Таниқли фоторассом Махсетбай Хабибуллаевнинг "Ватан ягона ва муқаддасдир!" номли фотокўргазмаси очилди

Ҳар йили 1 сентябрь санасида нишонланадиган мустақиллик куни — бу шунчаки сана эмас, балки халқимизнинг асрий орзуси ушалган кундир. Истиқлол шарофати билан халқимиз турмушида буюк ўзгаришлар рўй бермоқда, шаҳар ва қишлоқларимиз замонавий қиёфа касб этиб, юртдошларимиз турмуш тарзида ҳар куни ижобий ўзгаришлар, янгиланишлар бўй кўрсатмоқда.

Ушбу ўзгаришлар, янгиланишлардан ижодкорлар янада завқ ва илҳом олади. Шу илҳом сабабли яралган шоирларнинг шеърларида, рангтасвир усталарининг санъат асарларида, фотомухбирлар олган суратларда ўз юртига бўлган чексиз муҳаббат мужассам бўлади.

Мустақиллик байрами арафасида Қорақалпоғистон Республикаси тарихи ва маданияти давлат музейида Ўзбекистон Миллий ахборот агентлигининг Қорақалпоғистон Республикаси бўйича фотомухбири, Ўзбекистон Бадиий ижодкорлар уюшмаси аъзоси, "Ватан фидойиси" ва "Халқлар дўстлиги" кўкрак нишонлари соҳиби, "Олтин қалам" XVII Миллий мукофоти учун ўтказилган халқаро танловнинг "Энг яхши фоторепортаж" номинацияси ғолиби, таниқли фоторассом Махсетбай Хабибуллаев фотокўргазмасининг очилиш маросими бўлиб ўтди.

Ўзбекистон Республикаси Мустақиллигининг 34 йиллигига бағишланган "Ватан ягона ва муқаддасдир!" номли кўргазмадан муаллифнинг мустақиллик йилларида Қорақалпоғистон Республикасида содир бўлган янгиланишлар, шаҳар ва қишлоқларимиздаги ўзгаришлар, жамиятимизда ва халқ хўжалигининг турли соҳаларида амалга оширилган ислоҳотлар ҳамда эришилган ютуқларни акс эттирган 40 дан ортиқ асари ўрин олган.

Фоторепортаж, фотохабар, фотоочерк, фотоэтюд каби бир қатор жанрларда олинган расмлардан иборат ушбу кўргазмани ташкил этишдан асосий мақсад Президентимизнинг жорий йил 10 июлдаги "Ўзбекистон Республикаси давлат мустақиллигининг ўттиз тўрт йиллик байрамига тайёргарлик кўриш ва уни ўтказиш тўғрисида"ги қарори ижросини таъминлаш, сана муносабати билан маданий байрам кечаларини ўтказиш, айниқса кенг жамоатчиликни, шу жумладан ёшларни фидойи ижодкор инсонларнинг Ватанга муҳаббат туйғуларини тараннум этувчи асарлари билан яқиндан таништиришдан иборат.

Фотокўргазманинг очилиш маросимида Ўзбекистон рассомлар ижодий уюшмаси Қорақалпоғистон бўлими бошлиғи Наврўз Айтмуратов, Ўзбекистон Журналистлар уюшмаси Қорақалпоғистон бўлими бошлиғи, "Дўстлик" ордени соҳиби Довуд Абибуллаев, шунингдек, фоторассомнинг бир қатор ҳамкасблари, қариндошлари, шогирдлари ва бошқалар сўзга чиқиб, ижодкорнинг журналистика ва санъат соҳаларидаги хизматлари ҳақида тўхталиб ўтдилар.

Махсетбай Хабибуллаевнинг фотоматериаллари Ўзбекистон Миллий ахборот агентлигининг uza.uz сайтида, "Янги Ўзбекистон", "Халқ сўзи", "Ишонч", "Қишлоқ ҳаёти", шунингдек, маҳаллий "Еркин Қарақалпақстан", "Вести Каракалпакистана", "Қорақалпоғистон тонги", "Қарақалпақстан жаслары" каби республика нашрларида мунтазам эълон қилиб келинмоқда.

Унинг фоторассом сифатида бир қанча ижодий ишлари Ўзбекистон Бадиий академияси Қорақалпоғистон бўлими томонидан ташкил этилган кўргазмаларда намойиш этилган. 2020 йилда "Мўйноқ: кеча ва бугун", "Олтин куз", "Кумуш қиш" каби онлайн фотокўргазмалари ҳамда 2023 йил 15 октябрда "Халқаро қишлоқ аёллари" кунига бағишланган "Қадри баланд қишлоқ аёли" номли шахсий фотокўргазмалари шулар жумласидандир.

Бундан ташқари, 2024 йил август ойида Ўзбекистон Бадиий академиясига қарашли Тошкент Фотосуратлар уйида ўтказилган "Мўйноқ: кеча, бугун, эртага" номли, шунингдек, Ўзбекистон Республикаси Конституциясининг 32 йиллигига бағишланган фотокўргазмалардан ҳам ижодкорнинг бир қанча суратлари ўрин олган. Жорий йилда Халқаро хотин-қизлар куни муносабати билан ижодкорнинг "Ҳаёт гултожисан, муқаддас аёл!" номли фотокўргазмаси ҳам кенг жамоатчиликка тақдим этилган эди.

Навбатдаги фотокўргазмадан ўрин олган энг ажойиб фотосуратлар иштирокчиларда катта таассуротлар қолдирди.  Тадбир сўнгида Нукус шаҳридаги 2-сонли маданият уйининг истеъдодли созандалари томонидан ижро этилган жўшқин қўшиқ ва миллий куйлар ҳам меҳмонларга янада кўтаринки кайфият бағишлади.