Taniqli fotorassom Maxsetbay Xabibullayevning "Vatan yagona va muqaddasdir!" nomli fotokoʻrgazmasi ochildi

Har yili 1-sentyabr sanasida nishonlanadigan mustaqillik kuni — bu shunchaki sana emas, balki xalqimizning asriy orzusi ushalgan kundir. Istiqlol sharofati bilan xalqimiz turmushida buyuk oʻzgarishlar roʻy bermoqda, shahar va qishloqlarimiz zamonaviy qiyofa kasb etib, yurtdoshlarimiz turmush tarzida har kuni ijobiy oʻzgarishlar, yangilanishlar boʻy koʻrsatmoqda.

Ushbu oʻzgarishlar, yangilanishlardan ijodkorlar yanada zavq va ilhom oladi. Shu ilhom sababli yaralgan shoirlarning sheʼrlarida, rangtasvir ustalarining sanʼat asarlarida, fotomuxbirlar olgan suratlarda oʻz yurtiga boʻlgan cheksiz muhabbat mujassam boʻladi.

Mustaqillik bayrami arafasida Qoraqalpogʻiston Respublikasi tarixi va madaniyati davlat muzeyida Oʻzbekiston Milliy axborot agentligining Qoraqalpogʻiston Respublikasi boʻyicha fotomuxbiri, Oʻzbekiston Badiiy ijodkorlar uyushmasi aʼzosi, "Vatan fidoyisi" va "Xalqlar doʻstligi" koʻkrak nishonlari sohibi, "Oltin qalam" XVII Milliy mukofoti uchun oʻtkazilgan xalqaro tanlovning "Eng yaxshi fotoreportaj" nominatsiyasi gʻolibi, taniqli fotorassom Maxsetbay Xabibullayev fotokoʻrgazmasining ochilish marosimi boʻlib oʻtdi.

Oʻzbekiston Respublikasi Mustaqilligining 34-yilligiga bagʻishlangan "Vatan yagona va muqaddasdir!" nomli koʻrgazmadan muallifning mustaqillik yillarida Qoraqalpogʻiston Respublikasida sodir boʻlgan yangilanishlar, shahar va qishloqlarimizdagi oʻzgarishlar, jamiyatimizda va xalq xoʻjaligining turli sohalarida amalga oshirilgan islohotlar hamda erishilgan yutuqlarni aks ettirgan 40 dan ortiq asari oʻrin olgan.

Fotoreportaj, fotoxabar, fotoocherk, fotoetyud kabi bir qator janrlarda olingan rasmlardan iborat ushbu koʻrgazmani tashkil etishdan asosiy maqsad Prezidentimizning joriy yil 10-iyuldagi "Oʻzbekiston Respublikasi davlat mustaqilligining oʻttiz toʻrt yillik bayramiga tayyorgarlik koʻrish va uni oʻtkazish toʻgʻrisida"gi qarori ijrosini taʼminlash, sana munosabati bilan madaniy bayram kechalarini oʻtkazish, ayniqsa keng jamoatchilikni, shu jumladan yoshlarni fidoyi ijodkor insonlarning Vatanga muhabbat tuygʻularini tarannum etuvchi asarlari bilan yaqindan tanishtirishdan iborat.

Fotokoʻrgazmaning ochilish marosimida Oʻzbekiston rassomlar ijodiy uyushmasi Qoraqalpogʻiston boʻlimi boshligʻi Navroʻz Aytmuratov, Oʻzbekiston Jurnalistlar uyushmasi Qoraqalpogʻiston boʻlimi boshligʻi, "Doʻstlik" ordeni sohibi Dovud Abibullayev, shuningdek, fotorassomning bir qator hamkasblari, qarindoshlari, shogirdlari va boshqalar soʻzga chiqib, ijodkorning jurnalistika va sanʼat sohalaridagi xizmatlari haqida toʻxtalib oʻtdilar.

Maxsetbay Xabibullayevning fotomateriallari Oʻzbekiston Milliy axborot agentligining uza.uz saytida, "Yangi Oʻzbekiston", "Xalq soʻzi", "Ishonch", "Qishloq hayoti", shuningdek, mahalliy "Yerkin Qaraqalpaqstan", "Vesti Karakalpakistana", "Qoraqalpogʻiston tongi", "Qaraqalpaqstan jaslari" kabi respublika nashrlarida muntazam eʼlon qilib kelinmoqda.

Uning fotorassom sifatida bir qancha ijodiy ishlari Oʻzbekiston Badiiy akademiyasi Qoraqalpogʻiston boʻlimi tomonidan tashkil etilgan koʻrgazmalarda namoyish etilgan. 2020-yilda "Moʻynoq: kecha va bugun", "Oltin kuz", "Kumush qish" kabi onlayn fotokoʻrgazmalari hamda 2023-yil 15-oktyabrda "Xalqaro qishloq ayollari" kuniga bagʻishlangan "Qadri baland qishloq ayoli" nomli shaxsiy fotokoʻrgazmalari shular jumlasidandir.

Bundan tashqari, 2024-yil avgust oyida Oʻzbekiston Badiiy akademiyasiga qarashli Toshkent Fotosuratlar uyida oʻtkazilgan "Moʻynoq: kecha, bugun, ertaga" nomli, shuningdek, Oʻzbekiston Respublikasi Konstitutsiyasining 32-yilligiga bagʻishlangan fotokoʻrgazmalardan ham ijodkorning bir qancha suratlari oʻrin olgan. Joriy yilda Xalqaro xotin-qizlar kuni munosabati bilan ijodkorning "Hayot gultojisan, muqaddas ayol!" nomli fotokoʻrgazmasi ham keng jamoatchilikka taqdim etilgan edi.

Navbatdagi fotokoʻrgazmadan oʻrin olgan eng ajoyib fotosuratlar ishtirokchilarda katta taassurotlar qoldirdi.  Tadbir soʻngida Nukus shahridagi 2-sonli madaniyat uyining isteʼdodli sozandalari tomonidan ijro etilgan joʻshqin qoʻshiq va milliy kuylar ham mehmonlarga yanada koʻtarinki kayfiyat bagʻishladi.