ТАНИҚЛИ ЖУРНАЛИСТ РОБИЯ ЙЎЛДОШЕВАНИНГ “НУРЛИ ИЗЛАР” НОМЛИ ЯНГИ КИТОБИ ТАҚДИМОТИГА БАҒИШЛАНГАН ТАДБИР ЎТКАЗИЛДИ

Амударёлик сермаҳсул ижодкор, Қорақалпоғистонда хизмат кўрсатган журналист Робия Йўлдошеванинг “Нурли излар” номли янги китоби нашрдан чиқди. Элда таниқли шахс, ҳаётини халқ ва жамият манфаати йўлидаги ишларга бағишлаган, фидойилиги билан барчага ибрат бўла олган инсон, юртдошимиз Йўлдош Собировнинг ҳаёти ва фаолияти ҳақидаги ушбу китоб тақдимотига бағишлаб маънавий-маърифий тадбир ташкил этилди.

21 ноябрь куни Амударё тумани ихтисослаштирилган мактабида бўлиб ўтган ушбу тадбирда ижодкор Робия Йўлдошева ҳамда китоб қаҳрамони Йўлдош Собировнинг оила аъзолари, дўстлари, яқинлари ва китобхон ёшлар иштирок этишди.

Тадбирда сўзга чиққан фахрийлар Саъдулла Хўжаниёзов, Турсунбой Абдуллаев, Аҳмад Нафасов, Озод Алмуродов, Аширбой Қўшаев, Санобар Хўжамуродова ҳамда бошқалар жонкуяр, халқпарвар, софдил ва камтарин инсон Йўлдош Собировнинг узоқ йиллар турли масъулиятли лавозимларда фидокорона меҳнат қилгани, жамият ривожига муносиб ҳисса қўшгани ҳақида сўзлаб, унинг ҳаётлик чоғидаги эзгу ишларини, ёрқин хотирасини ёдга олдилар. Шунингдек, сермаҳсул ижодкор Робия Йўлдошева ушбу инсоннинг серқирра фаолиятини, умр дафтарининг ҳар бир варағини моҳирлик билан тасвирлаганини, ҳикоялари ҳаётий ва жуда таъсирли чиққанини айтиб ўтдилар.

Муаллиф Робия Йўлдошева китобга маълумот тўплашда яқиндан ёрдам берган Йўлдош Собировнинг оила аъзолари, фарзандлари Моҳира Собирова ҳамда Отабек Йўлдошовлар, яқин дўстлари, собиқ синфдошлари, ҳамкасблари ва шогирдларига ўзининг миннатдорчилигини билдирди. Бутун ҳаётини эл-юрт манфаати йўлидаги эзгу ва хайрли ишларга бағишлаган, жонкуярлиги, элпарварлиги билан бошқаларга ўрнак бўла олган олижаноб инсон ҳақида китоб яратиш учун жиддий излангани, ушбу инсонни яқиндан биладиган дўсту-қадрдонлари, собиқ ҳамкасблари ва албатта, қариндошлари билан бирма-бир суҳбатлашгани, қаҳрамоннинг ҳаёти ва фаолиятини бор ҳолича тасвирлашга ҳаракат қилгани ҳамда китобхонларга тақдим этганини баён этди.

Йўлдош Собиров 1948 йилда Амударё туманида таваллуд топган. У тумандаги 1-сонли мактабда таълим олган. Умумтаълим мактабини 1965 йилда муваффақиятли тугатиб, Тошкент Давлат политехника институтига ўқишга кирган. Институтни 1970 йилда тугатиб келганидан сўнг, Манғит пахта тозалаш заводида иш меъёрини белгиловчи мутахассис, чилангар-ишчи, кейинчалик иқтисодчи вазифаларида ишлаган.

Ташаббускорлиги, ишчанлиги, билимдонлиги туфайли раҳбарият назарига тушган Йўлдош Собиров 1974-1975 йилларда туман партия қўмитаси инструктори лавозимида ишлаган. 1975 йилдан эса тумандаги ёшлар ташкилотининг 1-котиблигига тайинланган. Шунингдек, 1978-1979 йилларида 44-автокорхона директори, 1979-81 йилларда Манғит шаҳар Кенгаши раиси лавозимида фаолият юритган. Умр йўлдоши Ниёзжон Бекимбетова билан аҳил яшаб, 6 нафар ўғил-қизни комил инсонлар қилиб тарбиялаб, элга қўшган.

Йўлдош Собировнинг фарзандлари отасининг хотирасига эҳтиром кўрсатиб, ўзи яшаган хонадонида, ўзининг хонасида кичик музей ташкил қилишган. Хонада тартиб билан ўрнатилган ойнаванд столларга ҳаётлик чоғида мутолаа қилган китоблари, фахрий ёрлиқлар, ташаккурнома, шахсий ва керакли ҳужжатлари жойлаштирилган. Айниқса, у ишлатган ён дафтарчалар, бўш пайтларида неваралари билан суришган шахмат-шашка доналари, кийган дўппи ва бошқа кийимлари саришта қилиб қўйилган. Деворларга осилган эсдалик суратлар, фотоальбомлар эса унинг ҳаётининг ҳар бир лаҳзасидан ҳикоялар сўзлаб тургандек таассурот қолдиради.

Китоб тақдимотига бағишлаб ўтказилган тадбирда сўзга чиққан Йўлдош Собировнинг дўстлари, шогирдлари бу инсоннинг ўтган 75 йиллик умри давомида салкам 50 йил халққа ҳалол ва фидойи хизмат қилгани, 30 йил давомидаги турли раҳбарлик лавозимларида ишлаган даврларида фақат элга қайишганини эътироф этишди. Унинг барча хизматлари ҳукуматимиз томонидан муносиб баҳолангани, Қорақалпоғистон Республикаси Олий Советининг фахрий ёрлиғи, “Шавкатли меҳнати учун” медали билан мукофотлангани алоҳида қайд этилди.

Тадбирда “Нурли излар” китобидаги ҳикоялар, Йўлдош Собиров қаламига мансуб шеърият намуналаридан парчалар ўқиб берилди. Иштирокчилар ўқувчи-ёшлар ижросида асар қаҳрамонининг ҳаётлик чоғидаги севимли қўшиқларини тинглашди. Тадбир якунида эса Отабек Йўлдошов ушбу кечага ташриф буюрганларга янги китобдан совға қилди.

Журналист Робия Йўлдошеванинг амударёлик фидойи инсон Йўлдош Собиров ҳаёти ҳақидаги “Нурли излар” номли янги китоби тақдимотига бағишланган тадбир барчага манзур бўлди.

Озода Худойберганова.