувчи ва ўқувчиларни жорий ўқув йилида қўлга киритилган ютуқлар, эришилган юксак натижалар билан чин дилдан табриклади.

Айтиш жоизки, бугунги кунда мазкур мактабда жами 194 нафар ўғил-қиз санъат сирларини қунт билан ўрганмоқда. Уларнинг орасидан 27 нафар битирувчи жорий ўқув йилида муассасани муваффақиятли тамомлаб, катта ҳаёт сари ўзларининг дастлабки қадамларини ташламоқдалар.

Ушбу ижод масканининг ташкил қилинганига 60 йилга яқин вақт бўлди. 1968 йилда асос солинган мактаб дастлабки йилларда фақатгина мусиқа йўналишида иқтидорли болаларни тарбиялашга ихтисослашган эди. Йиллар ўтиши билан муассаса ўз кўламини кенгайтириб, санъатнинг турли соҳаларини ҳам қамраб олди. 1990 йилда бино қайта қурилиб, Ҳамза номидаги мусиқа мактаби мақомида фаолиятини давом эттирди.

Мамлакатимизда ёш авлоднинг маданият ва санъат соҳасидаги таълимига қаратилаётган юксак эътибор ва ғамхўрлик натижасида 2015 йилда мактаб биносида кенг кўламли реконструкция ишлари амалга оширилди. Натижада, бутунлай янги қиёфа касб этган муассасада энг сўнгги талабларга жавоб берадиган замонавий ўқув хоналари, кенг ва ёруғ машқ заллари ҳамда ҳақиқий ижодий муҳит яратилди. Бундай кенг имкониятлар ёшларнинг ўз устида мунтазам ишлашига, катта саҳналар сари дадил қадам ташлашига бевосита хизмат қилмоқда.

Бугунги кунда масканда ўқув жараёнлари жами 10 та асосий йўналиш бўйича тизимли равишда олиб борилмоқда. Жумладан, фортепиано, халқ чолғулари, эстрада чолғулари, анъанавий хонандалик, бахшичилик, тасвирий санъат, хореография, эстрада хонандалиги, анъанавий ижро ҳамда амалий санъат синфларида ўқувчиларнинг ижодий тафаккури ва эстетик диди шакллантирилмоқда, уларнинг ички дунёси бойитилмоқда. Бу масъулиятли ва шарафли вазифани ўз касбининг фидойиси бўлган 36 нафар педагоглар амалга ошириб келмоқда. Уларнинг 19 нафари олий маълумотли мутахассислар бўлса, 17 нафари махсус мусиқа ва санъат коллежларини тамомлаган тажрибали устозлардир. Педагоглар доимий равишда тасдиқланган режа-жадваллар асосида малака ошириш марказларида ҳамда санъат мактаб-интернатларида ўз касбий маҳоратларини, назарий ва амалий билимларини мунтазам ошириб бормоқдалар.

Ҳисобот концерти давомида фидойи ўқитувчилар ва фаол ўқувчиларга Болалар мусиқа ва санъат мактабининг фахрий ёрлиқлари ва эсдалик совғалари топширилди. Мактаб директори Тўлибой Ҳайитбоев, туман Маданият бўлими бошлиғи Мурод Ибрагимов ва мактаб фахрийси Йўлдош Абдаловлар ўқувчиларни яна бир ўқув йилининг муваффақиятли якуни, битирувчиларни эса катта ҳаётга қадам қўяётгани билан табриклаб, келгуси ишларида омад ва муваффақиятлар тиладилар.

Мазкур таълим муассасаси ўқувчилари турли миллий ва халқаро кўрик-танловларда юқори натижаларни қайд этиб, жорий ўқув йилини муваффақиятли якунламоқдалар. Жумладан, "Khiva Art Fest – 2025" ҳамда "Zamin yulduzlari – 2026" халқаро танловларида жами 10 нафар ўқувчи Гран-при мукофотини, 23 нафар ўқувчи 1-ўринни, 18 нафар ўқувчи 2-ўринни ва 14 нафар ўқувчи 3-ўринни қўлга киритди. "Оролим овози – 2026" кўрик-танловида эса 11 нафар ўқувчи Гран-при, 21 нафар ўқувчи 1-ўрин, 10 нафар ўқувчи 2-ўрин ва 4 нафар ўқувчи 3-ўрин соҳиби бўлди. Шу билан бирга, "Ёшлар овози" танловининг Қорақалпоғистон Республикаси босқичида 2 нафар ўқувчи 2-ўринни банд этди.

Биргина ўтган май ойида эришилган муваффақиятларни санаб ўтсак: Жиззах шаҳрида бўлиб ўтган "Zamin yulduzlari – 2026" халқаро кўрик-танловида мактабнинг "Тасанно" рақс дастаси хореография йўналиши бўйича энг олий мукофот – Гран-при соҳибига айланди. Якка рақс ижрочилигида эса Шаҳризода Гулмирзоевва 3-ўринни қўлга киритди. Анъанавий хонандалик йўналишида "Аму юлдузлари" мақомчилар ансамбли, шунингдек, Асадбек Жумабоев ва Аббос Баҳрамовлар мутлақ ғолиб деб топилиб, 1-ўринга сазовор бўлди. Беҳруз Сергеев ҳамда Темур Тиркашевлар 2-ўринни, Сардор Кўкланов эса 3-ўринни қўлга киритишди. Эстрада хонандалиги йўналишида Суннатилло Кенжабоев ва Сарвар Гулмирзоев 3-ўрин совриндорлари қаторидан жой олди.

Халқ чолғулари йўналишида "Гулдаста" дуторчилар ансамбли, Илёс Маҳмудов, Иззат Анваров, Амирхон Алимбоев ҳамда Диёрбек Баймурадовлар 1-ўринни эгаллашди. Диёрбек Болтобоев, Қадам Шарипов, Диёрбек Гулманов, Азизбек Эрнафасов, Фармонбек Юнусов ҳамда Асалой Юсупова ва Илёс Маҳмудовлар дуэти фахрли 2-ўринга муносиб кўрилди. Равшан Гулмирзоев, Беҳруз Аҳмаджонов, Диёрбек Султонбоев, Нурҳосил Кенгашбоев ва Абдулла Бахтиёровлар 3-ўрин совриндорларига айланган бўлса, фортепиано йўналишида Аслзода Йўлдошев 1-ўрин соҳиби бўлди.

Бу каби ютуқлари билан Амударё туманидаги 9-сонли болалар мусиқа ва санъат мактаби ўқувчилари мазкур таълим даргоҳи номини бутун республика ва халқаро майдонларда баланд жаранглатиб, ўзбек миллий маданияти ва санъатининг эртанги куни нақадар ишончли қўлларда эканлигини исботладилар. Уларнинг зафарли юришлари ҳеч қачон тўхтамаслигига, санъат чўққиларини забт этишда доимо пешқадам бўлишларига тилакдошмиз!