IJTIMOIY SOHA OBʼEKTLARINING ISITISh TIZIMLARINI MODERNIZATsIYa QILISh MASALALARIGA BAGʻIShLANGAN YIGʻILISh OʻTKAZILDI

Maʼlumki, yurtimizda ijtimoiy soha obʼektlarining isitish tizimlari tadbirkorlar ixtiyoriga oʻtkaziladi. Bu borada joriy yilning aprel oyida Prezidentimizning “Ijtimoiy soha obʼektlarining isitish tizimlarini davlat-xususiy sheriklik asosida modernizatsiya qilish toʻgʻrisida”gi Qarori qabul qilingan boʻlib, qish fasli yaqinlashayotgan ayni kunlarda uning ijrosini taʼminlashga qaratilgan amaliy ishlar yanada dolzarb tus olgan.

11-noyabr kuni Amudaryo tumanidagi 38-sonli maktabning majlislar zalida ham aynan shu masalalar, Prezident Qarori ijrosini taʼminlash yuzasidan ijtimoiy soha obʼektlari rahbarlari va masʼul xodimlari ishtirokida yigʻilish oʻtkazildi. Ushbu yigʻilishda tuman Moliya boʻlimi boshligʻi Javlon Jumamurodov, Maktab va maktabgacha taʼlim boʻlimining ekspluatatsiya xizmati rahbari Ikrom Saidov, “JKB ENERGY NUKUS GROUP” masʼuliyati cheklangan jamiyatiga qarashli firma rahbari, Turkiya mamlakati tadbirkori Durri Burun va boshqalar qatnashishdi.

Yigʻilishda masʼullar Prezidentimiz xususiy sheriklik asosida ijtimoiy soha obʼektlarining isitish tizimini yangilash va boshqarish boʻyicha Andijon tajribasini Oʻzbekiston boʻylab joriy etish topshirigʻini bergani, bunda isitish tizimlari tadbirkorlarga 10-yilga berilishi va ularning xizmatlari davlat tomonidan sotib olinishi, bu boradagi Prezident Qaroriga koʻra loyiha-smeta hujjatlari ishlab chiqilgani xususida batafsil maʼlumotlar berishdi. Shuningdek, loyiha kontseptsiyalari tasdiqlangan tumanlarda ijtimoiy soha obʼektlarining issiqlik tizimlarini davlat-xususiy sheriklik asosida bosqichma-bosqich modernizatsiya qilish ishlari boshlangani, ijtimoiy soha obʼektlarida Oʻzbekistonda 1-yil sinovdan muvaffaqiyatli oʻtgan va xizmat qilish kafolati kamida 15-yilni tashkil qiladigan isitish qozonlari oʻrnatila boshlaganini aytib oʻtishdi.

Taʼkidlanganidek, mazkur Qaror asosida Amudaryo tumanida ham 125ta ijtimoiy soha obʼektlari bilan davlat-xususiy sherikchilik asosida “JKB ENERGY NUKUS GROUP” masʼuliyati cheklangan jamiyatiga qarashli firma oʻrtasida bitim imzolangan boʻlib, shundan 26ta ijtimoiy soha obʼektlarini modernizatsiya qilish koʻzda tutilgan. Rejaga koʻra, endilikda tuman Tibbiyot birlashmasiga qarashli Berdaq oilaviy shifokorlik punktiga 2 dona, 16ta maktabgacha taʼlim tashkilotiga 53 dona va 9ta umumtaʼlim maktabiga 34 dona, jami 89 dona Turkiya davlatida ishlab chiqarilgan isitish qozonlari oʻrnatiladi.

Turkiya mamlakati tadbirkori Durri Burun tumanda bugungi kunda 78 dona isitish qozonlari olib kelingani, qolganlari ham belgilangan tartibda keltirilishini maʼlum qildi. Shuningdek, bugungi kunda 6 ta maktabgacha taʼlim tashkilotida qurilish ishlari yakunlangani, jami 18 dona isitish qozonlari oʻrnatilgani, ayrim obʼektlarda qozonxonalarning tayyor emasligi, qurilish ishlari tugallanmagani sababli qozonlarni oʻrnatish, ishga tushirish imkoni boʻlmaganini ham aytib oʻtdi.

Yigʻilish davomida modernizatsiya xarajatlari uchun byudjet mablagʻlari hisobidan 3 mlrd. 554 mln. 720 ming ajratilishi belgilangani, bugungi kunda tadbirkorning qurilish firmasiga qurilish xarajatlari uchun byudjet mablagʻlari hisobidan avans tariqasida 1 mlrd. 307 mln. soʻm, koʻmir xaridi uchun 396 mln. soʻm mablagʻ ajratilib, moliyalashtirilgani toʻgʻrisida ham maʼlumot berildi. Shuningdek, 125ta ijtimoiy soha obʼektlaridan 99tasining qozon va qozonxonalarini kuz-qish mavsumiga tayyor holatga keltirish, ularni koʻmir yoqilgʻilari bilan toʻliq taʼminlash borasidagi amaliy ishlar jadal davom etayotgani bildirildi.

Yigʻilishda Prezidentimizning “Ijtimoiy soha obʼektlarining isitish tizimlarini davlat-xususiy sheriklik asosida modernizatsiya qilish toʻgʻrisida”gi Qarorida koʻrsatilgan vazifalar ijrosini taʼminlash masalalari muhokama etildi va bu boradagi mavjud muammolarni bartaraf etishga doir chora-tadbirlar belgilab olindi.

O.Xudoyberganova.