ИЖТИМОИЙ СОҲА ОБЪЕКТЛАРИНИНГ ИСИТИШ ТИЗИМЛАРИНИ МОДЕРНИЗАЦИЯ ҚИЛИШ МАСАЛАЛАРИГА БАҒИШЛАНГАН ЙИҒИЛИШ ЎТКАЗИЛДИ
Маълумки, юртимизда ижтимоий соҳа объектларининг иситиш тизимлари тадбиркорлар ихтиёрига ўтказилади. Бу борада жорий йилнинг апрель ойида Президентимизнинг “Ижтимоий соҳа объектларининг иситиш тизимларини давлат-хусусий шериклик асосида модернизация қилиш тўғрисида”ги Қарори қабул қилинган бўлиб, қиш фасли яқинлашаётган айни кунларда унинг ижросини таъминлашга қаратилган амалий ишлар янада долзарб тус олган.
11 ноябрь куни Амударё туманидаги 38-сонли мактабнинг мажлислар залида ҳам айнан шу масалалар, Президент Қарори ижросини таъминлаш юзасидан ижтимоий соҳа объектлари раҳбарлари ва масъул ходимлари иштирокида йиғилиш ўтказилди. Ушбу йиғилишда туман Молия бўлими бошлиғи Жавлон Жумамуродов, Мактаб ва мактабгача таълим бўлимининг эксплуатация хизмати раҳбари Икром Саидов, “JKB ENERGY NUKUS GROUP” масъулияти чекланган жамиятига қарашли фирма раҳбари, Туркия мамлакати тадбиркори Дурри Бурун ва бошқалар қатнашишди.
Йиғилишда масъуллар Президентимиз хусусий шериклик асосида ижтимоий соҳа объектларининг иситиш тизимини янгилаш ва бошқариш бўйича Андижон тажрибасини Ўзбекистон бўйлаб жорий этиш топшириғини бергани, бунда иситиш тизимлари тадбиркорларга 10 йилга берилиши ва уларнинг хизматлари давлат томонидан сотиб олиниши, бу борадаги Президент Қарорига кўра лойиҳа-смета ҳужжатлари ишлаб чиқилгани хусусида батафсил маълумотлар беришди. Шунингдек, лойиҳа концепциялари тасдиқланган туманларда ижтимоий соҳа объектларининг иссиқлик тизимларини давлат-хусусий шериклик асосида босқичма-босқич модернизация қилиш ишлари бошлангани, ижтимоий соҳа объектларида Ўзбекистонда 1 йил синовдан муваффақиятли ўтган ва хизмат қилиш кафолати камида 15 йилни ташкил қиладиган иситиш қозонлари ўрнатила бошлаганини айтиб ўтишди.
Таъкидланганидек, мазкур Қарор асосида Амударё туманида ҳам 125та ижтимоий соҳа объектлари билан давлат-хусусий шерикчилик асосида “JKB ENERGY NUKUS GROUP” масъулияти чекланган жамиятига қарашли фирма ўртасида битим имзоланган бўлиб, шундан 26та ижтимоий соҳа объектларини модернизация қилиш кўзда тутилган. Режага кўра, эндиликда туман Тиббиёт бирлашмасига қарашли Бердақ оилавий шифокорлик пунктига 2 дона, 16та мактабгача таълим ташкилотига 53 дона ва 9та умумтаълим мактабига 34 дона, жами 89 дона Туркия давлатида ишлаб чиқарилган иситиш қозонлари ўрнатилади.
Туркия мамлакати тадбиркори Дурри Бурун туманда бугунги кунда 78 дона иситиш қозонлари олиб келингани, қолганлари ҳам белгиланган тартибда келтирилишини маълум қилди. Шунингдек, бугунги кунда 6 та мактабгача таълим ташкилотида қурилиш ишлари якунлангани, жами 18 дона иситиш қозонлари ўрнатилгани, айрим объектларда қозонхоналарнинг тайёр эмаслиги, қурилиш ишлари тугалланмагани сабабли қозонларни ўрнатиш, ишга тушириш имкони бўлмаганини ҳам айтиб ўтди.
Йиғилиш давомида модернизация харажатлари учун бюджет маблағлари ҳисобидан 3 млрд. 554 млн. 720 минг ажратилиши белгилангани, бугунги кунда тадбиркорнинг қурилиш фирмасига қурилиш харажатлари учун бюджет маблағлари ҳисобидан аванс тариқасида 1 млрд. 307 млн. сўм, кўмир хариди учун 396 млн. сўм маблағ ажратилиб, молиялаштирилгани тўғрисида ҳам маълумот берилди. Шунингдек, 125та ижтимоий соҳа объектларидан 99тасининг қозон ва қозонхоналарини куз-қиш мавсумига тайёр ҳолатга келтириш, уларни кўмир ёқилғилари билан тўлиқ таъминлаш борасидаги амалий ишлар жадал давом этаётгани билдирилди.
Йиғилишда Президентимизнинг “Ижтимоий соҳа объектларининг иситиш тизимларини давлат-хусусий шериклик асосида модернизация қилиш тўғрисида”ги Қарорида кўрсатилган вазифалар ижросини таъминлаш масалалари муҳокама этилди ва бу борадаги мавжуд муаммоларни бартараф этишга доир чора-тадбирлар белгилаб олинди.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
